Nau Ngluh Êjipt 6 - Nau Brah Ndu Ngơi 2023

Brah Ndu ton tay nau tâm rklaih phung Israel

¹ Brah Yêhôva lah ma Y-Môis: “Aƀaơ may mra saơ lĕ nau Gâp mra ƀư ma Pharaôn. Nanê̆, yor tă bơh mpang ti nau brah Gâp, hađăch nây mra ăn phung Israel hăn luh; yor tă bơh mpang ti nau brah Gâp, hađăch nây mra mprơh khân păng luh bơh n'gor păng.”

² Brah Ndu lah tay ma Y-Môis: “Gâp jêng Brah Yêhôva.

³ Gâp hŏ tâm mpơl jêh ma Y-Abraham, Y-Isăk, jêh ri ma Y-Yakôb nhhơ Gâp nơm jêng Brah Ndu Geh Lĕ Nau Brah; ƀiălah Gâp ê hŏ mpơl ôh ma khân păng gĭt tâm amoh Gâp jêng Brah Yêhôva.

⁴ Gâp hŏ ƀư jêh nau tâm rnglăp đah khân păng gay ăn n'gor Kanaan, jêng n'gor khân păng hŏ gŭ njưh nâm phung bu năch.

⁵ Gâp hŏ tăng đŏng nau phung ƀon lan Israel nter yor phung Êjipt nhŭp khân păng ƀư dĭk jêh ri kah gĭt tay nau Gâp tâm rnglăp.

⁶ Yor nây, ăn may lah ma phung ƀon lan Israel: ‘Gâp jêng Brah Yêhôva, Gâp mra djôt khân may luh bơh kan jâk phung Êjipt jêh ri rklaih khân may bơh nau ƀư dĭk. Gâp mra yơr ti sŏng, dŏng nau phat dôih jâk jêr gay tâm chuai khân may.

⁷ Gâp mra dơn khân may jêng phung ƀon lan Gâp, jêh ri Gâp mra jêng Brah Ndu khân may. Khân may mra gĭt Gâp jêng Yêhôva Brah Ndu khân may, Nơm hŏ djôt khân may luh bơh kan jâk jêr tă bơh phung Êjipt.

⁸ Gâp mra djôt khân may lăp tâm n'gor Gâp hŏ ton jêh ăn ma Y-Abraham, Y-Isăk, Y-Yakôb, jêh ri ăn n'gor nây jêng drăp ndơn ma khân may: Gâp jêng Brah Yêhôva.’”

⁹ Y-Môis ngơi lĕ rngôch nau nây ma phung ƀon lan Israel ƀiălah khân păng mâu iăt ôh nau Y-Môis yor nau khân păng rdja nuih jêh ri nau ƀư dĭk dŭt hŏt ngăn.

¹⁰ Brah Yêhôva lah ma Y-Môis:

¹¹ “Hăn ngơi hom đah Pharaôn, hađăch Êjipt, gay ma păng ăn phung ƀon lan Israel luh bơh n'gor păng.”

¹² Ƀiălah Y-Môis plơ̆ lah ma Brah Yêhôva: “Ơ Kôranh Brah, gâp jêng bunuyh mâu blau ngơi ueh; phung ƀon lan Israel mâu hŏ ôh iăt nau gâp, mâm dĭng Pharaôn dơi iăt gâp?”

¹³ Brah Yêhôva ngơi tay đah Y-Môis jêh ri Y-Arôn, ntĭnh ăn ma bar hê khân păng hăn tât ma phung ƀon lan Israel jêh ri Pharaôn, hađăch n'gor Êjipt, gay leo phung ƀon lan Israel luh bơh n'gor Êjipt.

Noi deh Y-Ruben

¹⁴ Aơ jêng kôranh ndŭl mpôl tâm lĕ noi deh ƀon lan Israel. Phung kon bu klâu Y-Ruben, kon bu klâu bôk rah Y-Israel, jêng: Y-Hanŏk, Y-Palu, Y-Hêsron, jêh ri Y-Karmi. Nây jêng ndŭl mpôl Y-Ruben.

