Nau Ngluh Êjipt 8 - Nau Brah Ndu Ngơi 2023

Nau mhĭk tal bar: Kĭt

¹ Brah Yêhôva lah tay ma Y-Môis: “Hăn mâp hom Pharaôn, jêh ri lah ma păng: Brah Yêhôva lah pô aơ: ‘Ăn phung ƀon lan Gâp hăn gay ma khân păng pah kan ma Gâp.

² Tơlah may dun mâu ŭch ăn ôh khân păng hăn, aơ, Gâp mra ăn tât nau mhĭk lam n'gor may ma kĭt.

³ Dak krong mra bêng ler ma kĭt; khân păng mra vơr lăp tâm ngih hađăch, tâm jrô bê̆ch jêh ri hao đŏng tâm sưng may bê̆ch, lăp tâm ngih phung oh mon may jêh ri phung ƀon lan may, lăp tâm ŭnh năk jêh ri tâm thŭng piăch rnih may.

⁴ Kĭt mra vơr hao tât ta may, phung ƀon lan jêh ri lĕ rngôch phung oh mon may.’”

⁵ Jêh ri Brah Yêhôva lah ma Y-Môis: “Lah hom ma Y-Arôn: ‘Djôt leo hom mâng jra may jêh ri yơr tâm lĕ tu dak, dak krong, dak n'hong jê̆, dak nglao, jêh ri ƀư ăn kĭt hao bêng n'gor Êjipt.’”

⁶ Y-Arôn yơr ti tâm lĕ tu dak n'gor Êjipt jêh ri kĭt vơr hao nkŭm lam neh.

⁷ Phung rƀên dŏng nau blau rƀên ƀư tâm ban pônây lĕ, jêh ri ƀư ăn kĭt vơr hao tât ta n'gor Êjipt đŏng.

⁸ Pharaôn kuăl Y-Môis jêh ri Y-Arôn tât ta nây jêh ri lah: “Dăn hom ma Brah Yêhôva gay ăn kĭt du ngai bơh gâp jêh ri phung ƀon lan gâp rĭ mơ gâp mra ăn phung ƀon lan Hêbrơ hăn nhhơr mpa ƀư brah ma Brah Yêhôva.”

⁹ Y-Môis ngơi đah Pharaôn: “Dăn ma may dăp hom mông nar ăn rah vah gay ma gâp kuăl mbơh sơm ma Brah Yêhôva, yor may, phung oh mon may jêh ri phung ƀon lan may, gay ƀư rai kĭt bơh may, bơh ngih may, knŏng hôm e tâm dak krong dơm.”

¹⁰ Hađăch plơ̆ lah: “Ôi taơ.” Y-Môis lah: “Mra di tĭng nâm nau may lah gay ma may gĭt mâu geh ôh nơm tâm ban ma Brah Yêhôva, Brah Ndu hên.

¹¹ Kĭt mra du tă bơh may, ngih may, phung oh mon may, jêh ri bơh phung ƀon lan may; knŏng hôm e tâm dak krong dơm.”

¹² Lah jêh Y-Môis jêh ri Y-Arôn du tă bơh Pharaôn; Y-Môis kuăl mbơh sơm dăn ma Brah Yêhôva yor nau Kôranh Brah hŏ ăn kĭt tât ma Pharaôn.

¹³ Brah Yêhôva ƀư tĭng nâm nau Y-Môis dăn. Kĭt tâm ngih, tâm ƀon, tâm mir khĭt da dê.

¹⁴ Bu bun phung kĭt jêng âk mbŭch, lam n'gor n'hôl ƀâu ôm.

¹⁵ Ƀiălah dôl Pharaôn saơ păng nơm klaih jêh, nuih n'hâm păng plơ̆ dăng tay, mâu hôm ŭch tông ôh nau Y-Môis jêh ri Y-Arôn, di nâm nau Brah Yêhôva hŏ lah jêh.

Nau mhĭk tal pe: Măch

¹⁶ Brah Yêhôva lah tay ma Y-Môis: “Ngơi hom ma Y-Arôn: ‘Yơr hom mâng jra, mbang klơ ndruyh neh, ndruyh neh muy mra jêng măch tâm lam n'gor Êjipt.’”

¹⁷ Bar hê khân păng ƀư di kơt nây. Y-Arôn yơr mâng jra kuăn tâm ti, mbang klơ ndruyh neh, ndruyh jêng măch jôp ta bunuyh jêh ri ta mpô mpa; lĕ rngôch ndruyh neh jêng măch tâm lam n'gor Êjipt.

