Nau Ngluh Êjipt 40 - Nau Brah Ndu Ngơi 2023

Rƀŭn nhhơr Ngih Bok

¹ Brah Yêhôva ngơi ma Y-Môis:

² “Ta nar năng nguay tâm khay nguay, ăn may ndâk Ngih Bok, jêng Ngih Bok Nau Tâm Rƀŭn.

³ Dơm hom Hip Nau Tâm Rnglăp ta nây jêh nây sŏk bok nkŭm hip nây.

⁴ May djôt đŏng sưng jêh ri dăp krep ăn di lĕ ntil. Jêh nây may djôt leo jâng kađen jêh ri n'gân jâng kađen ta klơ.

⁵ Dơm hom nơng ƀư brah ma mah dŏng ma nau su ndơ ƀâu kah panăp Hip Nau Tâm Rnglăp, jêh ri nthăng bok ta mpông Ngih Bok.

⁶ May dơm đŏng nơng ƀư brah nhhơr ndơ ƀư brah gŭch tanăp mpông Ngih Bok, jêng Ngih Bok Nau Tâm Rƀŭn,

⁷ jêh ri dơm thŭng rao ta nklang Ngih Bok Nau Tâm Rƀŭn jêh ri nơng ƀư brah jêh nây nkhŭt dak tâm nây.

⁸ May ndâk đŏng ndring ngih văr jŭm jêh ri nthăng bok ta mpông ndring ngih.

⁹ Jêh nây, may sŏk dak ƀâu kah gay mhĭng Ngih Bok jêh ri moh ntil ndơ tâm nây. Prăp êng nau kloh ueh ma Ngih Bok jêh ri lĕ ndơ dŏng ƀư ueh tâm Ngih Bok gay Ngih Bok jêng kloh ueh.

¹⁰ Ăn may mhĭng dak ƀâu kah nơng ƀư brah nhhơr ndơ ƀư brah gŭch jêh ri lĕ ndơ dŏng nơng ƀư brah, jêh ri prăp nơng ƀư brah ăn ma nau kloh ueh, gay nơng ƀư brah jêng kloh ueh lơn.

¹¹ May mhĭng đŏng dak ƀâu kah ta thŭng dak nđâp jâng păng, jêh ri prăp thŭng nây ma nau kloh ueh.

¹² Jêh nây may njŭn leo Y-Arôn jêh ri phung kon bu klâu păng tât ta mpông Ngih Bok Nau Tâm Rƀŭn jêh ri rao khân păng ma dak.

¹³ Ăn may nsoh bok ao kloh ueh ma Y-Arôn, mhĭng dak ƀâu kah jêh ri prăp êng păng ma nau kloh ueh gay ma păng ƀư nau kan ndơ ƀư brah ma Gâp.

¹⁴ May njŭn leo đŏng phung kon bu klâu Y-Arôn tât jêh ri nsoh ao jâr,

¹⁵ mhĭng dak ƀâu kah ma khân păng nâm bu may hŏ mhĭng dak ƀâu kah ma mbơ̆ khân păng gay ma khân păng ƀư kan ndơ ƀư brah ma Gâp. Nau mhĭng dak ƀâu kah nây mra dơn ma khân păng ƀư nau kan ndơ ƀư brah n'ho ro tâm lĕ rô̆ nuyh.”

¹⁶ Y-Môis ƀư lĕ kan di nâm lĕ nau Brah Yêhôva hŏ ntăm nti jêh ma păng.

¹⁷ Ta nar năng nguay khay nguay năm tal bar, Ngih Bok hŏ ndâk jêh.

¹⁸ Y-Môis ndâk Ngih Bok. Păng dơm trôm n'gâng, ndâk kađar, dơm mâng rkăng jêh ri ndâk n'gâng păng.

¹⁹ Păng ling bok nkŭm ta klơ Ngih Bok jêh nây nkŭm bok ta klơ, di nâm nau Brah Yêhôva hŏ ntĭnh jêh ma Y-Môis.

