Nau Ngluh Êjipt 27 - Nau Brah Ndu Ngơi 2023

Nơng ƀư brah nhhơr ndơ ƀư brah gŭch

¹ “May ƀư hom du mlâm nơng ƀư brah ma si akasi rup blon, ăp njônh bar met bar, jêh ri prêh klăp lah du met pe.

² May ƀư nke nkrêp ta puăn njônh nơng ƀư brah; lĕ nke nây ăn jêng du ngrăng đah nơng ƀư brah. Ăn may mblum nơng ƀư brah ma kông.

³ Lĕ ndơ dŏng ma nơng ƀư brah nâm bu lĕ glah dơm buh, pel, ngan grưng, n'hoi srang jêh ri khăl gŭch ƀâu kah; lĕ ndơ dŏng nây ƀư ma kông.

⁴ Ăn may ƀư ma nơng ƀư brah du plơp dreh tanh rsang ma kông geh puăn rval kông ta puăn njônh,

⁵ jêh ri dơm plơp dreh nây ta nâm năp nơng ƀư brah, klăp lah ta n'gul nau prêh nơng ƀư brah.

⁶ May ƀư đŏng lĕ mâng tung nơng ƀư brah ma si akasi ndop ma kông,

⁷ jêh nây nsro mâng tung tâm lĕ trôm rval, tơlah gay tung mra nsro mâng ma bar ding nơng ƀư brah.

⁸ Nơng ƀư brah mra ndop ma plơp kađar, hŏng tâm trôm. Ƀư hom ăn di tĭng nâm nau Gâp lĕ ntĭm jêh ma may ta klơ yôk.”

Ndring Ngih Bok

⁹ “May ƀư hom ndring Ngih Bok. Mpeh pa dâng ndring geh blah bok rjai ma rse mhay rhên jong puăn jât puăn met;

¹⁰ bar jât n'gâng jêh ri bar jât trôm n'gâng ma kông; bi ma lĕ ndơ nklĕ n'gâng jêh ri rse rêt păng ƀư ma prăk.

¹¹ Tâm ban đŏng, tĭng jong ndring mpeh pa lơ mra geh lĕ bok rjai jong puăn jât puăn met, bar jât n'gâng jêh ri bar jât trôm n'gâng ma kông, ƀiălah ndơ nklĕ n'gâng jêh ri rse rêt păng ƀư ma prăk.

¹² Tĭng nâm huy ndring mpeh nhâp nar geh lĕ blah bok jong bar jât bar met ndrel ma jât n'gâng jêh ri jât n'gâng geh trôm.

¹³ Huy ndring mpeh luh nar jêng bar jât bar met.

¹⁴ Ta du đah mpông pêr geh bok jrai prao met prao, ndrel ma pe mlâm n'gâng jêh ri pe n'gâng geh trôm;

¹⁵ đah ri geh đŏng bok jrai prao met prao, ma pe mlâm n'gâng jêh ri pe trôm n'gâng.

¹⁶ Kay ta mpông ndring mra geh du blah bok jong pham met pham ma bok mhay rhên, brai ĭr, brai chăng krăk jêh ri chăng rhưch, cheh dŭt ueh ngăn, nđâp ma puăn si n'gâng jêh ri puăn n'gâng geh trôm.

¹⁷ Lĕ rngôch n'gâng jŭm ndring ăn geh mbong ƀư ma prăk, ndơ nklĕ n'gâng ma prăk, jêh ri trôm n'gâng ma kông.

¹⁸ Jong ndring jêng puăn met mpuăn, dĭ bar jât bar met, prêh bar met bar n'hanh bok jrai ma mhay rhên jêh ri trôm n'gâng ma kông.

¹⁹ Lĕ rngôch ndơ dŏng tâm nau ƀư brah tâm Ngih Bok, lĕ mâng n'gâng Ngih Bok jêh ri mâng pêr ndring, ăn ƀư ma kông da dê.”

Dak pring mpoh ŭnh kađen

²⁰ “Ăn may ntĭnh hom ma phung ƀon lan Israel djôt leo ma may dak ngi ôlive mâu hŏ pot li mpet bơh play ôlive gay mpoh ŭnh kađen jêh ri rbay ăn ŭnh kađen hit ƀaƀơ ro.

²¹ Tâm Ngih Bok Nau Tâm Rƀŭn mpeh padih bok panăp Hip Nau Tâm Rnglăp, Y-Arôn jêh ri phung kon bu klâu păng mra mât mray ŭnh kađen ăn ang mro tanăp Brah Yêhôva ntơm bôk măng tât ôi. Aơ mra jêng nau vay dăp n'ho ro ma lĕ rnôk rô̆ phung ƀon lan Israel.”