Nau Ngluh Êjipt 39 - Nau Brah Ndu Ngơi 2023

Bok ao nkrơ̆ ma phung kôranh ƀư brah

¹ Khân păng sŏk brai ĭr, brai chăng krăk jêh ri brai sut gay ƀư bok ao ma nau nê̆ ueh ngăn prăp ma nau pah kan tâm Ntŭk Kloh Ueh. Khân păng jĭm bok ao kloh ueh ma Y-Arôn nâm nau Brah Yêhôva hŏ ntĭm nti jêh ma Y-Môis.

Êphôt

² Khân păng ƀư êphôt ma rse brai mhay rhên, brai chrêk, brai ĭr, brai chăng krăk jêh ri brai sut.

³ Khân păng chiăr mah jêng du rlat n'hơ jêh ri koh ăn jêng brai, gay tanh breh ndrel ma rse brai mhay rhên, brai ĭr, brai chăng krăk jêh ri brai sut, ƀư ma nau ueh ngăn.

⁴ Khân păng jĭm ƀư bok nkŭm săng nglik ma êphôt, nkrêp ta bar bôk ao êphôt.

⁵ Rse rêt padih êphôt bu jĭm ăn tâm ban jêh ri ntil brai tâm ban êphôt, jêng rse brai chrêk, brai mhay rhên, brai ĭr, brai chăng krăk jêh ri brai sut, nâm bu Brah Yêhôva hŏ ntĭnh jêh ma Y-Môis.

⁶ Khân păng ndrăp lĕ găr ônik, tor kach tâm ndor năp ma mah jêh ri nsêr amoh phung kon bu klâu Y-Israel ta klơ lĕ găr lŭ khlay nâm bu nsêr ndơ tâp pŏng.

⁷ Khân păng nkrêp lĕ găr lŭ khlay nây ta bok nkŭm săng nglik êphôt nâm bu găr lŭ khlay ndray ma phung kon bu klâu Y-Israel, tĭng nâm nau Brah Yêhôva hŏ ntĭnh jêh ma Y-Môis.

Blah văn ntang ntơh

⁸ Khân păng ƀư đŏng ndơ văn ntang ntơh nau nê̆ ueh ngăn nâm bu nau kan êphôt, jêng ƀư ma brai chrêk, brai mhay rhên, brai ĭr, brai chăng krăk jêh ri brai sut.

⁹ Ndơ văn ntang ntơh geh rup blon jêh ri jĭm ndop bar blah, jong du nđam ti, dĭ du nđam ti.

¹⁰ Khân păng tâm lĭr ta klơ blah nây puăn mbor lŭ khlay: mbor tal nguay jêng găr karnêlian, găr tơpas jêh ri găr êmêrôt;

¹¹ mbor tal bar jêng găr êskabuk, găr saphir jêh ri găr diamôn;

¹² mbor tal pe jêng găr ôpal, găr agat jêh ri găr amêtis;

¹³ mbor tal puăn jêng găr bêril, găr ônik, găr jaspidi. Lĕ găr lŭ khlay nây bu nkrêp tâm ndor năp ma mah.

¹⁴ Lĕ rngôch lŭ khlay nây jêng jât ma bar găr, tĭng nâm amoh phung kon bu klâu Y-Israel. Ăp găr lŭ khlay bu chrăk amoh du tâm jât ma bar ndŭl mpôl phung Israel, tâm ban bu chrăk ndơ tâp pŏng nây đŏng.

¹⁵ Ta klơ ndơ văn ntang ntơh, khân păng ƀư ma rse mah rhên ma mah chrêk buănh ƀăr tâm ban rse ndrăn.

¹⁶ Khân păng ƀư đŏng bar ndor năp nsêr jêh ri bar rval ma mah, jêh nây nkrêp bar rval nây ta bar njônh klơ ndơ văn ntang ntơh.

¹⁷ Khân păng nsro bar rse mah nây tâm bar rval ta njônh klơ ndơ văn ntang ntơh

¹⁸ jêh ri nkrêp ta bar bôl ri bar rse mah rhên tâm ndor năp nsêr, jêng nkrêp mpeh panăp bok nkŭm săng nglik êphôt.

¹⁹ Jêh nây khân păng ƀư bar rval ma mah êng jêh ri lĭr khân păng ta bar njônh ta nâm ndơ văn ntang ntơh, mpeh tâm êphôt.

²⁰ Khân păng hôm ƀư tay bar mlâm rval mah êng đŏng jêh ri nkrêp khân păng panăp mpeh ta nâm bok nkŭm săng nglik êphôt, ta ntŭk n'har tâm mâp ta klơ rse rêt êphôt.

²¹ Khân păng sŏk du rse ĭr kât lĕ rval ndơ văn ntang ntơh đah rval êphôt, kơt nây ndơ văn ntang ntơh nkrêp đah rse rêt êphôt, mâu tŭp ôh bơh êphôt nâm nau Brah Yêhôva hŏ ntĭnh jêh ma Y-Môis.

