Nau Nhĭm Vơl 1 - Nau Brah Ndu Ngơi 2023

Nau nhĭm nhhiăng ma ƀon Yêrusalem

¹ Ơ! Ƀon aơ kăl e âk ngăn bunuyh, Aƀaơ gŭ êng du huê du! Kăl e geh nau dơi toyh ta nklang phung ƀon lan, Aƀaơ jêng nâm bu bu ur ndrô, Kăl e jêng hađăch bu ur ta nklang âk n'gor, Aƀaơ ri jêng pah kan jâk rgănh ngăn!

² Păng nhĭm dôl măng bêng ma nau rngot, Dak măt hoch tât ta trôm bom. Ta nklang lĕ rngôch phung rŏng ma păng rnôk kăl e, Mâu geh ôh nơm bonh leng păng. Phung mĭt jiăng tâm rdâng ma păng, Jêng phung tâm rlăng.

³ Phung Yuđa hăn ƀư bu nă hŏt rgănh, Dơn ƀư jêng dĭk jâk jêr. Gŭ ta nklang phung ƀon lan, Joi ntŭk rlu mâu dơi saơ ôh. Phung tĭng lĕ ban jêh păng, Dôl păng hăn dŭt jêh trong.

⁴ Trong hăn ma ƀon Siôn rngot klâng ngăn Yorlah mâu hôm geh nơm tât tâm nar rƀŭn. Lĕ rngôch mpông pêr păng jêng rngol, Phung kôranh ƀư brah nter vơl; Phung bu ur druh tang tat păng rngot klâng. Nau rêh păng gŭ tâm nau rngot ngăn.

⁵ Phung rlăng păng jêng nơm chiă uănh, Phung rlăng păng geh nau chăt hao, Yorlah Brah Yêhôva ƀư ăn ma păng rêh ni Yor nau tih păng âk ir. Phung kon păng lĕ bu nhŭp jêh, Njŭn leo hăn ƀư bu nă tanăp phung rlăng.

⁶ Nau rnam kon bu ur Siôn Hŏ roh jêh. Phung kôranh păng jêng nâm bu jun Joi mâu geh ndrêch gơ̆ ôh; Mâu hôm geh n'hâm suan nchuăt du krap Tanăp phung hăn tĭng joi.

⁷ Tâm nar nau rêh ni păng nsong mblêng, Ƀon Yêrusalem kah gĭt ma lĕ rngôch ndơ khlay păng Ndơ păng dơn ntơm bơh rô̆ saơm. Lah phung ƀon lan păng tŭp tâm ti phung rlăng, Mâu geh nơm kơl păng ôh, Phung rlăng uănh păng ma nau mưch rmot Tâm nau păng jêng rngol!

⁸ Ƀon Yêrusalem ƀư tih jâk jêr, Yor nây, lĕ jêng ƀơ̆ ƀơch jêh; Lĕ rngôch phung tă yơk ma păng aƀaơ ri gơm mưch ma păng, Yorlah khân păng saơ nau rhôk păng. Păng nơm vah vơl êng Jêh ri plơ̆ pôn muh măt.

⁹ Nau ƀơ̆ ƀơch păng krêp tâm nah bŭt păng; Păng mâu mĭn ôh ma nar kăndơ̆; Păng lĕ tŭp jêng mha ngăn Mâu geh nơm bonh leng păng ôh! “Ơ Brah Yêhôva, uănh hom ma nau rêh ni gâp, Yorlah phung rlăng hŏ yơk n'hao êng păng nơm!”

¹⁰ Phung rlăng hŏ yơr ti Sŏk lĕ rngôch ndơ khlay păng; Păng nơm hŏ saơ jêh phung ƀon lan bu năch Lăp tâm ntŭk ngih kloh ueh, Khân păng jêng phung May hŏ buay jêh Mâu dơi lăp ôh ma nau tâm rƀŭn May.

¹¹ Lĕ rngôch phung ƀon lan păng n'ho hăn dăn ƀănh sa N'ho ma vah vơl; Rgâl lĕ rngôch jay prăp drăp ndơ khlay gay geh ndơ sông sa Gay ƀư ăn mpay ma huêng khân păng. “Ơ Brah Yêhôva dăn uănh hom, Yorlah prêng ngăn ma gâp!”

