Nau Ngluh Êjipt 29 - Nau Brah Ndu Ngơi 2023

Nau n'hao kan phung kôranh ƀư brah

¹ “Aơ jêng nau may mra ƀư dôl nhhơr Y-Arôn jêh ri phung kon bu klâu păng gay khân păng pah kan nau ƀư brah ma Gâp. Sŏk hom du mlâm ndrôk nkuăng rah jêh ri bar mlâm biăp nkuăng mâu têl khap,

² sŏk dŏng rnih ƀư piăng let mâu geh ndrui, ƀănh njŭng mâu geh ndrui, tâm lai dak ngi, jêh ri ƀănh nsiŏp mâu geh ndrui geh pot dak ngi.

³ Ăn may dơm lĕ ntil piăng let nây tâm du mlâm bĭ jêh nây nhhơr bĭ piăng let nđâp ma ndrôk nkuăng rah jêh ri bar mlâm biăp nkuăng.

⁴ May mra njŭn Y-Arôn jêh ri phung kon bu klâu păng tât ta mpông Ngih Bok Nau Tâm Rƀŭn jêh nây sŏk dak jut rao khân păng.

⁵ Jêh nây, sŏk bok ao sâm nsoh ma Y-Arôn nâm bu: ao jâr, ao jong êphôt, ao êphôt, jêh ri ndơ văn ntang ntơh; jêh nây vân rse êphôt ma păng;

⁶ ndô môk ta bôk jêh ri dơm pŏk jê̆ kloh ueh ta klơ môk;

⁷ sŏk dak ƀâu kah nkhŭt ta klơ bôk jêh ri mhĭng ma păng.

⁸ May njŭn leo đŏng phung kon bu klâu Y-Arôn văch dăch jêh ri nsoh ao jâr ma khân păng

⁹ jêh nây vân rse bŭt jêh ri ndô môk ma Y-Arôn jêh ri phung kon bu klâu păng. Nau kan phung ƀư brah mra jêng kan khân păng ma du nau vay gŭ n'ho ro. Pônây may hŏ n'hao kan ma Y-Arôn jêh ri phung kon bu klâu păng.

¹⁰ Ăn may njŭn ndrôk nkuăng rah panăp Ngih Bok Nau Tâm Rƀŭn. Y-Arôn jêh ri phung kon bu klâu păng pah ti ta klơ bôk ndrôk

¹¹ jêh ri ăn may sreh ndrôk nkuăng tanăp măt Brah Yêhôva, ta mpông Ngih Bok Nau Tâm Rƀŭn,

¹² jêh nây may sŏk mham ndrôk, dŏng nglau ti mhĭng mham nây ta lĕ nke nơng ƀư brah jêh ri nkhŭt mham hôm e tâm dâng jâng nơng ƀư brah.

¹³ Ăn may sŏk lĕ rngôch ndâr ngi nkŭm proch klơm ta trôm ndŭl, lĕ ndâr ngi bơh klơm, bar ơ̆ leh jêh ri ngi klơ nây, gŭch ta klơ nơng ƀư brah.

¹⁴ Ƀiălah puăch, ntâu, jêh ri ek ndrôk nkuăng nây gŭch padih rmlak tahan. Nây jêng du nau ƀư brah chuai nau tih.

¹⁵ May têk đŏng du mlâm biăp nkuăng tât ma Y-Arôn jêh ri phung kon bu klâu păng mra pah ti ta klơ bôk biăp nây;

¹⁶ jêh nây ăn may sreh biăp nkuăng nây, sŏk mham păng nsrih jŭm nơng ƀư brah.

¹⁷ Jêh ri ăn may koh kon biăp âk rngơl, rao kloh ndơ tâm trôm ndŭl jêh ri jâng, ăn ndrel lĕ mlay puăch nđâp bôk păng;

¹⁸ jêh nây gŭch lĕ biăp nkuăng ta klơ nơng ƀư brah. Nĕ jêng ndơ ƀư brah gŭch nhhơr ma Brah Yêhôva, jêng du nau ƀư brah dŏng ŭnh nhhơr ndơ n'hôl ƀâu kah ƀư maak ma Brah Yêhôva.