Ao jong jêh ri lĕ bok ao krơ̆ êng

²² Păng ƀư đŏng ao jong êphôt ma brai ĭr da dê.

²³ Trô ko ao jong ăn ta nklang nâm bu trô ko ao loih jêh ri geh ƀư năp văr jŭm gay mâu ăn sat ôh.

²⁴ Rŏ bôl ao, khân păng ntăm play pom gra nat ma rse mhay rhên, brai ĭr, brai chăng krăk jêh ri chăng rhưch,

²⁵ jêh ri ƀư âk rlêm jê̆ ma mah chrêk nkrêp tâm nsrah ta nklang bar play pom gra nat, ƀoi rŏ pĭt bôl ao,

²⁶ nâm ntĭt tâm du play pom gra nat ăn geh du mlâm rlêm jêh nây du play pom gra nat ntăm jŭm pĭt bôl ao prăp ma pah kan, tĭng nâm nau Brah Yêhôva hŏ ntĭnh jêh ma Y-Môis.

²⁷ Khân păng tanh đŏng ao ta nâm ma bok mhay rhên ăn Y-Arôn jêh phung kon bu klâu păng

²⁸ nđâp ma môk, kưn jêh ri kho gleh; lĕ rngôch ƀư ma bok mhay rhên da dê.

²⁹ Rse vân bŭt cheh dơi nau nê̆ ueh ngăn ma rse mhay rhên, brai ĭr, brai chăng krăk jêh ri brai sut nâm nau Brah Yêhôva hŏ ntĭnh jêh ma Y-Môis.

³⁰ Khân păng ƀư đŏng du pŏk jê̆ nâm bu rup đon hađăch kloh ueh ma mah chrêk, chrăk klơ nây lĕ rplay samƀŭt: “KLOH UEH MA BRAH YÊHÔVA” tâm ban ma bu chrăk ndơ tâp pŏng,

³¹ jêh nây bu kât pŏk jê̆ nây ma du rse ĭr, gay ma nâp ta klơ môk, nâm nau Brah Yêhôva hŏ ntĭnh jêh ma Y-Môis.

Lôch jêh nau kan

³² Pôri, lĕ rngôch kan Ngih Bok, jêng Ngih Bok Nau Tâm Rƀŭn, hŏ lôch jêh. Phung ƀon lan Israel hŏ ƀư jêh lĕ nau kan tĭng nâm nau Yêhôva hŏ ntĭnh jêh ma Y-Môis.

³³ Khân păng njŭn leo Ngih Bok ma Y-Môis: ngih bok jêh ri lĕ ndơ dŏng ma ngih bok, ndơ nklĕ, kađar, mâng nđăng, meh jêh ri trôm meh;

³⁴ bok nkŭm ma ntâu biăp nkuăng nhom chăng, bok nkŭm ma ntâu ka toyh jêh ri blah bok nkŭm Ntŭk Dŭt Kloh Ueh,

³⁵ Hip Nau Tâm Rnglăp geh mâng tung, jêh ri ndrŭp nau yô̆;

³⁶ sưng jêh ri ndơ dŏng ma sưng jêh ri piăng let nhhơr;

³⁷ jâng kađen ma mah chrêk dĭng kađen hŏ dăp jêh, lĕ ndơ dŏng jâng kađen jêh ri dak pring mpoh ŭnh kađen,

³⁸ nơng ƀư brah ma mah, dak ƀâu kah mhĭng, ndơ ƀâu kah, blah bok ta mpông ngih bok;

³⁹ nơng ƀư brah ma kông jêh ri pŏk dreh ma kông, mâng tung, lĕ ndơ dŏng ma nơng ƀư brah; thŭng dak jêh ri jâng thŭng dak;

⁴⁰ lĕ blah bok rjai ta ndring ngih, n'gâng trôm n'gâng jêh ri bok ta ndring ngih, rse, mâng pêr, jêh ri lĕ rngôch ndơ dŏng ma nau kan ndơ ƀư brah ta Ngih Bok jêh ri Ngih Bok nau tâm rƀŭn;

⁴¹ lĕ bok ao ƀư ma ndơ tanh prăp ma nau pah kan tâm Ntŭk Kloh Ueh, bok ao kloh ueh ma kôranh ƀư brah Y-Arôn jêh ri lĕ bok ao ma phung kon bu klâu păng gay ƀư ma nau pah kan ndơ ƀư brah.

⁴² Phung ƀon lan Israel hŏ ƀư lôch jêh lĕ rngôch kan nây tĭng nâm lĕ nau Brah Yêhôva hŏ ntĭnh jêh ma Y-Môis.

⁴³ Y-Môis treng uănh lĕ rngôch nau kan jêh ri aơ khân păng hŏ lôch jêh nau nây tĭng nâm nau Brah Yêhôva ntĭm nti jêh. Pôri Y-Môis ăn nau ueh uĭn ma khân păng.