Nau Nhĭm Vơl 2 - Nau Brah Ndu Ngơi 2023

Kôranh Brah tâm rmal ma ƀon Yêrusalem

¹ Hơi, mâm dĭng Kôranh Brah hao ji nuih Nkŭm tŭk krăk klơ ta kon bu ur Siôn? Păng hŏ klŭp tă bơh trôk prêh jŭr tât ta neh Nau chrêk rmah Israel; Tâm nar ji nuih, Păng mâu hôm kah gĭt ôh ma rnơl chrong jâng Păng.

² Kôranh Brah rvăn lĕ ntŭk Yakôb gŭ Mâu geh nau yô̆ djê̆ lê̆ ôh; Tâm nau ji nuih, Păng ƀư rlâm lơi lĕ pôih nâp kon druh Yuđa; Ƀư rai jêh ri ƀư nau bêk prêng, Lĕ rngôch ƀon bri hađăch nđâp ma phung kôranh chiă uănh.

³ Tâm nau ji nuih hâu ngăn, Păng koh lĕ rngôch nke phung Israel. Păng rhuăt lơi mpang ti pa ma, Dôl phung rlăng rduh lơh. Nâm bu chiông ŭnh hit Păng hŏ su jêh ta nklang bri Yakôb, Ŭnh sa lĕ rngôch ndơ gŭ jŭm.

⁴ Păng van jêh na păng nâm bu phung rlăng, Ti pa ma Păng yơr hao nâm bu du huê rlăng; Păng hŏ nkhĭt lĕ rngôch phung ƀư maak măt hên uănh. Păng nkhŭt nau păng ji nuih nâm bu ŭnh Tâm ngih bok kon druh Siôn.

⁵ Kôranh Brah lĕ jêng phung rlăng, Păng rvăn phung Israel; Păng rvăn lĕ rngôch ngih hađăch păng, Ƀư rai lĕ ƀhiau pôih nâp, Ƀư ăn ma kon bu ur Yuđa Ntop nau klâng ndrê rêh ni.

⁶ Păng ƀư rai ngih brah păng nâm bu ƀư rai ndưp tâm du n'gar trao; Păng ƀư rai lơi nđâp ma ntŭk păng prăp nau tâm rƀŭn. Ta ƀon Siôn, Brah Yêhôva hŏ ƀư chuêl jêh Nar tâm rƀŭn jêh ri nar saƀat; Tâm nau ji nuih, Păng rhuăt lơi jêh hađăch jêh ri kôranh ƀư brah.

⁷ Păng hŏ mƀăr lơi jêh nơng ƀư brah, Tâm rmot lơi ntŭk kloh ueh; Păng hŏ jao jêh mpêr ngih hađăch ƀon Siôn Tâm ti phung rlăng; Khân păng troh nter tâm ngih Brah Yêhôva Nâm bu tâm nar rƀŭn.

⁸ Brah Yêhôva hŏ lĕ dăp nal ƀư rai jêh Mpêr ƀon kon druh Siôn; Păng hŏ nthăng jêh rse veh, Nkhĭt mâu rlu ôh ti Păng ƀư ăn ma mpêr jêh pôih rngot klâng, Nsum ndrel tâm nau rgănh huăr rai lĕ.

⁹ Lĕ mpông ƀon rhuh jru tâm neh; Păng ƀư rai jêh ri nkê̆ch pă lơi mâng rnăng. Hađăch jêh ri phung kôranh bu nhŭp veng leo ngai bơh n'gor khân păng; Nau vay mâu hôm geh ôh, Nđâp ma phung nơm mbơh lor ăt mâu dơi geh ôh Nau tâm saơ tă bơh Brah Yêhôva.

¹⁰ Phung kôranh bu ranh kon bu ur ƀon Siôn Răk klăk gŭ ta klơ neh; Bôk pot neh muy, Săk jăn nsoh ƀau mhay. Phung bu ur druh ƀon Yêrusalem Kŭnh bôk êp ta neh.

¹¹ Măt gâp lĕ huănh hươi jêh yor hoch âk dak măt, Proch khŭng uh ah ngăn; Nuih n'hâm gâp lĕ nkhŭt tâm neh Yorlah kon bu ur ƀon lan gâp bu ƀư rai jêh; Yorlah phung kon se jê̆ jêh ri oh bê Cha lôt prah tâm lĕ trong sâng.