Noi deh Y-Simêôn

¹⁵ Lĕ phung kon bu klâu Y-Simêôn jêng: Y-Jêmuêl, Y-Jamin, Y-Ôhat, Y-Jakin, Y-Sôhar, jêh ri Y-Sôl jêng kon bu klâu bơh bu ur Kanaan. Nây jêng ndŭl mpôl Y-Simêôn.

Noi deh Y-Lêvi, chô yau Y-Môis jêh ri Y-Arôn

¹⁶ Aơ jêng amoh săk phung kon bu klâu Y-Lêvi, tĭng nâm băl mpôl khân păng, jêng: Y-Gersôn, Y-Kôhat jêh ri Y-Mêrari. Y-Lêvi dơi rêh du rhiăng pe jât mpơh năm.

¹⁷ Lĕ phung kon bu klâu Y-Gersôn, tĭng ăp ndŭl mpôl jêng: Y-Lipni, jêh ri Y-Simei.

¹⁸ Lĕ phung kon bu klâu Y-Kôhat jêng: Y-Amram, Y-Ishar, Y-Hêbron, jêh ri Y-Usiêl. Y-Kôhat dơi rêh du rhiăng pe jât mpe năm.

¹⁹ Lĕ phung kon bu klâu Y-Mêrari jêng: Y-Mahli jêh ri Y-Musi. Nây jêng ndŭl mpôl Y-Lêvi tĭng nâm băl mpôl khân păng.

²⁰ Y-Amram nđăp H'Jôkêbet, oh bu ur mbơ̆ păng nơm; jêh ri păng deh ăn ma sai păng bar hê kon jêng Y-Arôn jêh ri Y-Môis. Y-Amram dơi rêh du rhiăng pe jât mpơh năm.

²¹ Lĕ Phung kon bu klâu Y-Ishar jêng: Y-Kôra, Y-Nêphek, jêh ri Y-Sikri.

²² Lĕ phung kon bu klâu Y-Usiêl jêng: Y-Misaêl, Y-Êlsaphan, jêh ri Y-Sithri.

²³ Y-Arôn nđăp Y-Êlisêba, kon bu ur Y-Aminadap, oh Y-Nahsôn, bu ur nây deh ăn ma păng puăn lông kon jêng Y-Nadap, Y-Abihu, Y-Êlêasar, jêh ri Y-Ithamar.

²⁴ Lĕ phung kon bu klâu Y-Kôra jêng: Y-Asir, Y-Êlkana, jêh ri Y-Abiasap. Nây jêng ndŭl mpôl Y-Kôra.

²⁵ Y-Êlêasar, kon bu klâu Y-Arôn, nđăp du huê tâm phung kon bu ur Y-Putiel, jêh ri deh Y-Phinêas ma păng. Aơ jêng lĕ phung kôranh ndŭl mpôl bơh noi bunuyh Y-Lêvi, tĭng ndŭl mpôl Y-Lêvi.

²⁶ Y-Arôn jêh ri Y-Môis jêng phung bunuyh Brah Yêhôva hŏ ntĭm nti jêh: “Ăn hăn tĭng ăp ndŭl mpôl gay njŭn phung ƀon lan Israel luh bơh n'gor Êjipt.”

²⁷ Y-Môis jêh ri Y-Arôn jêng bar hê phung hŏ ngơi đŏng đah Pharaôn, hađăch Êjipt, gay ma njŭn phung ƀon lan Israel luh bơh n'gor Êjipt.

²⁸ Tâm nar Brah Yêhôva ngơi ma Y-Môis ta n'gor Êjipt,

²⁹ Brah Yêhôva hŏ lah jêh ma Y-Môis: “Gâp jêng Brah Yêhôva. Nkoch hom ma Pharaôn, hađăch Êjipt lĕ rngôch nau Gâp hŏ ngơi ma may.”

³⁰ Y-Môis lah ma Brah Yêhôva: “Aơ, gâp jêng bunuyh mâu blau ngơi ueh ôh, mâm dĭng Pharaôn dơi iăt gâp?”