Nau Nhĭm Vơl 5 - Nau Brah Ndu Ngơi 2023

Nau mbơh sơm dăn Kôranh Brah yô̆ nđach

¹ Ơ Brah Yêhôva, dăn kah gĭt ma lĕ nau hŏ tât ma hên; Dăn mêt uănh hom nau bêk prêng hên!

² Drăp ndơn hên lĕ sĭt ma ti phung bu năch jêh, Ngih vâl hên jêng ndơ phung bu năch.

³ Hên lĕ roh mbơ̆ jêng kon đơi, Mê̆ hên jêng bu ur ndrô jêh.

⁴ Phung hên mplơ̆ hom prăk gay geh dak nhêt, Rvăt hom gay geh long sĭnh.

⁵ Phung tĭng lĕ ban jêh hên mpet trô ko hên; Hên rgănh huăr jêh mâu geh rlu ôh!

⁶ Hên nchŏng ti dăn ma phung Êjipt Jêh ri Asiri, gay geh tŏng ƀănh sa.

⁷ Chô yau hên hŏ ƀư tih jêh ri abaơ lĕ khĭt jêh; Hên mra anh nau mhĭk khân păng.

⁸ Phung dĭk ŭch chiă uănh hên, Mâu geh ôh bunuyh sâm rklaih hên tă bơh ti khân păng.

⁹ Hên sân săk jăn gay ma geh ƀănh sa, Mâu klach ma đao nkhĭt tâm bri rdah.

¹⁰ Ntâu săk hên duh gring nâm bu năk gŭch Yorlah nau ji ngot su hên!

¹¹ Khân păng nchâp gay bê̆ch ndrel đah bu ur tâm ƀon Siôn, Jêh ri ƀư mhĭk ma phung bu ur druh tâm ƀon n'gor Yuđa.

¹² Ti khân păng hŏ yông jêh phung kôranh, Khân păng mâu yơk đŏng ôh ma phung bu ranh.

¹³ Bu nchâp phung mom ndăm tuy mpăl kĭn, Bi phung ndăm rah ndĭt ndĭu tâm dâng mbăk nchăp long.

¹⁴ Phung kôranh bu ranh lĕ du tă bơh mpông ƀon, Phung bu klâu ndăm mâu hôm pâl kreh gong ôh.

¹⁵ Nuih n'hâm hên roh lĕ nau maak, Nau pâl ntalơ̆ rgâl jêng nau rngot klâng.

¹⁶ Đon hađăch tŭp jêh bơh klơ bôk hên, Rêh ni ngăn ma hên, yorlah hên ƀư tih jêh!

¹⁷ Yor nau nây nuih n'hâm hên rêh ni ngăn, Măt hên lĕ hêr jêh,

¹⁸ Yorlah yôk Siôn hŏ jêng rngol jêh, Ƀư ntŭk so bri hăn nsong.

¹⁹ Ơ Brah Yêhôva, May chiă uănh n'ho ro, Sưng hađăch May ăt hôm ƀaƀơ tă bơh rô̆ aơ tât ta rô̆ ri.

²⁰ Mâm ƀư may chuêl ma hên mro mrăng, Chalơi êng hên jŏ nar tâm ban pônây?

²¹ Ơ Brah Yêhôva, njêng tay hom hên gay ma hên dơi plơ̆ sĭt tay! Dăn ƀư mhe tay nar khay hên nâm bu kăl e!

²² Di lĕ May lĕ chalơi jêh hên, Jêh ri ji nuih ma hên hâu ngăn?