Nau Nhĭm Vơl 3 - Nau Brah Ndu Ngơi 2023

Nau nduyh nkra, rmal nau tih jêh ri kâp gân

¹ Gâp jêng bunuyh lĕ prot găn nau rêh ni, Tâm dâng mâng jra nau Păng ji nuih.

² Păng hŏ leo gâp jêh ri njŭn gâp hăn Tâm nau ngo, mâu geh ôh du djê̆ nau ang;

³ N'hêl nanê̆, ăp nar, Păng yơr ti Ƀư mhĭk ma gâp ƀaƀơ.

⁴ Păng hŏ ƀư ma jêh ntâu nglay puăch gâp rgay siăr, Nting nđăng gâp pă hăch;

⁵ Nchueng jŭm gâp, krŭng gâp, Ma nau rngot jêh ri nau rêh ni;

⁶ Păng ăn gâp gŭ tâm ntŭk ngo klĕng, Nâm bunuyh khĭt hŏ jŏ jêh.

⁷ Păng ƀư mpêr jŭm gâp, gâp mâu dơi klaih ôh; Păng nkông gâp ma rse rvăk jâk ngăn;

⁸ Nđâp tơlah gâp kuăl vơh vơl jêh ri dăn nau kơl, Păng dun mâu iăt ôh nau gâp mbơh sơm;

⁹ Păng sŏk king trong gâp ma lŭ, Ƀư ma trong gâp hăn kue kuăt.

¹⁰ Păng nâm bu du mlâm kau grem kâp gâp, Nâm bu yau mŭr pôn săk gŭ kâp;

¹¹ Păng ăn gâp nhhơt trong, sa hêk gâp hăch rhên, Jêh ri chalơi gâp gŭ êng;

¹² Păng hŏ van na jêh ri ndâk gâp Ƀư ntŭk ntrâng ăn ma hăr Păng.

¹³ Păng ƀư ma lĕ chiông hăr bơh tâm dĭng kăm Lăp jru geh ta nuih gâp.

¹⁴ Gâp jêng ndơ bu gơm mưch ăn ma phung ƀon lan gâp, Jêng nau mprơ mưch ma khân păng mprơ huy ăp nar.

¹⁵ Păng hŏ ăn gâp glŏm bêng ma gơ̆ tăng, Rvăn tơm si tăng dĭl ngăn.

¹⁶ Păng theng sêk gâp ta klơ lŭ chreh, Ăn gâp lâng kôn akrŏ tâm ndruyh neh.

¹⁷ Huêng gâp ngai đah nau đăp mpăn, Mâu hôm kah gĭt mâm nau ueh lăng.

¹⁸ Gâp mĭn êng: “Nau nsrôih dơn gâp hŏ lĕ jêh, Nau kâp gân tâm Brah Yêhôva hŏ roh rai jêh.”

¹⁹ “Dăn Kôranh Brah kah gĭt ma nau rngot jêh ri nau rêh gâp nsong mblêng, Knŏng tơm si tăng jêh ri play măt tăng.

²⁰ Gâp hôm kah gĭt ƀaƀơ nau nây, Huêng gâp hŏt rgănh tâm gâp.

²¹ Ƀiălah kah gĭt tay nau nây Pôri gâp geh nau kâp gân.”

²² Yor nuih n'hâm ueh Brah Yêhôva hên mâu geh nau rai yot ôh, Nau Păng yô̆ nđach mâu blau lôch ôh.

²³ Tâm ăp ôi, Nau yô̆ nđach Kôranh Brah mhe mro, Nau răp jăp May jêng toyh hâu ngăn.

²⁴ Gâp lah êng, “Brah Yêhôva jêng drăp ndơn ma gâp, Yor nây gâp kâp gân ta Păng.”

²⁵ Brah Yêhôva mpơh nau ueh ăn ma phung kâp gân Păng, Ndrel ma mbu huêng tĭng joi Păng.

²⁶ Ueh ngăn yơh ăn ma nơm klăk klêm gŭ kâp Nau tâm rklaih Brah Yêhôva.

²⁷ Ueh ngăn yơh ăn ma bunuyh nơm Anh mâng mbăk dôl hôm e kon se,

²⁸ Ăn păng gŭ êng du huê tâm nau klăk klêm Lah Păng hŏ dơm jêh mâng mbăk ta păng.

²⁹ Ăn mbung păng chŭm ndruyh neh! Klăp lah hôm geh nau kâp gân;

³⁰ Păng nta ăn bu tap trô bom păng, Sŏk dơn âk nau bêk prêng hâu ngăn ngên.

³¹ Yorlah Kôranh Brah mâu chalơi n'ho ro ôh.

³² Nđâp tơlah Păng ƀư nau rngot rvê, Păng hôm e yô̆ nđach Tĭng nuih n'hâm ueh Păng toyh ngăn;

³³ Yorlah tâm nuih n'hâm, Păng mâu ŭch ôh Ƀư nau rêh ni mâu lah nau rngot ăn ma phung kon bunuyh.

