Nau Ngluh Êjipt 4 - Nau Brah Ndu Ngơi 2023

Lĕ nau mbên khlay

¹ Y-Môis plơ̆ lah: “Ƀiălah, khân păng mâu mra iăt ôh jêh ri mâu iăt ro nau gâp ngơi, yorlah khân păng mra lah: ‘Brah Yêhôva mâu mâp ôh tâm mpơl đah may.’”

² Brah Yêhôva ôp: “Moh ndơ may djôt tâm ti?” Y-Môis lah: “Du mlâm mâng jra.”

³ Brah Yêhôva lah: “Ăn may klŭp lơi mâng ta neh.” Păng klŭp mâng jra ta neh jêh ri mâng jra nây jêng du mlâm bêh. Y-Môis nchuăt du bơh bêh.

⁴ Ƀiălah Brah Yêhôva lah ma Y-Môis: “Ăn may nto ti nhŭp chiăng păng.” Păng nto ti nhŭp bêh jêh ri bêh plơ̆ jêng mâng jra tâm ti păng.

⁵ Brah Yêhôva lah: “Nau nây gay ma khân păng rnơm ma Brah Yêhôva, Brah Ndu chô yau khân păng, jêng Brah Ndu Y-Abraham, Brah Ndu Y-Isăk, Brah Ndu Y-Yakôb, hŏ tâm mpơl jêh ma may.”

⁶ Brah Yêhôva lah tay ma Y-Môis: “Dơm ti may ta ntang ntơh.” Păng dơm ti păng tâm ntang ntơh, jêh ri dôl păng tŏk ti, aơ, ti păng mpơl phŭng, nglang nâm bu pler.

⁷ Jêh ri Brah Yêhôva lah: “Ăn may dơm ti tâm ntang ntơh may du tơ̆ đŏng.” Păng plơ̆ dơm ti tâm ntang ntơh, jêh ri lah păng tŏk ti bơh nây, aơ, mlay săk ti păng plơ̆ tay nâm ơm.

⁸ Brah Yêhôva lah tay: “Tơlah khân păng mâu iăt ôh ma may, mâu mra iăt đŏng ôh nau ngơi tă bơh nau mbên khlay tal nguay, klăp lah mra iăt ma nau mbên khlay tal bar.

⁹ Ƀiălah tơlah khân păng mâu iăt ôh lĕ bar ntil nau mbên khlay nây jêh ri mâu lĕ iăt tĭng nau may ngơi, ăn may sŏk dak bơh dak krong jêh ri nkhŭt ta neh sơh; dak may hŏ sŏk jêh bơh dak krong nây mra jêng mham klơ neh.”

Arôn ƀư bunuyh sâm ngơi ma Y-Môis

¹⁰ Y-Môis ngơi đah Brah Yêhôva: “Ơ! Kôranh Brah, bơh kăl e tât aƀaơ jêh ri nđâp ma nôk Kôranh Brah ngơi đah oh mon May, gâp jêng nơm mâu geh blau ngơi ueh, mbung mpiăt gâp ngơi khan.”

¹¹ Brah Yêhôva lah ma păng: “Mbu nơm njêng trôm mbung bunuyh? Mbu ăn bunuyh jêng mlo, jêng tê̆k, jêng dơi saơ, jêng chieh măt? Ơm mâu di Gâp, jêng Brah Yêhôva Nơm ƀư ndơ nây?

¹² Pôri aƀaơ ri ăn hăn hom, Gâp mra gŭ ndrel ma trôm mbung may jêh ri nti may lĕ nau may mra ngơi.”

¹³ Y-Môis ơh: “Ơ! Kôranh Brah, dăn Kôranh Brah đă nơm êng.”

¹⁴ Brah Yêhôva luh ji nuih ma Y-Môis, Păng lah: “Mâu di bơh Y-Arôn, bunuyh Lêvi, jêng nâu may ƀơh? Gâp gĭt păng geh blau ngơi ueh. Aơ, păng văch gay tâm mâp đah may; lah păng saơ may, păng mra geh nau maak ngăn tâm nuih n'hâm.

¹⁵ Ăn may ngơi đah nâu may, jêh ri dăp dơm rplay ngơi tâm trôm mbung păng. Gâp mra gŭ ndrel ma trôm mbung may nđâp ma trôm mbung nâu may jêh ri nti khân may moh ndơ mra ƀư.