¹² “Hơi lĕ rngôch mbu nơm hăn rgăn ta aơ! khân may mâu meng ôh hĕ? Văch hom jêh ri uănh! Geh đŏng nau rngot dơi rđĭl Đah nau rngot Brah Yêhôva jŭr jêh ta klơ gâp, Păng hŏ tâm rmal jêh gâp Tâm nar Păng ji nuih ngăn hĕ?

¹³ Tă bơh prêh klơ Păng hŏ ntŭp jêh ŭnh Su nting nđăng gâp. Păng hŏ nthăng nhuăl tâm dâng jâng gâp, Ƀư ăn gâp plơ̆ rŭch. Păng chalơi gâp gŭ êng, Lêt rgănh ăp nar.

¹⁴ Nau tih gâp kât ta mâng mbăk Ti Păng nơm kât ndrel khân păng. Păng tŭn jâk ta trô ko gâp, Ƀư djoh nau dăng ktang gâp. Kôranh Brah hŏ jao gâp tâm ti khân păng, Jêng phung gâp mâu dơi tâm rdâng ôh!

¹⁵ Kôranh Brah hŏ mưch jêh Lĕ rngôch phung tahan gŭ ta nklang gâp; Păng rgum du phung tahan âk tâm rdâng đah gâp Gay nchah jê̆ jê̆ phung bu klâu ndăm gâp; Kôranh Brah hŏ jot jêh bu ur druh phung Yuđa Nâm bu jot play krăk ƀâu tâm ntu păt ndrănh.

¹⁶ Yor nây gâp nhĭm nhhiăng; Gâp hor âk dak măt; Yorlah nơm bonh leng gâp ngai jêh ma gâp, Mâu geh nơm n'hao nuih gâp ôh. Phung kon gâp gŭ êng, Yorlah phung rlăng hŏ dơi jêh.”

¹⁷ Ƀon Siôn yơr ti jêh, Ƀiălah mâu ôh geh nơm bonh leng păng; Brah Yêhôva hŏ ƀư jêh ăn ma phung chiau meng Jêng phung rlăng ma Yakôb; Yêrusalem hŏ jêng jêh Du ntil ndơ ƀơ̆ gŭ ta nklang khân păng.

¹⁸ “Brah Yêhôva jêng Nơm sŏng srăng, Yorlah gâp hŏ tâm rdâng jêh đah nau păng ntĭnh. Iăt hom, hơi lĕ rngôch phung ƀon lan, Uănh hom ma nau rêh ni gâp! Phung bu klâu ndăm, bu ur druh gâp Lĕ hăn ƀư bu nă jêh.

¹⁹ Gâp hŏ kuăl jêh phung rŏng ma gâp Ƀiălah khân păng ndơm gâp; Phung kôranh ƀư brah jêh ri phung bu ranh Hŏ khĭt jêh tâm ƀon, Dôl khân păng joi ndơ sông sa Gay geh plơ̆ tay n'hâm suan.

²⁰ Ơ Brah Yêhôva, dăn uănh hom! Dôl gâp geh nau rêh ni ngăn; Proch khŭng gâp rung răng; nuih n'hâm gâp uh ah ngăn. Yorlah gâp dăng bôk dŭt n'hâm ngăn! Tâm trong sâng geh tak đao ntâp nkhĭt Tâm ngih vâl geh nau khĭt âk ngăn.

²¹ Khân păng tăng bâr gâp nter vơl, Ƀiălah mâu geh ôh nơm bonh leng. Lĕ rngôch phung rlăng gâp maak rhơn da dê, Dôl Păng djôt leo nau mhĭk tât ma gâp. Ăn may djôt nar May hŏ mbơh jêh ƀư ăn tât! Gay ma khân păng rêh ni nâm bu gâp.

²² Ăn lĕ rngôch nau mhĭk khân păng mpơl tanăp măt May! Ăn May rmal khân păng Nâm bu May hŏ rmal jêh gâp Yor lĕ rngôch nau tih gâp hŏ ƀư jêh; Gâp hŏ vah vơl âk ngăn Jêh ri nuih n'hâm gâp huănh klêu.”