Nau Ngluh Êjipt 30 - Nau Brah Ndu Ngơi 2023

Nơng ƀư brah gŭch ndơ ƀâu kah

¹ “Ăn may ƀư đŏng du nơng ƀư brah ma si akasi gay gŭch ndơ ƀâu kah.

² Klơ mpan nơng geh rup blon, ăp njônh puăn jât puăn centimet, prêh nơng ƀư brah klăp lah pham jât pham centimet. Lĕ nke nkrêp đah nơng ƀư brah.

³ May ndop đŏng mpeh klơ nơng ƀư brah, văr jŭm puăn njônh jêh ri lĕ nke ma mah chrêk; văr jŭm nơng ƀư năp ma mah.

⁴ Ta nâm năp nây, may nkrêp bar rval ma mah ma bar ding nơng ƀư brah gay nsro mâng tung.

⁵ May ƀư hom mâng tung nây ma tơm si akasi ndop ma mah.

⁶ Ăn may n'gân nơng ƀư brah panăp bok nkŭm Hip Nau Tâm Rnglăp, tâm tra đah ndrŭp nau yô̆ gŭ ta klơ Nau Tâm Rnglăp, ntŭk Gâp mra tâm mâp đah may.

⁷ Ăp ôi, lah Y-Arôn nkra ŭnh kađen, păng mra su ndơ ƀâu kah ta klơ nơng ƀư brah.

⁸ Kêng măng, dôl mpoh ŭnh kađen, Y-Arôn mra su đŏng ndơ ƀâu kah; nây jêng ndơ ƀâu kah nhhơr ăn ƀaƀơ tanăp Brah Yêhôva tâm ăp rô̆.

⁹ Ta klơ nơng ƀư brah aơ, khân may mâu dơi su ôh ndơ ƀâu kah êng mâu lah nhhơr ndơ ƀư brah gŭch, ndơ ƀư brah gŭch rnih môi mâu lah ndơ nhhơr nhêt.

¹⁰ Ăp năm du tơ̆, Y-Arôn mra rƀŭn chuai nau tih ta klơ nke nơng ƀư brah. Tâm ăp rô̆, mham mpa ƀư brah chuai nau tih ăn dŏng tâm nau rƀŭn chuai nau tih ăp năm. Nây jêng du nau rƀŭn kloh ueh lơn ma Brah Yêhôva.”

Chê̆ pi tâm Ngih Bok

¹¹ Brah Yêhôva lah ma Y-Môis:

¹² “Lah may kơp rnoh bunuyh ƀon lan Israel, ăp nơm mra ăn prăk da dê gay chuai nau rêh păng nơm bơh Brah Yêhôva gay mâu du huê geh nau mhĭk dôl nôk kơp rnoh bunuyh ƀon lan.

¹³ Aơ jêng pi ăp nơm hŏ kơp dơi chê̆ hom: klăp lah prao gram tĭng nâm ndơ nhueh bơh Ntŭk Kloh Ueh (jêng ăp sêkel nhueh jâk jât ma bar gram); prao gram nây jêng ndơ nhhơr ma Brah Yêhôva.

¹⁴ Lĕ phung ƀon lan gŭ tâm nau kơp rnoh, ntơm bar jât năm let klơ mra ăn ndơ nhhơr aơ ma Brah Yêhôva da dê.

¹⁵ Tơlah ăn ndơ nhhơr aơ ma Brah Yêhôva gay chuai nau rêh păng nơm, bunuyh ndrŏng tâm ban bunuyh o ach mâu geh ôh bunuyh chê̆ âk lơn mâu lah djê̆ lơn ma prao gram prăk.

¹⁶ Pôri may sŏk dơn prăk ma nau chuai nau rêh phung ƀon lan Israel jêh ri dŏng prăk nây ma kan tâm Ngih Bok Nau Tâm Rƀŭn. Aơ mra jêng du nau ndray ma phung ƀon lan Israel tanăp măt Brah Yêhôva gay chuai nau rêh khân may nơm.”

Thŭng dak ma kông

¹⁷ Brah Yêhôva lah tay ma Y-Môis:

¹⁸ “Ăn may ƀư du mlâm thŭng dak ma kông gay ma rao; jêh ri jâng thŭng ma kông đŏng. Ăn may dơm hom thŭng nây ta vah vang Ngih Bok Nau Tâm Rƀŭn jêh ri nơng ƀư brah, jêh nây nkhŭt dak tâm thŭng nây.

¹⁹ Y-Arôn jêh ri phung kon bu klâu păng mra dŏng dak nây rao jâng ti.

