Nau Ngluh Êjipt 5 - Nau Brah Ndu Ngơi 2023

Y-Môis jêh ri Arôn tâm mâp đah hađăch Êjipt

¹ Jêh nây, Y-Môis jêh ri Y-Arôn hăn mbơh ma Pharaôn jêh ri lah: “Brah Yêhôva, Brah Ndu phung Israel, lah: ‘Ăn phung ƀon lan Gâp hăn gay ma khân păng nkra nau tâm rƀŭn yơk mbah ma Gâp tâm bri rdah.’”

² Ƀiălah Pharaôn lah: “Brah Yêhôva mbu jêng, dĭng gâp ma tông bâr gay ma ăn phung ƀon lan Israel hăn? Gâp mâu gĭt năl ôh Brah Yêhôva jêh ri gâp mâu đŏng ăn Phung ƀon lan Israel hăn.”

³ Y-Môis jêh ri Y-Arôn ngơi: “Brah Ndu phung Hêbrơ hŏ tâm mpơl jêh đah hên. Hên dăn ma may ăn hên hăn tâm pe nar hăn trong mŭt tâm bri rdah gay nhhơr mpa ƀư brah ma Yêhôva Brah Ndu hên; lah mâu, Brah Ndu mra ƀư nau ji tưp mâu lah ma đao đah hên.”

⁴ Hađăch Êjipt lah: “Ơ Y-Môis jêh ri Y-Arôn, mâm ƀư khân may nsŭk phung ƀon lan chalơi kan? Hăn hom ƀư nau kan khân may nơm!”

⁵ Pharaôn lah tay: “Aơ, phung ƀon lan tâm n'gor aƀaơ jêng bĭk âk ngăn, ƀiălah bar hê khân may ŭch ăn khân păng rlu ƀư kan ƀơh!”

Pharaôn ƀư rêh ni lơn ma phung ƀon lan

⁶ Tâm nar nây ro, Pharaôn ntĭnh đă phung kôranh uănh kan jêh ri phung kôranh mbŭch:

⁷ “Lơi ta khân may ƀơk ôh rhe ma phung ƀon lan ƀư ƀrĭk nâm bu alor. Ăn khân păng nơm hăn joi êng rhe gay ƀư.

⁸ Ƀiălah rnoh ƀrĭk ăn khân may đă khân păng ƀư tâm ban ƀoi ơm, mâu dơi n'hŭch ôh. Yor ti khân păng gŭ dơm dĭng khân păng tâm jă ndrăng khân păng: ‘Hăn hom he nhhơr mpa ƀư brah ma Brah Ndu he!’

⁹ Ăn jao ntop kan jâk lơn ma phung nây gay yor âk ir nau kan, rĭ mơ khân păng mâu hôm mĭn rvê ma lĕ nau ngơi mƀruh nây.”

¹⁰ Pôri phung kôranh uănh kan jêh ri phung kôranh mbŭch hăn ngơi ma phung ƀon lan: “Pharaôn hŏ lah kơt aơ: ‘Gâp mâu hôm ƀơk ôh rhe ma khân may.

¹¹ Ăn khân may nơm hăn joi êng rhe ta ntŭk khân may dơi saơ; ƀiălah nau kan khân may mâu dơi n'hŭch ôh.’”

¹² Phung ƀon lan hăn bra lam bri Êjipt gay ma dônh bun jia kro ntrok ƀư rhe.

¹³ Phung kôranh uănh kan ntrŭt khân păng: “Ƀư ăn jêh kan khân may, ăp nar ƀư ăn nŭm rnoh hŏ jao jêh nâm bu nôk hôm ƀơk rhe.”

¹⁴ Phung kôranh mbŭch bunuyh Israel tă bơh phung kôranh uănh kan Pharaôn săch gay uănh nđôi lĕ phung Israel ƀaƀă jêng phung lĕ bu hŏ dong mbang jêh ri ôp khân păng: “Mâm ƀư nđaơ jêh ri nar aơ khân may mâu ƀư nŭm ôh rnoh ƀrĭk hŏ jao jêh nâm bu lor?”

¹⁵ Phung kôranh mbŭch Israel văch nter lŭng ma Pharaôn: “Mâm ƀư may ƀư pônây ma phung oh mon may?

¹⁶ Bu mâu ƀơk rhe ma phung oh mon may, ƀiălah khân păng lah: ‘Ƀư hom ƀrĭk!’ Aơ, bu dong mbang phung oh mon may; ƀiălah phung ƀon lan may nơm jêng tih.”

¹⁷ Hađăch lah: “Khân may jêng phung tahan ƀlao, tahan ƀlao! Yor ri dĭng khân may tâm ngơi drăng nơm: ‘Ăn he nhhơr mpa ƀư brah ma Brah Yêhôva!’

¹⁸ Aƀaơ hăn pah kan hom, bu mâu mra ƀơk ôh rhe ma khân may; ƀiălah ăn khân may njŭn nŭm rnoh ƀrĭk.”

Nau phung ƀon lan Israel ngơi nduyh

¹⁹ Phung kôranh mbŭch Israel saơ khân păng nơm tŭp tâm nau uh ah nôk bu đă: “Khân may mâu dơi n'hŭch rnoh ƀrĭk hŏ jao jêh tâm ăp nar.”

²⁰ Luh tă bơh ngih Pharaôn, khân păng mâp Y-Môis jêh ri Y-Arôn gŭ kâp ta nây.

²¹ Phung kôranh mbŭch ngơi: “Bar hê khân may hŏ ƀư ma hên jêng ndơ ƀơ̆ bơch tanăp măt pharaôn jêh ri phung oh mon păng, hŏ ndơ̆ jêh đao gưm tâm ti khân păng gay ma nkhĭt hên. Dăn Brah Yêhôva sek uănh jêh ri phat dôih khân may!”

²² Y-Môis plơ̆ sĭt jêh ri ngơi đah Brah Yêhôva: “Ơ Kôranh Brah! Mâm ƀư May ăn nau mhĭk ma phung ƀon lan aơ? Mâm ƀư May đă gâp hăn ta aơ?

²³ Ntơm bơh gâp tâm mâp đah Pharaôn jêh ri sŏk amoh Brah Ndu gay ngơi ƀiălah hađăch nây rlơ̆ ƀư nau mhĭk ma phung ƀon lan aơ, jêh ri Brah Ndu mâu ôh sâm rklaih phung ƀon lan May.”