Nau Ngluh Êjipt 7 - Nau Brah Ndu Ngơi 2023

Brah Ndu đă tay Y-Môis hăn tâm mâp đah Pharaôn

¹ Brah Yêhôva lah ma Y-Môis: “Aơ, Gâp ăn may jêng nâm bu Brah Ndu đah Pharaôn; bi ma Y-Arôn, nâu may, mra jêng bunuyh sâm ngơi ma may.

² Ăn may nkoch tay lĕ nau Gâp hŏ ntĭm nti jêh ma may; jêh nây Y-Arôn, nâu may, mra mbơh ma Pharaôn gay ma hađăch nây dơi ăn phung ƀon lan Israel luh bơh n'gor Êjipt.

³ Ƀiălah Gâp mra ƀư dăng nuih n'hâm Pharaôn, jêh ri nđâp lah Gâp ăn lơ n'hao âk nau mbên khlay tâm n'gor Êjipt

⁴ Pharaôn mâu mra iăt ôh nau khân may. Gâp mra yơr ti gay rmal n'gor Êjipt ma nau jâk jêr gay djôt leo phung tahan Gâp, jêng phung ƀon lan Israel, luh bơh n'gor nây.

⁵ Lah Gâp yơr ti tâm rdâng đah phung Êjipt gay djôt phung ƀon lan Israel luh bơh nây rĭ mơ phung Êjipt mra gĭt Gâp jêng Brah Yêhôva.”

⁶ Y-Môis jêh ri Y-Arôn ƀư tĭng nâm nau Brah Yêhôva hŏ ntĭnh jêh.

⁷ Nôk tâm mâp đah Pharaôn, Y-Môis hŏ pham jât năm jêh, bi ma Y-Arôn pham jât mpe năm.

Mâng jra Y-Arôn jêng bêh

⁸ Brah Yêhôva lah ma Y-Môis jêh ri Y-Arôn:

⁹ “Lah Pharaôn đă khân may: ‘Ƀư hom du nau mbên khlay,’ ăn may ngơi đah Y-Arôn: ‘Sŏk hom mâng jra may jêh ri klŭp păng tanăp măt Pharaôn, păng mra jêng bêh.’”

¹⁰ Pôri Y-Môis jêh ri Y-Arôn hăn tât ta Pharaôn jêh ri ƀư tĭng nâm nau Brah Yêhôva hŏ ntĭnh jêh. Y-Arôn klŭp mâng jra păng tanăp măt Pharaôn jêh ri phung oh mon păng, mâng jra plăch jêng bêh ro.

¹¹ Pharaôn kuăl rgum phung gĭt blau jêh ri phung n'hŭm jêng phung rƀên n'gor Êjipt văch, khân păng dŏng nau blau rƀên gay ƀư tâm ban kơt nây đŏng.

¹² Ăp nơm khân păng klŭp mâng jra; mâng jra nây jêng bêh da dê. Ƀiălah mâng jra Y-Arôn rvăn lĕ mâng jra khân păng.

¹³ Nuih n'hâm Pharaôn ăt hôm dăng, mâu iăt ôh nau Y-Môis jêh ri Y-Arôn, di nâm nau Brah Yêhôva hŏ lah jêh.

Nau mhĭk tal nguay: Dak krong jêng mham

¹⁴ Brah Yêhôva lah ma Y-Môis: “Nuih n'hâm Pharaôn hŏ dăng jêh; păng dun, mâu ăn ôh khân păng du luh.

¹⁵ Hăn mâp hom Pharaôn nôk ôi, dôl păng hăn ta kơh dak krong. Kâp hom păng ta kơh dak krong jêh ri may djôt mâng jra tâm ti hŏ tă kêng jêng bêh.

¹⁶ Ăn may mbơh ma păng pô aơ Brah Yêhôva, jêng Brah Ndu phung Hêbrơ hŏ đă gâp tât gay mâp may jêh ri lah ma may: ‘Ăn phung ƀon lan Gâp luh du gay ma khân păng dơi pah kan ma Gâp tâm bri rdah; ƀiălah tât aƀaơ may mâu ôh mâp tông bâr.’

¹⁷ Yor ri, Brah Yêhôva ngơi: ‘Ma nau aơ may mra gĭt Gâp jêng Brah Yêhôva.’ Aơ, gâp mra sŏk mâng jra tâm ti gâp mbang tâm dak krong, jêh ri dak nây mra jêng mham;

¹⁸ ka tâm dâng dak krong mra khĭt; n'hong dak krong mra ƀâu ôm, phung Êjipt mra kir krit ngăn lah geh nhêt dak krong nây.”

¹⁹ Brah Yêhôva lah ma Y-Môis: “Lah hom ma Y-Arôn: ‘Djôt hom mâng jra may jêh ri yơr ti may tâm lĕ tu dak n'gor Êjipt, jêng lĕ dak krong, dak n'hong jê̆, dak nglao, jêh ri lĕ ntu prăp dak, gay ma dak nây jêng mham. Mham mra geh ăp ntŭk tâm n'gor Êjipt, nđâp ma dak tâm lĕ thŭng ƀư ma si, ma lŭ.’”

²⁰ Y-Môis jêh ri Y-Arôn ƀư tĭng nâm nau Brah Yêhôva hŏ ntĭnh jêh. Tanăp măt Pharaôn jêh ri phung oh mon păng, Y-Arôn yơr mâng jra păng, mbang dak krong, jêh ri lĕ rngôch dak krong jêng mham da dê.

²¹ Ka tâm dâng dak krong khĭt, n'hong dak krong jêng ƀâu ôm, phung Êjipt mâu dơi ôh nhêt dak tâm dak krong nây. Lam ntŭk tâm bri Êjipt geh mham da dê.

²² Ƀiălah phung rƀên n'gor Êjipt dŏng nau blau rƀên gay ƀư tâm ban pônây yor ri nuih n'hâm Pharaôn ăt hôm dăng, mâu tông nau Y-Môis jêh ri Y-Arôn, di nâm nau Brah Yêhôva hŏ ntĭnh jêh.

²³ Pharaôn plơ̆ sĭt ta ngih hađăch, păng mâu chrê ôh ma nau nây.

²⁴ Lĕ rngôch phung Êjipt kuyh ntu tĭng rŏ dak krong gay ma joi dak nhêt yorlah khân păng mâu dơi ôh nhêt dak tâm dak krong nây.

²⁵ Nau aơ jŏ tâm pơh nar kơp ntơm bơh Brah Yêhôva ăn tât nau mhĭk tâm dak krong.