Nau Ngluh Êjipt 26 - Nau Brah Ndu Ngơi 2023

Nau Ƀư Ngih Bok

¹ “Ăn may dŏng hom jât blah bok gay ƀư Ngih Bok. Khân păng tanh ma rse mhay rhên, brai ĭr, brai chăng krăk, jêh ri brai sut, geh cheh rup chêrubim ma nau nê̆ ueh ngăn.

² Lĕ rngôch blah bok geh du rnâng tâm ban: jong klăp lah jât ma bar met, dĭ bar met.

³ Ăp prăm bok nching tâm nkrêp nsum jêng du gu, prăm blah ri tâm ban đŏng.

⁴ Ăn may rêt rvang ma brai ĭr ta rmăn blah bok ta lôch ntŭk tâm blah bok tal nguay; jêh ri ƀư kơt nây ta rmăn blah bok lôch ntŭk tâm blah bok tal bar.

⁵ Jêh nây rêt đŏng prăm jât trôm ntôr ta ntŭk ndop tal nguay jêh ri prăm jât rvang ta bôl blah bok ntŭk ndop tal bar; lĕ trôm ntôr bar ding tâm găp ndrăng păng.

⁶ Ƀư hom prăm jât ndơ nklĕ ma mah, jêh nây nklĕ nkep nsum lĕ blah bok tâm mâp ndrel gay Ngih Bok tâm thoi jêng nguay.

⁷ May ƀư đŏng jât ma nguay blah bok ma rsau be gay ƀư bok nkŭm ta klơ Ngih Bok.

⁸ Lĕ jât ma nguay blah bok ăn veh du rnâng tâm ban: jong klăp lah jât mpe met, dĭ klăp lah bar met.

⁹ Ăn may thoi lĕ blah bok aơ jêng bar gu: Du gu geh prăm blah jêh ri du gu geh prao blah; ƀiălah phăp rdăp bar blah bok tal prao panăp Ngih Bok.

¹⁰ Jêh nây rêt đŏng prăm jât rse trôm ntôr ta bôl blah bok kêng dŭt ntŭk thoi bok tal nguay, jêh ri prăm jât rse trôm ntôr ta bôl blah bok ntŭk thoi blah nkŭm tal bar.

¹¹ Ăn may ƀư đŏng prăm jât ndơ nklĕ ma kông nđăng tâm trôm ntôr jêh nây thoi bar gu bok gay Ngih Bok tâm thoi jêng nguay.

¹² Ntŭk hôm rmeh, jêng n'gul blah bok rmeh bok nkŭm, mra nkŭm pakơi Ngih Bok;

¹³ Ntŭk jong bar ding rmeh klăp lah n'gul met bơh bok nkŭm mra nkŭm ntrŭnh gay nkŭm ta bar njônh Ngih Bok.

¹⁴ May ƀư đŏng du blah bok nkŭm ma ntâu biăp nkuăng mhĭng dak chăng jêh ri du blah bok nkŭm ma ntâu ka toyh nkŭm ta klơ.

¹⁵ May ndâk dĭng lĕ plơp kađar ma tơm si akasi gay ƀư mpir Ngih Bok.

¹⁶ Ăp plơp kađar jong klăp lah puăn met, dĭ klăp lah prao jât prao centimet.

¹⁷ Ăp plơp geh bar bôk tâm lăp gay tâm ntrŭp dĭng lĕ plơp kađar tâm mâp ndrel. Ăn may ƀư lĕ rngôch plơp kađar tâm mpir Ngih Bok ƀư đŏng kơt nây da dê.

¹⁸ May ƀư hom bar jât plơp kađar mpeh pa dâng Ngih Bok;

¹⁹ tâm dâng bar jât plơp kađar, ƀư hom puăn jât trôm rval ma prăk; ta nâm ăp plơp kađar geh bar trôm rval tâm di ma bar trôm rval hŏ ƀư, jêh ri bar trôm rval tâm dâng plơp kađar thoi mra tâm di đah bar trôm rval plơp kađar thoi dŏng.

²⁰ Ƀư hom bar jât plơp kađar ăn mpeh pa lơ Ngih Bok,

²¹ jêh ri puăn jât trôm rval ma prăk, ăp plơp kađar geh bar trôm rval, jêh ri plơp kađar thoi ta geh đŏng bar trôm rval.

²² Ăn may ƀư prao plơp kađar mpeh ma nhâp nar Ngih Bok.

²³ Jêh ri ƀư bar plơp kađar ta bar njônh pakơi Ngih Bok;

²⁴ khân păng mra dơi ntrŭp tâm mâp ndrel tă bơh ta nâm tât ta klơ ma đah du mlâm rval êp klơ. Lĕ bar njônh ăn ƀư kơt nây da dê.

²⁵ Geh pham plơp kađar jêh ri jât mprao trôm rval ma prăk, ta nâm ăp plơp kađar geh bar trôm rval jêh ri plơp kađar jêh i nây tâm ban lĕ.

²⁶ Ăn may ƀư đŏng lĕ mâng nđăng ma si akasi: prăm mâng nđăng đŏng lĕ plơp kađar ma đah aơ Ngih Bok;

²⁷ prăm mâng nđăng ma lĕ plơp kađar ta đah ri Ngih Bok, jêh ri prăm mâng nđăng êng đŏng ma pakơi Ngih Bok, jêng ma mpeh nhâp nar.

²⁸ Mâng nđăng ta nklang, ăn ta n'gul klơ dĭng lĕ plơp kađar, mra nđăng rho n'hot bơh bôl đah aơ tât bôl đah ri.

²⁹ Ăt sŏk đŏng mah mblum kađar jêh ri ƀư lĕ rval ma mah prăp nsro lĕ mâng nđăng. Kon mblum đŏng mâng nđăng ma mah lĕ mâng nđăng.

³⁰ Ăn kon ndâk Ngih Bok tĭng di nâm rup lĕ ntĭm jêh ma kon ta klơ yôk.

³¹ May ƀư hom du blah bok ma rse mhay rhên, brai ĭr, chăng krăk, chăng rhưch, geh cheh rup chêrubim ma nau nê̆ ueh ngăn;

³² yông blah bok nây ta klơ puăn mlâm n'gâng ma si akasi ndop ma mah, ndâk ta puăn mlâm trôm n'gâng ma prăk; lĕ ndơ nklĕ n'gâng ƀư ma mah da dê.

³³ Ăn may yông bok nây ta ăp nklĕ, jêh nây leo Hip Nau Tâm Rnglăp tâm trôm bok. Blah bok aơ mra kơl khân may tâm nkhah Ntŭk Kloh Ueh jêh ri Ntŭk Dŭt Kloh Ueh.

³⁴ Kon ăn ndrŭp nau yô̆ ta klơ Hip Nau Tâm Rnglăp tâm Ntŭk Dŭt Kloh Ueh.

³⁵ Ăn kon dơm đŏng sưng padih bok mpeh pa lơ Ngih Bok, jêh ri dơm jâng kađen tâm tra đah sưng mpeh pa dâng Ngih Bok.

³⁶ Ta bôk mpông Ngih Bok, ăn may ƀư du blah bok ma brai ĭr, brai chăng krăk jêh ri chăng rhưch, rse mhay rhên, cheh ma nau ueh ngăn;

³⁷ jêh nây ma prăm blah bok aơ kon ƀư prăm n'gâng ma si akasi ndop ma mah; lĕ ndơ nklĕ păng ƀư ma mah đŏng jêh ri tŏ ma păng prăm trôm n'gâng ma kông.”