¹² Khân păng kuăl ŭch joi me: “Ta ntŭk ndơ sa? Ta ntŭk ndrănh?” Khân păng khĭt huăr nâm bu bunuyh sôt rmanh Ta lĕ trong sâng tâm ƀon, Jêh nây khân păng tăch n'hâm Ta ntang tơh me păng.

¹³ Hơi bu ur druh Yêrusalem, Moh ndơ gâp ƀư gay mbơh nkoch ăn ma may? Mbu đah ay tâm rđĭl? Hơi bu ur druh Siôn, Moh ndơ gâp sŏk tâm rđĭl đah may gay ma bonh leng ay? Nau mhĭk may toyh nâm bu dak mƀŭt. Mbu nơm dơi ƀư bah?

¹⁴ Phung nơm mbơh lor may hŏ ăn may saơ jêh Nau tâm saơ mƀruh jêh ri nau ndơm; Khân păng mâu mâp tâm mpơl ôh nau tih may Gay leo may plơ̆ sĭt tă bơh ntŭk bu nă. Ƀiălah knŏng ăn may saơ Lĕ nau mbơh lor mƀruh jêh ri vĭ nhhơt.

¹⁵ Lĕ rngôch bunuyh rgăn rŏ trong Tap ti, nsŭch, rteh bôk, Ntêh rmot bu ur druh ƀon Yêrusalem: “Di lĕ aơ jêng ƀon toyh bu ntơ: ‘Nau ueh reh rah vah ngăn, Nau răm rhơn ma lĕ rngôch neh ntu’ lĕ?”

¹⁶ Lĕ rngôch phung rlăng may Hă mbung tâm rdâng đah may; Khân păng nsŭch, rket sêk, jêh nây lŭng nter: “He ƀư rai jêh păng! Aơ jêng nar he gŭ kâp gân, He hŏ dơi ngăn jêh, hŏ dơi saơ jêh!”

¹⁷ Brah Yêhôva ƀư ngăn jêh nau Păng ŭch ƀư, Ƀư nau Păng hŏ lah jêh; Nâm bu nau Păng ntĭnh bơh jŏ kăl e, Păng hŏ n'glưh lơi jêh mâu geh nau yô̆ ôh; Păng ƀư ăn ma phung rlăng may maak yor ma may, N'hao prêh nke phung rlăng may.

¹⁸ Nuih n'hâm phung ƀon lan may hŏ kuăl dăn ma Kôranh Brah, Hơi lĕ rngôch mpêr ƀon Siôn, Ăn hom dak măt may Hoch nar măng nâm bu n'hong dak krong! Lơi may rlu ôh, Mâu lĕ ăn măt may gŭ nsrŭng!

¹⁹ Dôl măng, dâk hom kuăl mbơh sơm Tâm ăp bôk măng! Nkhŭt hom nuih n'hâm nâm bu dak Tanăp Kôranh Brah. Yơr hom ti may rle mpeh Kôranh Brah Yor nau rêh jêng phung kon may, Khân păng huăr yor ji ngot, Gŭ lam ăp ntŭk njônh trong ƀon toyh.

²⁰ Ơ Brah Yêhôva dăn mêt uănh! Mbu may hŏ ƀư nâm bu pô aơ? Mâm ƀư me păng sa lơi play proch khŭng păng nơm, Nây jêng phung kon păng nơm dôl ut ra u tâm ti? Mâm ƀư kôranh ƀư brah jêh ri nơm mbơh lor Geh lĕ bu nkhĭt tâm jrô kloh ueh Kôranh Brah?

²¹ Rŏ trong sâng, phung mom ndăm jêh ri phung bu ranh Lâng bê̆ch mbrach; Phung bu klâu ndăm bu ur druh gâp Cha lôt khĭt da dê yor ma chiông đao. May hŏ nkhĭt lơi jêh khân păng tâm nar ji nuih, Ƀư nkhĭt khân păng mâu geh nau yô̆ ôh.

²² May hŏ rgum nau klach krit gâp tă bơh lĕ rngôch mpeh, Nâm bu tâm nar rƀŭn; Tâm nar Brah Yêhôva ji nuih, Mâu geh nơm klaih mâu lah nơm hôm gŭ rêh klen. Phung gâp hŏ chông ra-u jêh ri pêt rong ntĭm nti, Lĕ rngôch lĕ phung rlăng nkhĭt da dê jêh.