Nau Ngluh Êjipt 36 - Nau Brah Ndu Ngơi 2023

¹ Y-Bêsalel, Y-Ôhôliap jêh ri lĕ phung blau ti Brah Yêhôva hŏ ăn jêh nau blau jêh ri nau gĭt blau rbăng gay dơi ƀư nau kan ndâk njêng Ngih Brah Kloh Ueh di đah lĕ nau Brah Yêhôva hŏ ntĭnh jêh.

Ƀon lan Israel nhhơr âk rmeh

² Pôri Y-Môis kuăl Y-Bêsalel, Y-Ôhôliap jêh ri lĕ rngôch phung bunuyh geh ti blau, Yêhôva hŏ dơm jêh tâm nuih n'hâm nau blau mĭn, nđâp ma lĕ phung geh nuih n'hâm rŏng gay khân păng hăn pah kan.

³ Tanăp măt Y-Môis, khân păng sŏk dơn lĕ rngôch ndơ nhhơr bơh phung ƀon lan Israel hŏ njŭn jêh prăp ma nau kan ndâk njêng Ngih Brah Kloh Ueh. Ƀiălah, yorlah ăp ôi phung ƀon lan ăt njŭn tât đŏng ndơ nhhơr

⁴ yor ri lĕ phung bunuyh gĭt blau dôl ƀư lĕ nau kan ma Ngih Brah Kloh Ueh, khăn păng gŭ nsrŭng.

⁵ Khân păng hăn tâm mâp đah Y-Môis jêh ri lah: “Phung ƀon lan hăn njŭn lĕ rlau ĭr ma nau kan Yêhôva ntĭnh jêh mra ƀư.”

⁶ Yor ri, Y-Môis mra ntăm ma khân păng mbơh ăn lam rmlak tahan: “Ăn lĕ rngôch bu klâu nđâp bu ur tâm ban đŏng, lơi hôm nhhơr tay ôh ndơ ma nau kan ndâk njêng Ngih Brah Kloh Ueh!” Pôri bu lĕ buay mâu hôm ăn phung ƀon lan njŭn tay ndơ nhhơr;

⁷ yorlah ndơ khân păng geh lĕ tŏng jêh, nđâp lơ hô rmeh ir tâm lĕ nau kan.

Ndâk Ngih Bok

⁸ Tâm rnoh lĕ phung ƀư kan, mbu phung blau ti hăn ƀư Ngih Bok da dê. Khân păng tanh jât blah bok ma rse mhay rhên, brai ĭr, brai chăng krăk jêh ri brai sut, geh cheh rup chêrubim ma nau nê̆ ueh ngăn.

⁹ Ăp blah bok jong klăp lah jât ma bar met, dĭ bar met; lĕ rngôch blah bok nây geh du rnâng tâm ban da dê.

¹⁰ Khân păng ndop ăp prăm blah bok nching tâm mâp ndrel;

¹¹ rêt rvang ma brai ĭr ta rmăn blah bok ta lôch ntŭk tâm blah bok tal nguay; jêh ri ƀư kơt nây ta rmăn blah bok lôch ntŭk tâm blah bok tal bar.

¹² Khân păng rêt prăm jât rvang ta bôl blah bok tal nguay jêh ri prăm jât rvang ta bôl blah bok dăch dŭt blah bok tal bar; lĕ rvang ăn tâm di ndrăng păng.

¹³ Khân păng ƀư đŏng prăm jât ndơ nklĕ ma mah, jêh nây nklĕ nkep nsum lĕ blah bok tâm mâp ndrel gay Ngih Bok thoi jêng nguay.

¹⁴ Khân păng thoi đŏng jât ma nguay blah bok ma rsau be jêng bok nkŭm ta klơ Ngih Bok.

¹⁵ Ăp blah bok jong klăp lah jât mpe met, dĭ klăp lah bar met; lĕ jât ma nguay blah bok nây geh du rnâng tâm ban.

¹⁶ Khân păng thoi êng êng lĕ blah bok aơ jêng bar gu: du gu geh prăm blah jêh ri du gu geh prao blah bok.

