Nau Ngluh Êjipt 34 - Nau Brah Ndu Ngơi 2023

Kôranh Brah ăn rlat nau vay mhe

¹ Brah Yêhôva ngơi ma Y-Môis: “Trah hom bar rlat lŭ nâm bu bar rlat alor, jêh nây Gâp mra nchih ta klơ bar rlat aơ lĕ nau ngơi hŏ geh ta klơ bar rlat may mbang nchah lơi jêh.

² Ôi taơ, rơm ndrăp hom. Bơh ơm ôi, hao hom yôk Sinai jêh ri dâk tanăp Gâp ta klơ n'gơn yôk nây.

³ Lơi ăn ôh geh bunuyh hao ndrel ma may, mâu lĕ ăn geh bunuyh dơi brô̆ lam klơ yôk; nđâp ma biăp, ndrôk sa gơ̆ mpeh panăp yôk nây.”

⁴ Y-Môis trah bar rlat lŭ nâm bu bar rlat alor. Păng dâk ơm ôi, ti djôt bar rlat lŭ hăn hao klơ yôk Sinai, tĭng nâm nau Brah Yêhôva hŏ ntĭm nti jêh.

Brah Ndu mpơl ma Y-Môis

⁵ Brah Yêhôva jŭr tâm ndâr tŭk, dâk ta meng Y-Môis jêh ri rnha amoh Păng jêng Yêhôva.

⁶ Brah Yêhôva hăn rgăn panăp păng jêh ri mbơh: “Yêhôva! Yêhôva! Jêng Brah Ndu geh nau ueh, yô̆ nđach, Mâu gơnh ji nuih ôh, Rmeh ler nau ueh uĭn jêh ri nau n'hêl nanê̆ ngăn,

⁷ Djôt prăp nau rŏng kŏ tât rbăn rô̆ nuyh, Yô̆ an nau djơh mhĭk, nau ƀư tih jêh ri nau tih; Ƀiălah mâu kơp nơm geh nau tih ôh jêng mâu geh nau tih, Ƀiălah yor nau tih phung chô yau mra rmal ma phung kon sau kŏ tât pe, puăn rô̆ nuyh.”

⁸ Y-Môis kŭnh ndal bôk ta neh jêh ri yơk mbah.

⁹ Păng ngơi: “Ơ Kôranh Brah! Tơlah gâp geh nau yô̆ tanăp măt Kôranh Brah, dăn Kôranh Brah hăn ndrel hên. Nđâp lah aơ jêng phung ƀon lan dăng ko, dăn Kôranh Brah yô̆ an ma nau djơh mhĭk jêh ri nau tih hên jêh ri dơn hên jêng drăp ndơn Kôranh Brah.”

Nau Tâm Rnglăp

¹⁰ Brah Yêhôva ngơi: “Aơ, Gâp ƀư du nau tâm rnglăp tanăp lĕ rngôch phung ƀon lan may lĕ kan khlay hâu ngăn, lĕ nau kan ê hŏ mâp ƀư tâm neh ntu mâu lah tâm du bri dak. Lĕ rngôch ntil mpôl bunuyh gŭ jŭm may mra saơ nau kan bơh Brah Yêhôva, yorlah Gâp bơi ƀư du nau kan ma may jêng du nau klach krit ngăn.

¹¹ Njrăng hom ma nau gâp ntĭnh ma may nar aơ. Aơ, Gâp mra nsot tă bơh tanăp khân may phung Amôrit, phung Kanaan, phung Hitit, phung Pêrisit, phung Hivit, jêh ri phung Jêbusit.

¹² Njrăng hom, lơi ƀư nau tâm rnglăp đah phung ƀon lan gŭ tâm n'gor khân may mra lăp, klach lah khân păng mra jêng dăk sân ma may.

¹³ Ƀiălah ăn khân may ƀư rai lơi nơng ƀư brah, mbang nchah rai lĕ n'gâng mbah jêh ri kăl lơi lĕ rup khân păng.

¹⁴ Lơi yơk mbah ôh ma brah êng, yorlah Brah Yêhôva, amoh Păng jêng Nơm blau ntôn; nanê̆ Păng jêng Brah Ndu blau ntôn.

¹⁵ Mâu dơi ƀư nau tâm rnglăp đah phung ƀon lan gŭ tâm n'gor nây, klach lah tơlah khân păng ƀư nau văng tĭr đah lĕ brah jêh ri ƀư brah ma lĕ brah khân păng jêh nây jă khân may jêh ri khân may mra sa ndơ khân păng ƀư brah ma rup brah.

¹⁶ Mâu đŏng dơi nđăp kon bu ur khân păng ma phung kon bu klâu khân may, klach lah phung kon bu ur khân păng ƀư nau văng tĭr đah phung brah jêh ri nsŭk phung kon bu klâu khân may ƀư nau văng tĭr đah phung brah khân păng.

¹⁷ May mâu dơi tŏ rup brah.”