²⁰ Păng sŏk Rlat Nau Tâm Rnglăp dơm tâm hip, nsro mâng tung, dơm ndrŭp nau yô̆ ta klơ

²¹ jêh nây njŭn Hip Nau Tâm Rnglăp lăp tâm Ngih Bok jêh ri ntă bok nkŭm ndâp. Hip Nau Tâm Rnglăp tĭng nâm nau Brah Yêhôva hŏ ntĭnh jêh ma Y-Môis.

²² Păng dơm sưng tâm Ngih Bok Nau Tâm Rƀŭn, mpeh pa lơ Ngih Bok, mpeh padih blah bok,

²³ jêh nây dăp piăng let di mbor tanăp Brah Yêhôva, tĭng nâm nau Brah Yêhôva hŏ ntĭnh jêh ma Y-Môis.

²⁴ Păng dơm đŏng jâng kađen tâm Ngih Bok Nau Tâm Rƀŭn, tâm tra đah sưng, mpeh pa dâng Ngih Bok

²⁵ jêh ri dơm lĕ kađen tanăp Brah Yêhôva, tĭng nâm nau Brah Yêhôva hŏ ntĭnh jêh ma Y-Môis.

²⁶ Păng dơm đŏng nơng ƀư brah ma mah tanăp blah bok tâm Ngih Bok Nau Tâm Rƀŭn

²⁷ jêh ri su ndơ ƀâu kah ta klơ nây di nâm nau Brah Yêhôva hŏ ntĭnh nti jêh ma Y-Môis.

²⁸ Păng nthăng đŏng bok ta mpông Ngih Bok.

²⁹ Păng dơm nơng ƀư brah nhhơr ndơ ƀư brah gŭch ta mpông Ngih Bok, jêng Ngih Bok Nau Tâm Rƀŭn jêh ri nhhơr ta klơ nây ndơ ƀư brah gŭch jêh ri ndơ ƀư brah rnih môi, di nâm nau Brah Yêhôva hŏ lah jêh ma Y-Môis.

³⁰ Păng dơm thŭng dak rao ta nklang Ngih Bok Nau Tâm Rƀŭn jêh ri nơng ƀư brah jêh nây nkhŭt dak ta nây gay rao.

³¹ Y-Môis, Y-Arôn jêh ri lĕ rngôch kon bu klâu păng rao jâng ti ta nây.

³² Lah khân păng lăp Ngih Bok Nau Tâm Rƀŭn tâm ban đŏng dôl hăn dăch nơng ƀư brah, khân păng rao lơi da dê di nâm nau Brah Yêhôva hŏ ntĭm nti jêh ma Y-Môis.

³³ Jŭm Ngih Bok jêh ri nơng ƀư brah, păng ndâk ndring ngih da dê jêh ri yông bok ta mpông ndring ngih. Pôri, Y-Môis hŏ ƀư lôch jêh lĕ nau kan.

Ndâr tŭk jêh ri nau chrêk rmah Brah Yêhôva

³⁴ Jêh nây geh du ndâr tŭk nkŭm Ngih Bok Nau Tâm Rƀŭn jêh ri nau chrêk rmah Brah Yêhôva bêng Ngih Bok.

³⁵ Y-Môis mâu dơi lăp ôh tâm Ngih Bok Nau Tâm Rƀŭn, yorlah ndâr tŭk nkŭm ta klơ; nau chrêk rmah Brah Yêhôva bêng ma Ngih Bok.

³⁶ Tâm lĕ nar khân păng hăn trong, ăp tơ̆ ndâr tŭk bơh Ngih Bok, phung ƀon lan Israel dâk hăn.

³⁷ Ƀiălah tơlah ndâr tŭk mâu ôh hao du klơ pôri khân păng mâu hŏ hăn ôh kŏ tât nar ndâr tŭk hao du klơ.

³⁸ Yorlah tâm lĕ nar khân păng hăn trong, ndâr tŭk Brah Yêhôva gŭ ta klơ Ngih Bok nôk nar jêh ri geh ŭnh tâm ndâr tŭk nôk măng tanăp măt lĕ rngôch ngih Israel.