Nau Nhĭm Vơl 4 - Nau Brah Ndu Ngơi 2023

Lĕ nar Yêrusalem dăch dŭt

¹ Ơ yuh! Mah lĕ roh nau chrêk, Mah chrêk lĕ rgâl jêh! Lĕ glo lŭ kloh ueh gŭ ta aơ ta ri Tâm ăp ntŭk njônh trong sâng!

² Phung kon bu klâu Siôn ueh ngăn, Khlay ngăn nâm bu mah chrêk, Aƀaơ bu uănh tâm ban ma yăng bu mon uk, Tă bơh kan ti phung mon uk ƀư!

³ Rlau ma nĕ phung so bri Hôm e ăn toh ma kon pu, Ƀiălah kon bu ur phung ƀon lan gâp janh ngăn, Nâm bu sĭm klang kŭk tâm bri rdah.

⁴ Mpiăt phung kon se jê̆ hôm pu Krêp đah rmlông dơ̆ yor ji hir; Kon se jê̆ dăn piăng let Ƀiălah bu mâu ăn ôh.

⁵ Phung tă chiăm ler ndơ sa kah, Aƀaơ gŭ êng tâm trong sâng ƀon toyh; Phung văch ma toyh tâm bok rvanh chăng-krăk, Aƀaơ ri pung tâm ŭnh buh.

⁶ Nau tih kon bu ur phung ƀon lan gâp Rlau lơn nau tih Sôdôm Jêng ƀon bu n'glưh ƀât lât dơm, Mâu geh ôh du mpang ti kơl tâm rklaih.

⁷ Phung lư rnam păng kloh rsang lơn pler, Nglang lơn dak toh. Ntâu săk jăn dŭm lơn ma lŭ tâm dâng dak mƀŭt, Muh măt chrêk rmah nâm bu lŭ saphir.

⁸ Ƀiălah aƀaơ măt krăk lơn ônh rnga, Mâu geh ôh bunuyh gĭt năl khân păng ta trong sâng; Knŏng ntâu ndop klơ nting, Lĕ kro nâm bu tơm si.

⁹ Phung khĭt yor đao Hôm geh nau ueh lơn ma phung khĭt ji ngot: Khân păng khĭt mbrơi mbrơi tâm nau nđêh nji, Yor mâu geh ndơ tă bơh mir.

¹⁰ Bar ti mê̆ bêng ma nuih n'hâm yô̆ klâng ngăn, Hôm gâm puăch kon păng nơm; Njêng khân păng jêng ndơ sông sa Tâm nôk bu jot plên phung bu ur ƀon lan gâp.

¹¹ Brah Yêhôva hŏ ƀư jêh djoh nuih, Nkhŭt nau Păng ji nuih; Păng sŭnh ŭnh ta ƀon Siôn, Ŭnh sa lĕ rngôch mbon păng.

¹² Phung hađăch gŭ ta neh ntu mâu iăt ôh, Lĕ rngôch ntil mpôl bunuyh ta neh ntu mâu ntôn, Phung rlăng jêh ri tahan phung rlăng mra hăn lăp Lĕ mpông ƀon Yêrusalem.

¹³ Ma yor nau tih phung Nơm mbơh lor, Yorlah nau mhĭk phung kôranh ƀư brah, Jêng phung hŏ ƀư pling jêh mham bunuyh sŏng srăng Ta nklang ƀon.

¹⁴ Khân păng hăn nsong mblêng njŏ trong sâng Nâm bu bunuyh chieh măt. Lĕ mham ƀư ƀơ̆ Kŏ tât mâu geh nuyh pah bi tât ma bok ao khân păng.

¹⁵ Bu kuăl huy: “Du der! Nây jêng ndơ ƀơ̆! Du der! Du der ngai! Lơi ta pah bi!” Yor nây, khân păng du der jêh ri nsong mblêng ta aơ ta ri; Phung mpôl bunuyh tâm lĕ bri dak lah: “Khân păng mâu dơi gŭ ta aơ đŏng ôh.”

¹⁶ Brah Yêhôva hŏ ƀư chah rai khân păng, Păng mâu uănh treng khân păng đŏng ôh. Kôranh ƀư brah mâu nănh n'gơr măt, Phung bu ranh mâu geh nau bu yơk ôh.

¹⁷ Măt hên huơi ngăn, Dơm dam gŭ kâp nau kơl tâm rklaih! Tă bơh pôih gak, hên gŭ kâp Du mpôl băl mâu dơi tâm rklaih hên.

¹⁸ Bu n'gơr uănh nhuat jâng hên Gay ma hên mâu dơi hăn rŏ trong; Nau lôch dŭt ma hên hŏ dăch tât jêh! Nar hên hŏ lĕ jêh! Nglĕ dŭt hên hŏ tât jêh!

¹⁹ Phung groi tĭng hên Prăl lơn ma klang ƀŭng tâm trôk ta klơ. Khân păng hăn tĭng hên ta klơ lĕ yôk, Grem kâp hên tâm bri rdah.

²⁰ Nơm dơn Brah Yêhôva tŏ dak ƀâu kah, nây jêng nau n'hâm nsôr hên, Hŏ geh dăk khân păng jêh; Nây jêng phung hên vay lah: “Nde tâm dâng n'hâm gui săk he mra gŭ rêh ta nklang lĕ bri dak.”

²¹ Hơi kon bu ur Êđôm, gŭ tâm bri Us, Maak răm rhơn hom; Ƀiălah kachok ji nuih mra tât ta may, May mra nhŭl ndrănh jêh ri gŭ săk hưl.

²² Hơi kon bu ur ƀon Siôn, nau tâm rmal ay hŏ lôch jêh, Păng mâu nkân ay ta ntŭk jêng bu nă đŏng ôh! Ƀiălah, hơi kon bu ur Êđôm, Păng mra tâm rmal ay; Mpơl nau mhĭk ay!