¹⁷ Khân păng rêt prăm jât rse trôm ntôr ta bôl blah bok kêng dŭt ntŭk thoi bok tal nguay, jêh ri păng ƀư prăm jât rse trôm ntôr ta bôl ntŭk thoi tal bar;

¹⁸ khân păng ƀư đŏng prăm jât ndơ nklĕ ma kông gay tâm thoi bar gu bok nkŭm tâm mâp ndrel ƀư Ngih Bok jêng nguay.

¹⁹ Khân păng ƀư đŏng du blah bok nkŭm ma ntâu biăp nkuăng mhĭng dak chăng jêh ri du blah bok nkŭm ma ntâu ka toyh gay nkŭm padih.

²⁰ Khân păng ndâk mpir Ngih Bok ma plơp kađar ma tơm si akasi.

²¹ Ăp plơp kađar jong klăp lah puăn met, dĭ klăp lah prao jât ma prao centimet.

²² Tâm ăp plơp kađar geh bar bôk tâm lăp gay tâm ntrŭp tâm mâp ndrel. Lĕ rngôch plơp kađar tâm mpir Ngih Bok ƀư đŏng kơt nây da dê.

²³ Păng ƀư mpir ma Ngih Bok tâm ban kơt dja: bar jât plơp kađar mpeh pa dâng;

²⁴ ta nâm bar jât plơp kađar nây khân păng ƀư puăn jât trôm rval ma prăk, ta nâm ăp plơp kađar geh bar trôm tâm di ma bar trôm rval tâm ntrŭp, jêh ri bar trôm rval tâm dâng plơp kađar thoi mra tâm di đah bar trôm rval tâm ntrŭp plơp kađar jêh nây.

²⁵ Meh du ding, jêng mpeh pa lơ Ngih Bok, khân păng ƀư đŏng bar jât plơp kađar

²⁶ jêh ri puăn jât trôm rval ma prăk; ta nâm ăp plơp kađar geh bar mlâm trôm rval da dê, jêh ri ta mâm plơp kađar tâm thoi geh đŏng bar trôm rval.

²⁷ Du ding mpeh pakơi Ngih Bok, jêng mpeh ma nhâp nar, khân păng ƀư prao plơp kađar;

²⁸ ta bar njônh pakơi Ngih Bok khân păng ƀư bar plơp kađar.

²⁹ Bar plơp kađar nây jêng ntrŭp ndrel bơh tâm dâng tât ta klơ, ta ntŭk rval tal nguay. Lĕ bar njônh khân păng ƀư kơt nây da dê.

³⁰ Yor ri, geh pham plơp kađar jêh ri jât mprao trôm rval ma prăk; ta nâm ăp plơp kađar geh bar trôm rval.

³¹ Khân păng ƀư đŏng lĕ mâng nđăng ma si akasi: prăm mâng nđăng ma lĕ plơp kađar ma đah aơ Ngih Bok,

³² prăm mâng nđăng ma lĕ plơp kađar ta đah ri Ngih Bok jêh ri prăm mâng nđăng êng đŏng ma pakơi Ngih Bok, jêng ma mpeh nhâp nar.

³³ Khân păng ƀư mâng nđăng ta nklang ta n'gul klơ lĕ plơp kađar gay nđăng tă bơh bôk đah aơ tât bôl đah ri.

³⁴ Khân păng mblum ma mah lĕ plơp kađar jêh ri ƀư lĕ rval ma mah prăp nsro lĕ mâng nđăng; lĕ mâng nđăng mblum ma mah.

³⁵ Khân păng ƀư đŏng du blah bok ma rse mhay rhên, brai ĭr, brai chăng krăk jêh ri brai sut, cheh rup chêrubim ma nau nê̆ ueh ngăn;

³⁶ jêh nây ndâk ma blah bok nây puăn mlâm n'gâng ma si akasi mblum ma mah, lĕ ndơ nklĕ n'gâng ma mah jêh ri lôk puăn mlâm trôm n'gâng ma prăk ăn ma puăn mlâm n'gâng nây.

³⁷ Khân păng tanh đŏng du bok ta mpông ngih bok ma rse mhay rhên, brai ĭr, brai chăng krăk jêh ri chăng rhưch, cheh ma nau ueh ngăn.

³⁸ Khân păng hôm ƀư prăm n'gâng geh nklĕ jêh nây mblum ma mah tâm ăp bôl n'gâng jêh ri lĕ mâng nđăng tâm thoi ndrel, hôm ma prăm trôm n'gâng ƀư ma kông.