¹⁶ Nâu may mra jêng nơm sâm ngơi ma may tanăp phung ƀon lan, jêng trôm mbung ăn ma may, bi may mra jêng nâm Brah Ndu ăn ma păng.

¹⁷ Ăn may djôt leo mâng jra aơ tâm ti gay ma dŏng ƀư lĕ nau mbên khlay.”

Y-Môis plơ̆ tay ta n'gor Êjipt

¹⁸ Y-Môis plơ̆ sĭt ta po păng, Y-Jêtrô, jêh ri lah: “Dăn ma may ăn gâp plơ̆ sĭt tay ma phung oh nâu gâp ta n'gor Êjipt gay uănh khân păng hôm gŭ rêh mâu lah khĭt jêh.” Y-Jêtrô lah ma Y-Môis: “Ăn may hăn đăp mpăn.”

¹⁹ Brah Yêhôva hŏ lah ma Y-Môis tâm n'gor Madian: “Plơ̆ sĭt hom ta n'gor Êjipt yorlah lĕ rngôch bunuyh joi gay ƀư mhĭk nau rêh may hŏ khĭt lĕ jêh.”

²⁰ Y-Môis n'hao ur păng jêh ri phung kon bu klâu păng hao klơ ndŭr kơi seh bri jêh ri hăn trong plơ̆ sĭt ta n'gor Êjipt. Păng djôt đŏng tâm ti păng mâng jra Brah Ndu.

²¹ Brah Yêhôva lah ma Y-Môis: “Lah may plơ̆ sĭt ta n'gor Êjipt, ăn may ƀư lĕ rngôch nau mbên khlay Gâp hŏ jao jêh tâm ti may gay ƀư tanăp Pharaôn. Ƀiălah Gâp mra ƀư ăn hađăch Êjipt dăng nuih n'hâm, mâu ăn ôh phung ƀon lan hăn.

²² Pôri ăn may lah đah Pharaôn pô aơ Brah Yêhôva lah: ‘Israel jêng kon Gâp, jêng kon bu klâu bôk rah Gâp.

²³ Rĭ dĭng Gâp lah ma may: Ăn kon Gâp hăn hom, gay ma păng dơi pah kan ma Gâp. Tơlah may dun mâu ăn ôh păng hăn, aơ, gâp mra nkhĭt kon bu klâu may deh dak bôk.’”

Y-Môis koh ntâu ma kon bu klâu păng

²⁴ Rŏ trong, ta du ntŭk ngih njưh, Brah Yêhôva tâm mpơl đah Y-Môis jêh ri joi nau gay ma nkhĭt păng.

²⁵ H'Sêpôra sŏk du mlâm pêh ƀư ma lŭ, koh ntâu ndơ bêk prêng kon bu klâu păng, jêh ri sŏk ntâu nây nđĭl ta jâng Y-Môis, jêh ri lah: “Nanê̆, may jêng sai mham ma gâp!”

²⁶ Brah Yêhôva yô̆ an ma Y-Môis. Yor nau koh ntâu aơ dĭng H'Sêpôra lah: “May jêng sai mham.”

Brah Ndu đă Y-Arôn vơt tâm mâp đah Y-Môis

²⁷ Brah Yêhôva lah ma Y-Arôn: “Hăn hom tât ta bri rdah gay vơt Y-Môis.” Y-Arôn hăn tâm mâp đah Y-Môis ta klơ yôk Brah Ndu jêh ri chŭm păng.

²⁸ Y-Môis nkoch tay ma Y-Arôn lĕ rngôch nau ngơi Brah Yêhôva đă păng ngơi jêh ri lĕ rngôch nau mbên khlay Brah Yêhôva đă păng ƀư.

²⁹ Y-Môis jêh ri Y-Arôn hăn kuăl rgum lĕ rngôch kôranh bu ranh ƀon lan Israel.

³⁰ Y-Arôn nkoch tay lĕ rngôch nau Brah Yêhôva hŏ ngơi jêh đah Y-Môis, jêh ri ƀư lĕ nau mbên khlay tanăp phung ƀon lan.

³¹ Phung ƀon lan rnơm. Dôl khân păng tăng Brah Yêhôva hŏ khâl jêh phung ƀon lan Israel nđâp hŏ saơ jêh nau rêh ni khân păng, khân păng kŭnh bôk jêh ri yơk mbah.