Nau Ngluh Êjipt 9 - Nau Brah Ndu Ngơi 2023

Nau mhĭk tal prăm: Mpô mpa geh nau ji tưp

¹ Brah Yêhôva lah ma Y-Môis: “Hăn tâm mâp hom ma Pharaôn jêh ri lah ma păng pô aơ Brah Yêhôva, jêng Brah Ndu ma phung Hêbrơ lah: ‘Ăn phung ƀon lan Gâp hăn, gay ma khân păng dơi pah kan ma Gâp.

² Yorlah tơlah may mâu ŭch ăn ôh khân păng hăn jêh ri hôm kân khân păng

³ aơ, ti Brah Yêhôva mra ƀư nau ji tưp jâk jêr ma lĕ mpô mpa may rong tâm mir, seh, seh bri, seh samô, ndrôk, jêh ri biăp.

⁴ Brah Yêhôva mra ƀư nau tâm nkhah êng ma mpô mpa phung Israel jêh ri mpô mpa phung Êjipt; mâu geh ôh du mlâm mpô mpa phung Israel khĭt.’”

⁵ Brah Yêhôva tâm nal nar jêh ri lah: “Ôi taơ Brah Yêhôva mra ƀư nau nây tâm n'gor Êjipt.”

⁶ Kah ôi taơ, Brah Yêhôva ƀư nau nây; lĕ rngôch mpô mpa phung Êjipt khĭt da dê, ƀiălah mpô mpa phung Israel mâu ôh khĭt du mlâm.

⁷ Pharaôn đă bu hăn uănh n'hêl nanê̆ ngăn, mpô mpa phung Israel mâu geh khĭt ôh. Ƀiălah nuih n'hâm Pharaôn ăt hôm dăng, mâu ăn phung ƀon lan hăn.

Nau mhĭk tal prao: Nau ok eh

⁸ Brah Yêhôva lah ma Y-Môis jêh ri Y-Arôn: “Kuak hom buh tâm năk bêng ti khân may, jêh ri Y-Môis mbrih buh nây leo klơ trôk tanăp Pharaôn.

⁹ Buh nây mra jêng ndruyh lam n'gor Êjipt, mra jêng ok eh jêh ri môr rplưch geh ta săk jăn bunuyh jêh ri ta mpô mpa tâm lam n'gor.”

¹⁰ Pôri bar hê khân păng kuak buh tâm năk jêh ri dâk tanăp măt Pharaôn; Y-Môis mbrih buh nây leo klơ trôk, buh nây jêng geh ok eh jêh ri môr rplưch geh ta săk jăn bunuyh jêh ri ta mpô mpa.

¹¹ Yor geh ok eh, phung rƀên mâu dơi dâk ôh tanăp măt Y-Môis. Ok eh lĕ hao ma săk jăn khân păng tâm ban đŏng ma lĕ rngôch phung Êjipt.

¹² Brah Yêhôva ƀư dăng nuih n'hâm Pharaôn, mâu iăt ôh nau Y-Môis jêh ri Y-Arôn, di tĭng nâm nau Brah Yêhôva lah jêh ma Y-Môis.

Nau mhĭk tal pơh: Mih tŭp pler

¹³ Jêh nây, Brah Yêhôva lah ma Y-Môis: “Ôi taơ ăn may dâk ơm ôi, dâk tanăp măt Pharaôn jêh ri lah pô aơ Brah Yêhôva, jêng Brah Ndu phung Hêbrơ lah: ‘Ăn phung ƀon lan gâp hăn, gay ma khân păng dơi pah kan ma Gâp.

¹⁴ Yorlah tal aơ Gâp mra ƀư ăn ma may lĕ nau mhĭk tât tâm nuih n'hâm may, ma phung oh mon may jêh ri ma phung ƀon lan may, gay ma may gĭt tâm lam neh ntu mâu geh ôh bunuyh dơi ban Gâp.

¹⁵ Aƀaơ, Gâp dơi yơr ti rmal may jêh ri phung ƀon lan may ma nau ji tưp gay ƀư rai may jêh ri phung ƀon lan may bơh neh ntu.

¹⁶ Ƀiălah mâm ƀư Gâp ăn may rêh gay ma ăn may saơ nau brah Gâp, jêh ri bu mbơh nkoch lam bri neh ntu.

¹⁷ Tơlah may hôm brơl nkrŭl, mâu ăn ôh phung ƀon lan Gâp hăn,

¹⁸ ôi taơ, ta mông aơ, Gâp mra ƀư ăn mih tŭp pler toyh mâu mâp geh tâm ban pônây tâm n'gor Êjipt ntơm bơh bu ndâk bri dak kŏ tât nar aơ.

