Nau Ngluh Êjipt 37 - Nau Brah Ndu Ngơi 2023

Nau Ƀư Hip Nau Tâm Rnglăp

¹ Y-Bêsalel ƀư du mlâm hip ma si akasi jong du rhiăng jât centimet, dĭ prao jât prao centimet jêh ri prêh prao jât prao centimet.

² Păng mblum ma mah kloh tâm trôm nđâp ma padih jêh ri ƀư năp jŭm ma mah văr jŭm hip.

³ Păng lôk puăn mlâm rval ma mah lĭr nkrêp ta puăn njônh: bar rval ma đah aơ, bar rval ma đah ri.

⁴ Păng ƀư đŏng mâng tung ma si akasi ndop ma mah,

⁵ jêh nây nsro mâng tung tâm lĕ rval ma bar ding gay tung hip.

Ƀư ndrŭp nau yô̆

⁶ Păng ƀư đŏng du mlâm ndrŭp nau yô̆ ma mah chrêk jong du rhiăng jât centimet, dĭ prao jât prao centimet.

⁷ Jêh nây păng ƀư bar chêrubim ma mah chiăr n'hơ, dơm tâm bar bôl ndrŭp nau yô̆:

⁸ du mlâm chêrub ta bôk aơ jêh ri du mlâm chêrub ta bôk ri, nkrêp đah bar bôk ndrŭp.

⁹ Bar chêrubim lĭ bar đah nting năr nkŭm ndrŭp nau yô̆. Muh măt tâm thâng muh măt, phung chêrubim tâm rle năp đah ndrŭp nau yô̆.

Ƀư sưng gay dơm piăng let nhhơr

¹⁰ Păng ƀư đŏng du mlâm sưng ma si akasi, jong pham jât pham centimet, dĭ puăn jât puăn centimet jêh ri prêh prao jât prao centimet,

¹¹ mblum ma mah chrêk jêh ri ƀư du năp văr jŭm ma mah.

¹² Păng pâng đŏng ndrĭp văr jŭm sưng prêh klăp lah puăn nglau ti jêh ri ƀư năp jŭm ma mah tĭng ndrĭp nây.

¹³ Păng lôk puăn rval ma mah nkrêp ta puăn njônh, ta ntŭk geh puăn jâng sưng.

¹⁴ Lĕ rval nkrêp dăch ta mbong gay nsro mâng tung.

¹⁵ Păng ƀư lĕ mâng tung ma si akasi mblum ma mah gay tung sưng nây.

¹⁶ Păng sŏk đŏng mah chrêk gay ƀư lĕ ndơ dŏng dơm ta klơ sưng nâm bu: ngan pala, ngan jam, nhhơr ndơ ƀâu kah, yăng jêh ri khăl gay ƀư ndơ nhhơr nhêt.

Ƀư jâng kađen

¹⁷ Păng ƀư đŏng jâng kađen ma mah chrêk; mbŭm jêh ri tơm jâng kađen ma mah chiăr n'hơ, mbôm kađen, rmlom kađen, jêh ri năr kao kađen nkrêp lăp ta jâng kađen da dê.

¹⁸ Geh prao n'gĭng rtah đang luh bar đah ding jâng kađen, pe n'gĭng đah aơ jêh ri pe n'gĭng đah ri.

¹⁹ Tâm prao n'gĭng rtah luh bơh jâng kađen nây, klơ ăp n'gĭng geh pe mbôm kađen jêng rup kao play amandê đah rmlom kađen jêh ri năr kao kađen.

²⁰ Ta klơ jâng kađen geh đŏng puăn mlâm mbôm kađen rup kao play amandê đah rmlom kao jêh ri năr kao kađen.

²¹ Tâm prao mlâm n'gĭng rtah luh bơh jâng kađen, tâm dâng bar mlâm n'gĭng nkrêp du rmlom kađen.

²² Lĕ rmlom kađen jêh ri lĕ n'gĭng jâng kađen nkrêp đah jâng kađen; lĕ rngôch ndơ nây ƀư ma mah chrêk chiăr n'hơ.

²³ Păng ƀư đŏng pơh mlâm ŭnh kađen, katrei nkăp brai ŭnh kađen jêh ri khăl dơm buh ƀư ma mah chrêk.

²⁴ Păng dŏng du talâng mah chrêk gay ƀư jâng kađen jêh ri lĕ ndơ dŏng ƀaƀă.

Ƀư nơng ƀư brah gŭch ndơ ƀâu kah

²⁵ Păng ƀư đŏng du nơng ƀư brah gŭch ndơ ƀâu kah ma si akasi rup blon, ăp rup njônh puăn jât puăn centimet jêh ri prêh pham jât pham centimet; lĕ nke nkrêp đah nơng ƀư brah.

²⁶ Ăn may ndop đŏng ma mah chrêk nơng ƀư brah, ta klơ ndap nơng ƀư brah, puăn njônh văr jŭm, lĕ nke ma mah chrêk jêh ri ƀư năp văr jŭm ma mah.

²⁷ Tâm dâng năp nây, păng nkrêp bar rval ma mah ma bar ding nơng ƀư brah gay nsro mâng tung.

²⁸ Păng ƀư mâng tung nây ma tơm si akasi ndop ma mah.

Dak ƀâu kah kloh ueh jêh ri ndơ n'hôl ƀâu kah

²⁹ Păng lŭk lai đŏng dak ƀâu kah kloh gay mhĭng, jêh ri ndơ ƀâu kah njŭng tĭng nâm nau vay lŭk lai ndơ ƀâu kah.