Nau Ngluh Êjipt 32 - Nau Brah Ndu Ngơi 2023

Ndrôk kon ma mah

¹ Lah phung ƀon lan saơ Y-Môis gŭ ta klơ yôk jŏ ngăn ê hŏ trŭnh, khân păng rƀŭn ndrel jŭm Y-Arôn jêh ri ngơi: “Kay lŏng! Ăn may ƀư ma he lĕ phung brah hăn panăp he, yorlah phung hên mâu gĭt ôh moh nau hŏ tât ma Y-Môis, nơm hŏ ngluh jêh he luh bơh n'gor Êjipt.”

² Y-Arôn đă khân păng: “Doh lơi hom lĕ thek ma mah mblo ta tôr ur, kon bu klâu, bu ur khân may, jêh ri kon bu ur khân may, jêh nây ndơ̆ ăn ma gâp.”

³ Lĕ rngôch phung ƀon lan doh thek mah ta klơ tôr khân păng jêh ri ndơ̆ ăn ma Y-Arôn.

⁴ Ăn Y-Arôn dơn mah bơh ti khân păng, păng sŏk ndơ dŏng tŏ njêng rup du mlâm ndrôk kon. Phung ƀon lan lah: “Ơ phung Israel! Aơ jêng brah khân may, nơm ngluh jêh khân may bơh n'gor Êjipt.”

⁵ Lah Y-Arôn saơ nau nây, păng ndâk du mlâm nơng ƀư brah panăp ndrôk kon nây jêh nây păng nter mbơh: “Ôi taơ bu mra geh nar rƀŭn ma Brah Yêhôva!”

⁶ Ôi taơ phung ƀon lan dâk ơm ôi, nhhơr lĕ ndơ ƀư brah gŭch jêh ri ndơ ƀư brah ma nau đăp mpăn. Khân păng gŭ sông sa nhêt, Jêh nây dâk pâl ntalơ̆.

⁷ Brah Yêhôva lah ma Y-Môis: “Jŭr hom, yorlah phung ƀon lan may ngluh jêh bơh n'gor Êjipt hŏ mhĭk jêh.

⁸ Khân păng hŏ chalơi ndal trong Gâp hŏ ntĭm nti jêh, tŏ njêng jêh ma khân păng nơm du mlâm rup ndrôk kon, yơk mbah ma rup nây, nhhơr ndơ ƀư brah ma păng jêh ri lah: ‘Ơ phung Israel! Aơ jêng brah hŏ ngluh jêh khân may luh bơh n'gor Êjipt!’”

⁹ Yêhôva lah đŏng ma Y-Môis: “Gâp hŏ uănh saơ jêh phung ƀon lan aơ, jêng du phung ƀon lan dăng ko.

¹⁰ Pôri aƀaơ, lơi kđôi Gâp be, gay ma Gâp hao nau ji nuih jêh ri gâp ƀư rai khân păng. Ƀiălah Gâp mra ƀư ma may jêng du mpôl băl toyh.”

¹¹ Y-Môis kuăl vơl ma Yêhôva Brah Ndu păng: “Ơ Brah Yêhôva, mâm ƀư Brah Ndu hao nau ji nuih đah phung ƀon lan May, jêng phung ƀon lan May hŏ dŏng nau brah dŭt toyh jêh ri ti nau dăng ngluh khân păng luh bơh n'gor Êjipt?

¹² Mâm ƀư ăn phung Êjipt mra lah: ‘Kôranh Brah ŭch ngluh jêh khân păng luh bơh n'gor aơ gay nkhĭt lơi khân păng tâm yôk, jêh ri ƀư rai khân păng bơh neh ntu’? Dăn Kôranh Brah bah ji nuih jêh ri chalơi nau mĭn ŭch ƀư nau mhĭk ma phung ƀon lan May.

¹³ Dăn Kôranh Brah kah gĭt tay ma Y-Abraham, Y-Isăk jêh ri Y-Israel, jêng phung oh mon May, May hŏ sŏk amoh May nơm jêh ri ton jêh đah khân păng pô aơ: ‘Gâp mra ƀư ma noi deh khân may âk tâm ban bu mănh tâm trôk. Gâp mra ăn ma noi deh khân may lĕ n'gor aơ, jêng n'gor Gâp hŏ ngơi jêh ma khân may, jêh ri khân păng mra ndơn n'gor nây n'ho ro.’”

¹⁴ Brah Yêhôva tâm rgâl nau păng ŭch mĭn mâu ƀư nau mhĭk ma phung ƀon lan Păng.

Y-Môis klŭp chah rlat lŭ nchih nau vay

¹⁵ Y-Môis hăn trŭnh bơh yôk, ti păng djôt bar Rlat Nau Tâm Rnglăp. Lĕ Rlat Nau Tâm Rnglăp nây nchih klơ lĕ bar ding, mpeh panăp jêh ri mpeh pakơi.

¹⁶ Bar rlat nây tă bơh Brah Ndu, rplay nchih jêng rplay bơh Brah Ndu nchih ta klơ lĕ rlat lŭ nây.