³⁴ Lah bu jot plên Lĕ rngôch bunuyh bu nă tâm n'gor,

³⁵ Gay ƀư kue nau di ma du huê bunuyh Tanăp Nơm Dŭt Prêh,

³⁶ Gay ƀư nau mhĭk ăn ma bunuyh tâm nau phat dôih, Kôranh Brah mâu sŏk dơn ôh.

³⁷ Mbu ntrŭnh ăn nau nây tât ngăn, Tơlah mâu di Kôranh Brah hŏ ntĭnh jêh?

³⁸ Di lĕ bơh mbung Nơm Dŭt Prêh Luh du n'ho ma nau mhĭk nđâp ma nau ueh?

³⁹ Mâm ƀư bunuyh dôl gŭ rêh ngơi ƀrôk Ma nau tâm rmal prăp ăn ma nau tih păng nơm?

⁴⁰ Ăn he sek uănh tay hom trong he nơm, Jêh ri plơ̆ sĭt ma Brah Yêhôva.

⁴¹ He yơr hom ti, Nuih n'hâm dăn ma Brah Ndu ta klơ trôk, jêh ri lah:

⁴² “Hên hŏ ƀư tih jêh ri tâm rdâng jêh, May mâu yô̆ an ôh!

⁴³ May pôn săk tâm nau ji nuih jêh ri hăn tĭng hên, Nkhĭt hên mâu geh nau yô̆;

⁴⁴ May pôn săk tâm ndâr tŭk Gay ma nau mbơh sơm mâu dơi tât ma May ôh.

⁴⁵ May njêng hên jêng njŏk djah, Jêng ndơ bu mâu hôm dŏng ta nklang phung ƀon lan.

⁴⁶ Lĕ rngôch phung rlăng hên Hă mbung huy tâm rdâng đah hên da dê;

⁴⁷ Hên tŭp tâm nau krit klach jêh ri ntu jru Jêng rngol jêh ri rlâm rai nchah.”

⁴⁸ Dak măt gâp hoch jêng dak n'hor Yorlah bu ur ƀon lan gâp lĕ rai yot jêh.

⁴⁹ Dak măt gâp hor hoch mro mrăng Mâu rlu ôh.

⁵⁰ Kŏ tât Brah Yêhôva tă bơh ntŭk prêh klơ Uănh treng jêh ri saơ.

⁵¹ Măt gâp ƀư ji ngăn ma huêng gâp Yorlah mrô nal ma phung bu ur druh tâm ƀon.

⁵² Phung mâu geh nau ŭch tâm rmot gâp, Tĭng nhŭp gâp nâm bu tĭng nhŭp sĭm.

⁵³ Khân păng ŭch tâp rêh gâp tâm ntu Jêh nây klŭp lŭ brôi gâp.

⁵⁴ Dak băm klơ bôk gâp, Gâp mĭn: “Gâp khĭt roh jêh!”

⁵⁵ “Ơ Brah Yêhôva, tă bơh tâm ntu jru ngăn Gâp kuăl mbơh sơm ma amoh May.

⁵⁶ May tăng jêh nau gâp, Lơi ta nsêt ôh trôm tôr bơh nau gâp nter dăn nau kơl.

⁵⁷ May hŏ văch jêh ma gâp dôl gâp mbơh sơm đah May, May hŏ lah jêh: ‘Lơi klach ôh!’

⁵⁸ Ơ Kôranh Brah, May hŏ koh dŏng jêh nau di ăn ma gâp, Tâm chuai nau rêh gâp.

⁵⁹ Ơ Brah Yêhôva, May hŏ saơ jêh nau bu tŭn jot; Dăn May sek uănh nau sŏng ma gâp!

⁶⁰ May hŏ saơ jêh lĕ nau ŭch mĭn plơng bôk Jêh ri lĕ rngôch nau khân păng ŭch ƀư tâm rdâng đah gâp.

⁶¹ Ơ Brah Yêhôva, May tăng jêh nau lĕ rngôch nau ƀư mhĭk, Jêh ri lĕ rngôch nau khân păng ŭch ƀư tâm rdâng đah gâp,

⁶² Mbung phung ŭch tâm rdâng đah gâp Gŭ ndrel nchră nau gay ŭch ƀư mhĭk ma gâp ăp nar.

⁶³ May saơ jêh nĕ, dôl khân păng gŭ mâu lah dâk Gâp jêng nau mprơ mưch ăn ma khân păng mprơ huy.

⁶⁴ Ơ Brah Yêhôva, May mra plơng bôk khân păng Tĭng nâm kan ti khân păng ƀư.

⁶⁵ Ăn ma nuih n'hâm khân păng dăng ktang, Jêh ri ăn nau rak rtăp ta khân păng.

⁶⁶ Tâm nau ji nuih, May tĭng groi jêh ri ƀư rai lơi khân păng Tă bơh trôk Brah Yêhôva.”