Nau Ngluh Êjipt 28 - Nau Brah Ndu Ngơi 2023

Bok ao ma phung kôranh ƀư brah jêh ri phung kon khân păng

¹ “Tă bơh tâm phung ƀon lan Israel, ăn may săch Y-Arôn, nâu may, jêh ri phung kon bu klâu păng jêng Y-Nadap, Y-Abihu, Y-Êlêasar, jêh ri Y-Ithamar, ăn pah kan ndơ ƀư brah ma Gâp.

² Ăn may jĭm ma Y-Arôn nâu may ăn bok ao kloh ueh prăp ma nau chrêk rmah.

³ Ăn may ntĭnh ăn ma lĕ phung geh nau gĭt blau, ma phung bunuyh Gâp ăn jêh nau blau mĭn gay ma khân păng jĭm bok ao Y-Arôn, gay prăp ma păng nau kan jêng kôranh ƀư brah Gâp.

⁴ Aơ jêng bok ao ăn khân păng mra jĭm: Blah bok văn ntang ntơh, Êphôt, ao jong, ao ta nâm geh cheh, môk jêh ri rse vân bŭt. Pôri, khân păng mra jĭm bok ao kloh ueh ma Y-Arôn jêh ri ma phung kon bu klâu păng, gay ma khân păng ƀư nau kan jêng kôranh ƀư brah ma Gâp.

⁵ Khân păng mra dŏng brai mhay rhên, brai chrêk, brai ĭr, brai chăng krăk, brai sut gay ƀư bok ao nây.”

Êphôt

⁶ “Khân păng mra jĭm êphôt nê̆ ăn ueh ma brai mhay rhên, rse brai chrêk, brai ĭr, brai chăng krăk jêh ri brai sut.

⁷ Bar blah bok ta bar ding săng nglik nkrêp ta bar đah êphôt, pônây êphôt mra tâm krêp ro.

⁸ Rse rêt ta klơ êphôt dơi jĭm ăn tâm ban jêh ri ntil brai tâm ban êphôt, jêng rse brai mhay rhên, rse brai chrêk, brai ĭr, brai chăng krăk jêh ri brai sut.

⁹ May sŏk đŏng bar găr ônik jêh ri chrăk ta nây amoh lĕ phung kon bu klâu Y-Israel:

¹⁰ prao amoh ta klơ găr lŭ khlay aơ, prao amoh klơ găr lŭ khlay ri, tâm groi tĭng nâm nar deh ma khân păng.

¹¹ Ăn may chrăk amoh lĕ phung kon bu klâu Israel ta klơ bar găr lŭ khlay nây tĭng nâm nau bunuyh blau chrăk ndơ tâp pŏng, jêh nây nsêr tâm rvang năp ma mah.

¹² May mra nkrêp bar mlâm lŭ khlay nây ta klơ bar ding săng nglik êphôt, jêng ndray lĕ găr lŭ khlay ndray ma phung kon bu klâu Y-Israel. Y-Arôn mra văn amoh khân păng ta bar ding săng nglik păng jêng nau kah gĭt tanăp Brah Yêhôva nâm bu du nau ndray.

¹³ May ƀư hom rvang năp nsêr ma mah

¹⁴ jêh ri bar rse mah rhên ma mah chrêk buănh ƀăr tâm ban rse ndrăn, jêh nây may tâm nkrêp bar rse mah rhên nây tâm rvang năp nsêr.”

Blah bok văn ntang ntơh

¹⁵ “Ăn may ƀư du blah bok văn ntang ntơh ma nau phat dôih nau ăn ueh ngăn. Ăn may ƀư tĭng nâm nau bu hŏ ƀư êphôt, jêng ma rse mhay rhên, rse brai chrêk, brai ĭr, brai chăng krăk jêh ri brai sut.

¹⁶ Bok văn ntang ntơh geh rup blon jêh ri jĭm ndop bar blah, jong du nđam ti jêh ri dĭ du nđam.

¹⁷ Ăn may lĭr ta blah văn ntang ntơh puăn mbor lŭ khlay: mbor tal nguay jêng găr karnêlian, găr tơpas, jêh ri găr êmêrôt;

¹⁸ mbor tal bar jêng găr êskabuk, găr saphir jêh ri găr diamôn;

¹⁹ mbor tal pe jêng găr ôpal, găr agat jêh ri găr amêtis,

²⁰ mbor tal puăn jêng găr bêril, găr ônik, găr jaspidi. Lĕ găr lŭ khlay nây bu nkrêp tâm ndor năp ma mah.

²¹ Lĕ rngôch lŭ khlay nây jêng jât ma bar găr, tĭng nâm amoh phung kon bu klâu Y-Israel; ăp găr lŭ khlay bu chrăk amoh du tâm jât ma bar ndŭl mpôl phung Israel, tâm ban bu chrăk ndơ tâp pŏng nây đŏng.

²² May ƀư hom bok văn ntang ntơh dĭng lĕ rse mah rhên ma mah chrêk, buănh ƀăr tâm ban rse ndrăn,

²³ ƀư bar rval ma mah jêh ri nkrêp bar rval nây ta bar njônh klơ ndơ văn ntang ntơh.