¹⁹ May têk đŏng biăp nkuăng tal bar tât Y-Arôn jêh ri phung kon bu klâu păng gay khân păng pah ti ta klơ bôk biăp nkuăng nây;

²⁰ jêh nây may sreh biăp nkuăng nây, sŏk mham mhĭng mpeh pa chiau tâm tôr pa ma Y-Arôn jêh ri phung kon bu klâu păng, mhĭng ta klơ nglau me ti ma jêh ri ta nglau me jâng ma khân păng jêh ri ăn may nsrih mham hôm e jŭm nơng ƀư brah.

²¹ May sŏk đŏng djê̆ mham ta klơ nơng jêh ri djê̆ dak ƀâu kah nsrih ta Y-Arôn jêh ri bok ao păng tâm ban đŏng ta phung kon bu klâu jêh ri bok ao khân păng. Pôri, Y-Arôn nđâp ndơ nsoh n'gut păng, lĕ phung kon bu klâu păng nđâp bok ao khân păng mra dơi jêng kloh ueh.

²² Yor nây jêng du mlâm biăp nkuăng dŏng ăn nau rƀŭn n'hao kan yor ri ăn may sŏk hom ngi, chiăng, ndâr ngi nkŭm tâm trôm ndŭl, ndâr ngi klơm, bar ơ̆ leh nđâp ndâr ngi klơ nây, jêh ri nglik pa ma;

²³ jêh ri sŏk du glo piăng let, du mlâm ƀănh njŭng lai dak ngi ôlive, jêh ri du mlâm ƀănh nsiŏp tă bơh bĭ piăng let mâu geh ndrui panăp măt Brah Yêhôva;

²⁴ jêh nây may dơm lĕ ndơ nây tâm mpang ti Y-Arôn jêh ri tâm mpang ti phung kon bu klâu păng jêh ri ăn may ƀư nau kan nhhơr ndơ ƀư brah ndơ̆ đah aơ ndơ̆ đah ri tanăp măt Brah Yêhôva.

²⁵ Jêh nây, ăn may sŏk tay lĕ ndơ nây bơh ti khân păng jêh ri su ndơ nây ta klơ nơng ƀư brah nđâp ndơ ƀư brah gŭch nhhơr ma Brah Yêhôva. Nây jêng du nau ƀư brah dŏng ŭnh nhhơr ndơ n'hôl ƀâu kah ƀư di nuih n'hâm Brah Yêhôva.

²⁶ May sŏk đŏng ntang ntơh biăp nkuăng dŏng tâm nau rƀŭn n'hao kan Y-Arôn jêh ri nhhơr nâm bu du nau ƀư brah ndơ̆ đah aơ ndơ̆ đah ri tanăp măt Brah Yêhôva; nây mra jêng kô̆ prăp ma may.

²⁷ Pônây, ăn may nhhơr ntang ntơh jêh ri nglik biăp nkuăng nâm bu du nau ƀư brah ndơ̆ đah aơ ndơ̆ đah ri tâm nau rƀŭn n'hao kan Y-Arôn jêh ri phung kon bu klâu păng.

²⁸ Lĕ ndơ nhhơr tă bơh phung ƀon lan Israel mra jêng ndơ Y-Arôn jêh ri phung kon bu klâu păng tĭng nâm nau vay n'ho ro, yorlah aơ jêng ndơ mpăm sŏk tă bơh mpa ƀư brah tâm ndơ ƀư brah ma nau đăp mpăn phung ƀon lan Israel nhhơr ma Brah Yêhôva.

²⁹ Dĭng lĕ bok ao kloh ueh Y-Arôn mra dơi jao ăn ma phung kon bu klâu ntrok thoi nau kan păng gay khân păng nsoh lah dơi mhĭng dak ƀâu kah jêh ri ăn n'hao kan.

³⁰ Kon bu klâu ntrok Y-Arôn gay ƀư kôranh ƀư brah mra nsoh bok ao nây tâm pơh nar lah păng hăn tât ta Ngih Bok Nau Tâm Rƀŭn gay pah kan tâm Ntŭk Kloh Ueh.