¹⁸ Phung rƀên srôih dŏng nau blau rƀên gay ma njêng măch ƀiălah khân păng mâu dơi ƀư ôh nau nây. Măch hôm jôp ta bunuyh jêh ri ta mpô mpa.

¹⁹ Phung rƀên mbơh ma Pharaôn: “Aơ jêng nglau ti Brah Ndu.” Ƀiălah nuih n'hâm Pharaôn ăt hôm dăng, mâu ŭch tông ôh nau Y-Môis jêh ri Y-Arôn, di nâm nau Brah Yêhôva hŏ lah jêh.

Nau mhĭk tal puăn: Rhuay

²⁰ Jêh nây, Brah Yêhôva lah ma Y-Môis: “Dâk hom ơm ôi jêh ri tâm mâp ma Pharaôn dôl păng hăn ta kơh dak krong jêh ri lah ma păng pô aơ Brah Yêhôva lah: ‘Ăn phung ƀon lan Gâp hăn gay ma khân păng dơi pah kan ma Gâp.

²¹ Tơlah may mâu ăn phung ƀon lan Gâp hăn, aơ, Gâp mra njuăl rhuay tât ta may, ta phung oh mon, ta phung ƀon lan jêh ri tâm ngih may. Ngih vâl phung Êjipt jêh ri lĕ rngôch ntŭk neh khân păng dơi rêh mra bêng ma rhuay.

²² Ƀiălah tâm nar nây, Gâp mra prăp êng n'gor Gôsen jêng ntŭk phung ƀon lan Gâp gŭ; ntŭk nây mâu mra geh rhuay ôh gay ma may gĭt Gâp jêng Brah Yêhôva hôm gŭ ta nklang n'gor aơ.

²³ Gâp mra prăp êng phung ƀon lan Gâp đah phung ƀon lan may. Nau mbên khlay aơ ôi taơ mra tât.’”

²⁴ Brah Yêhôva ƀư di kơt nây. Lĕ phung rhuay âk ngăn lăp tâm ngih hađăch Pharaôn jêh ri tâm ngih phung oh mon. Lam n'gor Êjipt geh rhuay jôp ƀư rai lĕ rngôch.

Pharaôn ton ăn phung ƀon lan Israel hăn jêh nây nkhơng păng dăng nuih n'hâm

²⁵ Pharaôn kuăl Y-Môis jêh ri Y-Arôn văch jêh ri lah: “Hăn hom jêh ri nhhơr mpa ƀư brah ma Brah Ndu khân may tâm n'gor aơ.”

²⁶ Ƀiălah Y-Môis ơh: “Ƀư pônây mâu di ôh yorlah phung Êjipt rmot lĕ ndơ hên ƀư brah nhhơr ma Yêhôva Brah Ndu. Tơlah hên nhhơr ndơ ƀư brah, phung Êjipt uănh ndơ nây jêng ndơ khân păng rmot, mâu di hĕ khân păng mra klŭp hên ma lŭ?

²⁷ Hên mra lăp tâm bri rdah pe nar hăn trong gay nhhơr mpa ƀư brah ma Yêhôva Brah Ndu hên tĭng nâm nau Păng hŏ ntĭm ma hên.”

²⁸ Pharaôn lah: “Gâp mra ăn khân may hăn gay nhhơr mpa ƀư brah ma Yêhôva Brah Ndu khân may tâm bri rdah, ƀiălah mâu dơi hăn ngai ir. Aƀaơ mbơh sơm hom ma gâp.”

²⁹ Y-Môis ơh: “Ơ, gâp mra luh du tă bơh may jêh ri mbơh sơm ma Brah Yêhôva; ôi taơ rhuay mra mpăr du bơh hađăch, bơh phung oh mon jêh ri phung ƀon lan. Ƀiălah dăn hađăch lơi rlăm ôh jêh ri mâu ăn phung ƀon lan hên hăn nhhơr mpa ƀư brah ma Brah Yêhôva”.

³⁰ Y-Môis du tă bơh Pharaôn, jêh ri mbơh sơm ma Brah Yêhôva.

³¹ Kôranh Brah ƀư di tĭng nâm nau Y-Môis dăn, mprơh lĕ rngôch rhuay du bơh hađăch, bơh phung oh mon, jêh ri bơh phung ƀon lan hađăch, mâu hôm geh du mlâm ôh.

³² Ƀiălah tal aơ, Pharaôn ăt dăng tay nuih n'hâm, mâu ăn phung ƀon lan dâk hăn.