¹⁷ Lah Y-Yôsuê tăng nteh phung ƀon lan nter, păng lah ma Y-Môis; “Tâm rmlak tahan geh nteh nau tâm lơh.”

¹⁸ Ƀiălah Y-Môis lah: “Aơ mâu di bâr nter phung dơi tâm lơh, Mâu lĕ di bâr nter phung mâu dơi; Ƀiălah gâp tăng nteh bâr phung mprơ.”

¹⁹ Lah păng văch dăch rmlak tahan, saơ rup kon ndrôk jêh ri pâl ntalơ̆, Y-Môis ji nuih, klŭp bar Rlat Nau Tâm Rnglăp bơh ti păng nơm, nchah hăch ta jâng yôk.

²⁰ Y-Môis sŏk rup ndrôk kon khân păng hŏ tŏ jêh ri su tâm ŭnh, păng ƀư hăch jêng rnih jêh nây nkhŭt rnih nây tâm n'hor dak jêh ri ăn phung ƀon lan Israel nhêt.

²¹ Y-Môis lah ma Y-Arôn: “Moh phung ƀon lan aơ hŏ ƀư jêh ma may kŏ may ăn tât nau tih toyh ma khân păng?”

²² Y-Arôn lah: “Dăn kôranh lơi ji nuih, kôranh gĭt phung ƀon lan aơ jêng phung ƀon lan ŭch ƀư nau mhĭk.

²³ Khân păng hŏ lah ma gâp: ‘Ăn may ƀư ma he rup brah hăn panăp he; yorlah he mâu gĭt ôh moh nau hŏ tât ma Y-Môis nây, nơm hŏ ngluh jêh he luh bơh n'gor Êjipt.’

²⁴ Gâp lah ma khân păng, ‘Mbu geh mah, doh lơi hom!’ Khân păng ăn mah nây ma gâp, gâp mƀăr mah nây tâm ŭnh jêh ri bơh nây luh ndrôk kon aơ.”

Y-Môis rmal phung ƀon lan

²⁵ Lah Y-Môis saơ phung ƀon lan ƀư nau blă blơ, yorlah Y-Arôn ăn khân păng ƀư nau blă blơ, kŏ tât khân păng jêng nau bêk tanăp phung rlăng,

²⁶ dôl nây Y-Môis gŭ ta mpông pêr rmlak tahan jêh ri lah: “Mbu nơm mpeh ma Brah Yêhôva, ăn văch ta gâp!” Lĕ rngôch phung kon bu klâu Lêvi gŭ rgum jŭm păng da dê.

²⁷ Păng lah ma khân păng: “Yêhôva, Brah Ndu Israel, hŏ lah pô aơ ăp nơm tâm khân nơm cheng đao ta pŭng, hăn dâng lơ lam rmlak tahan, bơh mpông aơ tât mpông ri, jêh ri ăn ăp nơm nkhĭt oh nâu păng, băl păng, jêh ri nơm chiau meng păng.”

²⁸ Phung kon bu klâu Lêvi ƀư tĭng nâm nau ngơi Y-Môis; tâm nar nây geh klăp lah pe rbăn bunuyh tâm phung ƀon lan khĭt.

²⁹ Y-Môis lah: “Nar aơ khân may nơm hŏ nhhơr ma Brah Yêhôva kon bu klâu păng nơm jêh ri oh nâu păng nơm, yor ri nar aơ Brah Yêhôva ăn nau ueh uĭn ma khân may.”

Y-Môis mbơh sơm kơl ma phung Israel

³⁰ Nar ôi taơ, Y-Môis lah ma phung ƀon lan: “Khân may hŏ ƀư jêh du nau tih toyh. Ƀiălah aƀaơ gâp mra hăn hao tâm mâp đah Brah Yêhôva, klăp lah gâp dơi chuai nau tih ma khân may.”

³¹ Pôri Y-Môis plơ̆ hao klơ tâm mâp đah Brah Yêhôva jêh ri lah đah Păng pô aơ: “Vư! Phung ƀon lan aơ hŏ ƀư jêh du nau tih toyh, khân păng hŏ ƀư jêh ma khân păng nơm rup brah ma mah.

³² Ƀiălah aƀaơ dăn Kôranh Brah yô̆ an nau tih ma khân păng! Tơlah mâu, dăn may jut lơi amoh gâp bơh ndrom samƀŭt May hŏ nchih jêh.”

³³ Brah Yêhôva lah ma Y-Môis: “Mbu nơm ƀư tih jêh tâm rdâng đah Gâp, Gâp mra jut lơi păng bơh ndrom samƀŭt Gâp.

³⁴ Ƀiălah aƀaơ, hăn hom, njŭn leo phung ƀon lan ta ntŭk Gâp hŏ ntĭm ma may. Aơ, tông mpăr Gâp mra hăn lor ma may. Ƀiălah, ta nar nau rmal, Gâp mra tâm rmal nau tih khân păng.”

³⁵ Brah Yêhôva ăn tât nau mhĭk ma phung ƀon lan yorlah khân păng ƀư jêh rup ndrôk kon ma mah jêh ri Y-Arôn hŏ tŏ păng.