Nau Ngluh Êjipt 31 - Nau Brah Ndu Ngơi 2023

Brah Yêhôva săch kuăl Y-Bêsalel jêh ri Y-Ôhôliap

¹ Brah Yêhôva lah tay ma Y-Môis:

² “Aơ, Gâp hŏ kuăl jêh Y-Bêsalel, kon bu klâu Y-Uri, sau Y-Hur, bơh noi deh Y-Yuđa.

³ Gâp hŏ ăn jêh ma păng bêng ler jêh ma Huêng Brah Ndu nđâp ma nau blau ti, nau gĭt mĭn jêh ri nau gĭt rbăng tâm lĕ nau kan ƀư ma ti

⁴ gay njêng mhe jêh ri njêng nklă lĕ ndơ ma mah, prăk jêh ri kông;

⁵ chrăk klơ lŭ, nsêr lŭ khlay jêh ri trah si tâm lĕ kan ƀư ma ti.

⁶ Aơ, Gâp hŏ săch ma păng du huê nơm kơl kan amoh Y-Ôhôliap, kon bu klâu Y-Ahisamak, bơh ndŭl mpôl Dan. Gâp hŏ đŏng nau blau mĭn ma lĕ phung blau ti gay ma khân păng dơi ƀư lĕ kan Gâp hŏ ntĭm nti jêh ma may,

⁷ tâm ban ƀư Ngih Bok Nau Tâm Rƀŭn, Hip Nau Tâm Rnglăp, ndrŭp nau yô̆ gŭ ta klơ Hip Nau Tâm Rnglăp jêh ri lĕ ndơ dŏng êng tâm Ngih Bok Nau Tâm Rƀŭn;

⁸ nơng ƀư brah jêh ri lĕ ndơ dŏng, jâng kađen ma mah chrêk jêh ri lĕ ndơ dŏng, nơng ƀư brah su ndơ ƀâu kah,

⁹ nơng ƀư brah nhhơr ndơ ƀư brah gŭch jêh ri lĕ ndơ dŏng, thŭng dak rao jêh ri jâng thŭng,

¹⁰ bok ao ƀư ma ndơ tanh, bok ao kloh ueh ma kôranh ƀư brah Y-Arôn jêh ri bok ao phung kon bu klâu păng gay ƀư nau pah kan ndơ ƀư brah,

¹¹ dak ƀâu kah mhĭng jêh ri ndơ ƀâu kah prăp ma Ntŭk Kloh Ueh. Khân păng mra ƀư di tĭng nâm lĕ nau Gâp hŏ ntĭm nti jêh ma khân may.”

Nau vay ta nar saƀat

¹² Brah Yêhôva lah ma Y-Môis:

¹³ “Ăn may lah ma phung ƀon lan Israel pơ aơ: ‘Ăn khân may djôt prăp ngăn nar saƀat Gâp yorlah nau aơ jêng du nau mbên ta nklang Gâp jêh ri khân may tâm ăp rô̆, gay khân may dơi gĭt Gâp jêng Brah Yêhôva, Nơm ƀư kloh ueh khân may.

¹⁴ Pônây, ăn khâm may djôt prăp nar saƀat yorlah nây jêng nar kloh ueh ma khân may. Mbu moh ƀư tih nar nây, bu mra nkhĭt păng; mbu moh pah kan du ntil tâm nar nây, ăn bu mra ngluh lơi păng luh bơh phung ƀon lan.

¹⁵ Bu mra pah kan knŏng tâm prao nar; nar tal pơh jêng nar saƀat, jêng nar rlu jêh ri nar kloh ueh ma Brah Yêhôva. Mbu nơm kan du ntil tâm nar saƀat, bu mra nkhĭt păng.

¹⁶ Yor ri, ăn phung ƀon lan Israel djôt prăp nar saƀat, gay tâm lĕ rngôch rô̆ tâm ban du nau tâm rnglăp n'ho ro.

¹⁷ Nau nây jêng du nau tâm mbên n'ho ro ta nklang Gâp jêh ri phung ƀon lan Israel, yorlah Brah Yêhôva hŏ rhăk njêng jêh trôk jêh ri neh ntu tâm prao nar, tât nar tal pơh Păng mâu hôm kan jêh ri gŭ rlu.’”

¹⁸ Lôch jêh ngơi đah Y-Môis ta yôk Sinai, Brah Yêhôva ăn ma păng bar Rlat Nau Tâm Rnglăp ma lŭ tă bơh nglau ti Brah Ndu nchih.