Lĕ yan nau rƀŭn toyh tâm năm

¹⁸ “Ăn may kah gĭt prăp nau rƀŭn Piăng Let Mâu Geh Ndrui. Nâm bu Gâp hŏ ntĭm nti jêh ma khân may sa piăng let mâu geh ndrui dôl tâm pơh nar ta yan hŏ nal jêh tâm khay Abip, yorlah tâm khay Abip khân may luh bơh n'gor Êjipt.

¹⁹ Lĕ rngôch kon dak bôk jêng ndơ Gâp; lĕ rngôch kon nkuăng tâm mpôl mpô mpa khân may, mâu lah ndrôk mâu lah biăp bôk rah, đŏng kơt nây.

²⁰ Ăn may chuai seh bri dak bôk đah du mlâm biăp kon mâu lah be kon. Tơlah mâu chuai ăn may juet lơi trô ko. Chuai hom lĕ rngôch phung kon bu klâu bôk rah may nơm. Lơi ăn du huê hăn tanăp măt Gâp ma ti dơm ôh.

²¹ Ăn may pah kan tâm prao nar, ƀiălah tâm nar tal bơh ăn may rlu nđâp lah dôl jik kai mâu lah yan kăch.

²² Ăn khân may djôt prăp nau rƀŭn Lĕ Pơh ma play kao bôk yan kăch ba ƀlê, jêh ri nau rƀŭn Roih ta lôch năm.

²³ Ăp năm pe tơ̆, ăn lĕ rngôch phung bu klâu tâm mpơl tanăp măt Yêhôva Brah Ndu da dê jêng Brah Ndu phung Israel.

²⁴ Yorlah Gâp mra nsot phung băl mpôl bơh panăp may jêh ri ƀư dĭ n'har bri may; mâu lĕ bu mra kơnh ma n'gor may dôl may hăn nhhơ tanăp Yêhôva Brah Ndu may ăp năm pe tơ̆.

²⁵ May mâu dơi nhhơr ma Gâp mham mpa ƀư brah nsum ma piăng let geh ndrui; mâu dơi đŏng djôt mpa ƀư brah Rƀŭn Nau Găn tât ang ôi.

²⁶ Ăn may nhhơr play dak bôk dŭt ueh bơh neh may lăp tâm ngih Brah Yêhôva Brah Ndu. May mâu dơi gâm ôh be tâm dak toh me păng.”

²⁷ Brah Yêhôva ngơi đŏng Y-Môis: “Nchih hom nau aơ yorlah bơh nâm lĕ nau ngơi aơ dĭng Gâp ƀư nau tâm rnglăp đah may jêh ri đah phung Israel.”

²⁸ Y-Môis gŭ ta nây ndrel ma Brah Yêhôva tâm puăn jât nar jêh ri puăn jât măng, păng mâu sa ƀănh, mâu lĕ nhêt dak. Brah Yêhôva nchih ta bar rlat lŭ lĕ nau ngơi nau tâm rnglăp, jêng Jât Ntil Nau Vay Ntăm.

Y-Môis djôt bar Rlat Nau Tâm Rnglăp jŭr tă bơh yôk

²⁹ Lah Y-Môis djôt bar Rlat Nau Tâm Rnglăp tâm ti păng hăn jŭr tă bơh yôk Sinai, Y-Môis mâu gĭt ôh ma ntâu muh măt păng nchrat ang yorlah păng lĕ dơi tâm ngơi jêh ndrel ma Brah Yêhôva.

³⁰ Y-Arôn tâm ban đŏng lĕ rngôch phung ƀon lan Israel uănh Y-Môis, saơ ntâu muh măt păng nchrat ang, khân păng klach jêh ri mâu nănh văch êp ta Y-Môis.

³¹ Ƀiălah Y-Môis kuăl khân păng. Y-Arôn jêh ri lĕ rngôch phung kôranh n'gâng tâm phung tâm rƀŭn plơ̆ tay; Y-Môis ngơi đah khân păng.

³² Jêh nây, lĕ rngôch phung ƀon lan Israel hăn êp păng; păng ntĭnh ma phung khân păng lĕ nau vay ntăm ƀơh Brah Yêhôva hŏ lah jêh ma păng ta klơ yôk Sinai.

³³ Tơlah Y-Môis lôch jêh ngơi ndrel đah khân păng, păng sŏk ro bok nkŭm muh măt păng.

³⁴ Ƀiălah ăp tơ̆ Y-Môis hăn văch tanăp Brah Yêhôva gay ngơi đah păng, păng sŏk lơi bok nkŭm kŏ tât nôk păng luh padih, jêh ri nkoch tay ma phung ƀon lan Israel lĕ nau Brah Yêhôva lah jêh ma păng.

³⁵ Nôk nây, phung ƀon lan Israel saơ muh măt Y-Môis chrat ang rĭ dĭng Y-Môis sŏk bok nkŭm muh măt kŏ tât nôk păng lăp ŭch ngơi đah Brah Yêhôva.