¹⁹ Yor nây aƀaơ, njŭn leo hom mpô mpa jêh ri moh ntil ndơ may geh tâm mir leo lăp ta ntŭk đăp mpăn lơn. Lĕ rngôch bunuyh jêh ri mpô mpa hôm gŭ tâm mir, ê hŏ ôh leo lăp tâm ngih, mra khĭt lĕ ro lah mih tŭp pler.’”

²⁰ Tâm phung oh mon Pharaôn, mbu moh klach yơk ma nau Brah Yêhôva ngơi, păng mra nchuăn ro phung dĭk jêh ri mpô mpa sĭt ta ngih;

²¹ bi mbu moh mâu mĭng ôh ma nau Brah Yêhôva ngơi sŏl ko ăn phung dĭk jêh ri mpô mpa khân păng gŭ tâm mir.

²² Brah Yêhôva lah ma Y-Môis: “Yơr hom ti may leo klơ trôk gay ăn mih tŭp pler lam n'gor Êjipt, geh ta klơ bunuyh, mpô mpa, jêh ri dĭng lĕ tơm si tâm mir.”

²³ Y-Môis yơr mâng jra leo klơ trôk, Brah Yêhôva ƀư nteh nglaih, mih tŭp pler, jêh ri lơp nglaih nchrat ral ta neh ntu. Yor ri Brah Yêhôva hŏ ƀư mih tŭp pler tâm n'gor Êjipt.

²⁴ Mih tŭp pler, tâm rlŭk nđâp ma lơp ŭnh nchrat ral jêng gưl mih tŭp pler dŭt krit kir ê hŏ prot geh ôh ntơm bơh nar Êjipt ndâk bri dak kŏ tât aƀaơ.

²⁵ Lam n'gor Êjipt, mih tŭp pler ƀư rai lĕ rngôch ndơ tâm mir, bunuyh nđâp ma mpô mpa; n'ha biăp, n'ha gơ̆ tâm mir hăch lĕ, lĕ rngôch tơm si cha lôt da dê.

²⁶ Knŏng tâm n'gor Gôsen, ntŭk gŭ phung ƀon lan Israel gŭ, dơm mâu geh mih tŭp pler.

Pharaôn ntrŭnh păng nơm, jêh nây lŏ dăng tay nuih n'hâm

²⁷ Pharaôn kuăl Y-Môis jêh ri Y-Arôn hăn văch jêh ri lah: “Tal aơ gâp hŏ ƀư tih jêh. Brah Yêhôva jêng sŏng srăng, bi gâp jêh ri phung ƀon lan gâp jêng tih da dê.

²⁸ Mbơh sơm hom ma Brah Yêhôva gay ma bah nglaih jêh ri mih tŭp pler, jêh nây gâp mra ăn khân may hăn, mâu hôm gŭ đŏng ôh!”

²⁹ Y-Môis lah: “Lah gâp luh jêh bơh ƀon, gâp mra yơr ti gâp ma Brah Yêhôva; nglaih mra nsrŭng, mih tŭp pler mra bah ro gay ma may gĭt n'gor aơ jêng ndơ Brah Yêhôva.

³⁰ Ƀiălah gâp gĭt may jêh ri phung oh mon may ê hŏ klach yơk ma Yêhôva Brah Ndu.”

³¹ (Nôk nây jêng nôk ba ôrgơ dôl luh, tơm mhay luh kao, yor ri ba ôrgơ n'hanh tơm mhay hăch da dê;

³² ba ƀlê jêh ri ba ƀlê bri luh kao, yor ri mâu geh djơh ôh.)

³³ Y-Môis luh bơh Pharaôn, hăn padih ƀon, yơr ti păng ma Brah Yêhôva; nglaih jêh ri mih tŭp pler nsrŭng; trôk mâu hôm mih đŏng ôh.

³⁴ Lah saơ mih, mih tŭp pler jêh ri ndâr nglaih hŏ nsrŭng jêh, Pharaôn jêh ri phung oh mon păng ăt ƀư tih tay, dăng nuih n'hâm tay tâm ban nâm ơm.

³⁵ Nuih n'hâm Pharaôn jêng dăng tay, mâu ăn ôh phung ƀon lan Israel hăn, di tĭng nâm Brah Yêhôva hŏ lah jêh ma Y-Môis.