²⁰ Lah lăp tâm Ngih Bok Nau Tâm Rƀŭn mâu lah nôk khân păng văch dăch nơng ƀư brah gay ƀư nau rƀŭn nâm nhhơr ndơ ƀư brah gŭch ma Brah Yêhôva, khân păng mra sŏk dak nây rao jâng ti khân păng gay ma mâu khĭt.

²¹ Khân păng mra rao jâng ti, lah mâu, khân păng mra khĭt. Nây jêng du nau vay n'ho ro ăn Y-Arôn jêh ri ma phung kon sau păng tâm ăp rô̆.”

Dak ƀâu kah kloh ueh

²² Brah Yêhôva lah tay ma Y-Môis:

²³ “May sŏk rgum hom lĕ ndơ ƀâu kah dŭt ueh glom: prao kilô dak si tăng, pe kilô sinamôn ƀâu kah, jêh ri pe kilô rpho ƀâu kah;

²⁴ prao kilô kasia, tĭng nâm ndơ nhueh bơh Ntŭk Kloh Ueh da dê, jêh ri puăn lit dak ngi ôlive.

²⁵ Ăn may dŏng lĕ ndơ ƀâu kah nây, lŭk lai tĭng nâm nau vay phung nkra dak ƀâu kah jêng du ntil dak ƀâu kah kloh ueh. Nây jêng dak ƀâu kah mhĭng kloh ueh.

²⁶ Ăn may sŏk dak ƀâu kah nây mhĭng ta Ngih Bok Nau Tâm Rƀŭn jêh ri Hip Nau Tâm Rnglăp,

²⁷ nơng ƀư brah jêh ri lĕ ndơ dŏng ma păng, jâng kađen jêh ri lĕ ndơ dŏng, nơng ƀư brah gŭch ndơ ƀâu kah,

²⁸ nơng nhhơr ndơ ƀư brah gŭch jêh ri lĕ ndơ dŏng, thŭng dak rao jêh ri jâng thŭng.

²⁹ Ăn may mra prăp lĕ ndơ aơ tâm nau kloh ueh gay khân păng jêng kloh ueh lơn; ăp moh ndơ nđĭl ma khân păng mra jêng kloh ueh.

³⁰ Ăn may mhĭng đŏng dak ƀâu kah ma Y-Arôn jêh ri ta phung kon bu klâu păng, nhhơr khân păng gay khân păng dơi pah kan ma Gâp tâm nau kan ƀư brah.

³¹ Ăn may lah hom ma phung ƀon lan Israel: ‘Đah Gâp, aơ jêng ma gâp dak ƀâu kah mhĭng kloh ueh tâm ăp rô̆ khân may.

³² Mâu dơi ôh nkhŭt dak ƀâu kah aơ ta săk jăn du huê bunuyh jêh ri mâu dơi đŏng lŭk lai du ntil dak ƀâu kah êng tĭng nâm rnoh jan aơ. Dak ƀâu kah aơ jêng kloh ueh jêh ri mra kloh ueh đŏng ma khân may.

³³ Mbu nơm lŭk lai du ntil dak ƀâu kah tâm ban ma nây mâu lah sŏk dak ƀâu kah nây mhĭng ma bunuyh bu năch, ăn bu mra ngluh lơi păng luh bơh phung ƀon lan.’”

Ndơ ƀâu kah kloh ueh

³⁴ Brah Yêhôva lah tay ma Y-Môis: “Dŏng hom lĕ ndơ ƀâu kah tâm ban ƀâu kah stakê, ƀâu kah ônika, ƀâu kah galbanum jêh ri ndơ ƀâu kah njŭng, ăp ntil mra dơi nhueh njing tâm ban;

³⁵ tĭng nâm nau vay bu ƀư ndơ ƀâu kah, nây, lŭk lai jêng du ntil ndơ su ƀâu kah, geh chiăt boh, kloh rsang, jêh ri kloh ueh.

³⁶ May sŏk djê̆ jêh ri juh jêng rnih jêh nây dơm panăp Hip Nau Tâm Rnglăp tâm Ngih Bok Nau Tâm Rƀŭn ta ntŭk Gâp mra tâm mâp đah khân may. Ndơ ƀâu kah aơ mra jêng kloh ueh ngăn ma khân may.

³⁷ Mâu dơi lŭk lai ndơ ƀâu kah tĭng nâm rnoh jan aơ gay dŏng ma khân may nơm; Uănh hom aơ jêng ndơ kloh ueh ma Brah Yêhôva.

³⁸ Mbu moh lŭk lai ndơ ƀâu kah tâm ban ma nây, gay n'hơp, ăn bu mra ngluh lơi păng luh bơh phung ƀon lan.”