³¹ Ăn may sŏk hom biăp nkuăng gay dŏng tâm nau rƀŭn n'hao kan jêh ri gâm puăch păng tâm du ntŭk kloh ueh.

³² Y-Arôn jêh ri phung kon bu klâu păng mra sa puăch biăp nkuăng nây jêh ri piăng let tâm bĭ, ta mpông Ngih Bok Nau Tâm Rƀŭn.

³³ Kơt nây, khân păng mra sa lĕ ndơ nhhơr chuai nau tih nây gay dơi ăn n'hao kan jêh ri ăn kloh ueh. Ƀiălah phung bu năch mâu dơi sa yorlah ndơ nây jêng ndơ sông sa kloh ueh.

³⁴ Tơlah puăch mâu lah piăng let ndơ ƀư brah nôk n'hao kan hôm e rmeh tât ang ôi, ăn may su lơi tâm ŭnh, mâu dơi sa yorlah nây jêng ndơ sông sa kloh ueh.

³⁵ Pônây may ƀư hom ma Y-Arôn jêh ri ma phung kon bu klâu păng di nâm nau Gâp hŏ ntĭnh jêh ăn ma may, jêh ri may mra n'hao kan ma khân păng tâm pơh nar.

³⁶ Ăp nar ăn may nhhơr du mlâm ndrôk nkuăng rah gay ƀư ndơ ƀư brah chuai nau tih. May nhhơr đŏng du ndơ ƀư brah chuai nau tih ma nơng ƀư brah n'ho mhĭng dak ƀâu kah jêh ri ƀư ăn kloh nơng ƀư brah.

³⁷ Tâm pơh nar, may ƀư hom rƀŭn chuai nau tih jêh ri ƀư kloh nơng ƀư brah. Pônây nơng ƀư brah mra jêng kloh ueh ngăn, lĕ ndơ nđĭl ta nơng ƀư brah mra jêng kloh ueh.”

Ndơ ƀư brah ăp nar

³⁸ “Aơ jêng ndơ ăn may nhhơr ƀaƀơ ta klơ nơng ƀư brah: ăp nar may nhhơr bar mlâm biăp kon du năm:

³⁹ du mlâm kon biăp nôk ôi jêh ri du mlâm nôk kêng măng.

⁴⁰ Ma kon biăp tal nguay, ăn may pot klăp lah du kilô rnih môi n'hanh klăp lah du lit dak ngi lêk jêh, jêh ri du lit ndrănh krăk ƀâu ma ndơ nhhơr nhêt.

⁴¹ Ma kon biăp tal bar, ăn may nhhơr nôk kêng măng nđâp ma ndơ ƀư brah rnih môi jêh ri ndơ nhhơr nhêt tâm ban ma ndơ ƀư brah ta ôi. Nây jêng ndơ ƀư brah dŏng ŭnh nhhơr ndơ n'hôl ƀâu kah ƀư maak ma Brah Yêhôva.

⁴² Ndơ ƀư brah gŭch ăn nhhơr dơi ƀaƀơ tâm lĕ rngôch rô̆, ta mpông Ngih Bok Nau Tâm Rƀŭn tanăp Brah Yêhôva, jêng ntŭk Gâp mra tâm mâp đah khân may jêh ri ntĭm nti ma khân may.

⁴³ Gâp mra tâm mâp đah phung ƀon lan Israel ta nây; ntŭk nây mra dơi kloh ueh ma nau chrêk rmah Gâp.

⁴⁴ Gâp mra ƀư kloh ueh Ngih Bok Nau Tâm Rƀŭn jêh ri nơng ƀư brah tâm ban đŏng ƀư kloh ueh Y-Arôn jêh ri phung kon bu klâu păng gay ma khân păng ƀư nau kan ndơ ƀư brah ma Gâp.

⁴⁵ Jêh ri Gâp mra gŭ ta nklang phung ƀon lan Israel, jêh ri jêng Brah Ndu khân păng.

⁴⁶ Khân păng mra gĭt Gâp jêng Yêhôva Brah Ndu khân păng, hŏ njŭn leo khân păng luh bơh n'gor Êjipt gay ma Gâp dơi gŭ ta nklang khân păng. Gâp jêng Yêhôva Brah Ndu khân păng.”