²⁴ Ăn may dơm nsro bar rse mah nây tâm bar rval ta njônh klơ ndơ văn ntang ntơh nây,

²⁵ Kay bôl ri bar rse mah rhên nkrêp tâm ndor năp nsêr, jêh ri nkrêp mpeh panăp bok nkŭm săng nglik êphôt.

²⁶ May ƀư đŏng bar rval ma mah êng jêh ri lĭr khân păng ta bar njônh ta nâm ndơ văn ntang ntơh, mpeh tâm êphôt.

²⁷ May ƀư tay bar mlâm rval mah êng nkrêp khân păng panăp mpeh ta nâm bar ao êphôt ta săng nglik êphôt, ta ntŭk n'har tâm mâp ta klơ rse rêt êphôt.

²⁸ Jêh nây bu mra dŏng du rse ĭr kât lĕ rval ndơ văn ntang ntơh ma đah rval êphôt; kơt nây ndơ văn ntang ntơh nkrêp đah rse vân, mâu geh ôh rlât bơh êphôt.

²⁹ Kơt nây, lah lăp tâm Ntŭk Kloh Ueh, Y-Arôn mra văn ta ntơh păng amoh phung kon bu klâu Israel tâm ndơ văn ntang ntơh ma nau phat dôih, tâm ban du nau ndray ƀaƀơ tanăp Brah Yêhôva.

³⁰ Ăn may lĭr Urim jêh ri Thumim tâm blah văn ntang ntơh nau phat dôih, gay khân păng mra gŭ ta klơ ntơh Y-Arôn tơlah păng lăp tanăp măt Brah Yêhôva. Pôri Y-Arôn mra djôt leo ƀaƀơ ta klơ play nuih păng nau phat dôih phung ƀon lan Israel tanăp măt Yêhôva.”

Ao jong jêh ri lĕ bok nkrơ̆ êng

³¹ “May jĭm đŏng ao jong êphôt ma bok lĕ dĭng lĕ ma brai ĭr.

³² Nklang ao ăn geh du trôm ntrŭp bôk, geh rmăn jŭm trôm nây, tâm ban trô ko ao loih gay ma lơi ôh ăn prek.

³³ Tâm bôl ao ta nâm ăn nkuăk play pom gra nat ĭr, chăng krăk, chăng rhưch, nđâp ma yông rlêm mah jê̆ jŭm tĭng bôl ao,

³⁴ ăp du mlâm rlêm mah ăn geh tâm nsrah du play pom gra nat jêh ri ƀư rvang tĭng bôl ao.

³⁵ Y-Arôn mra nsoh ao nây ăp tơ̆ ƀư nau rƀŭn; Lah păng hăn lăp mâu lah luh bơh Ntŭk Kloh Ueh tanăp măt Brah Yêhôva, bu mra tăng nteh rlêm mah; bơh nây Y-Arôn mâu mra khĭt.

³⁶ Ăn may ƀư đŏng du pŏk jê̆ mah chrêk jêh ri chrăk klơ nây, tâm ban ma bu chrăk ndơ tâp pŏng, lĕ rplay samƀŭt: ‘KLOH UEH MA BRAH YÊHÔVA.’

³⁷ May kât pŏk jê̆ nây ta klơ môk ma du rse ĭr mpeh panăp môk.

³⁸ Pŏk jê̆ nây mra gŭ ta ndăr kleng Y-Arôn jêh ri Y-Arôn mra tuy moh nau tih tât ma ndơ nhhơr kloh ueh bơh phung ƀon lan Israel hŏ nhhơr. Pŏk jê̆ nây mra gŭ ƀaƀơ ta ndăr kleng Y-Arôn, gay ma Brah Yêhôva dơn khân păng.

³⁹ Ăn may tanh du blah ao nsoh ta nâm ma bok mhay rhên, du mlâm môk ma bok mhay rhên đŏng jêh ri du njăr rse vân bŭt geh cheh.

⁴⁰ May tanh hom ma phung kon bu klâu Y-Arôn ao ta nâm, rse vân bŭt jêh ri môk; may ƀư hom ma khân păng ndơ geh nau chrêk rmah jêh ri nau ueh.

⁴¹ Ăn may sŏk bok ao nây nsoh ma Y-Arôn, nâu may, jêh ri ma phung kon bu klâu păng. Ăn may mhĭng dak ƀâu kah ma khân păng, ăn n'hao kan jêh ri nhhơr khân păng gay ma khân păng kloh ueh ƀư nau kan kôranh ƀư brah ma Gâp.

⁴² Ăn may jĭm ma khân păng kho gleh ma bok mhay, gay ma nkŭm tă bơh gang bŭt tât ta tơm blu.

⁴³ Y-Arôn jêh ri phung kon bu klâu păng mra nsoh kho nây ăp tơ̆ khân păng lăp tâm Ngih Bok Nau Tâm Rƀŭn mâu lah nôk khân păng văch dăch nơng ƀư brah gay pah kan tâm Ntŭk Kloh Ueh; lah mâu geh khân păng mra geh nau tih jêh ri khĭt. Nây jêng du nau vay n'ho ro ma Y-Arôn jêh ri ma phung kon sau păng.”