Nau Ngluh Êjipt 25 - Nau Brah Ndu Ngơi 2023

Brah Yêhôva ntĭm Y-Môis ndâk Ngih Bok

¹ Brah Yêhôva lah ma Y-Môis:

² “Lah hom ma phung ƀon lan Israel nhhơr ndơ ma Gâp. Khân may sŏk dơn ndơ nhhơr bơh lĕ rngôch mbu geh nuih n'hâm nhhơr.

³ Aơ jêng ndơ nhhơr phung kon mra dơn tă bơh khân păng: mah, prăk, jêh ri kông;

⁴ brai ĭr, brai chăng krăk jêh ri brai mhay rhên, rsau be;

⁵ ntâu biăp nkuăng nhom chăng, ntâu ka toyh, jêh ri si akasi;

⁶ dak pring mpoh ŭnh kađen, lĕ ndơ ƀâu kah gay ƀư dak ƀâu kah mhĭng jêh ri ndơ n'hôl ƀâu kah;

⁷ lŭ ônik jêh ri lĕ ntil lŭ khlay êng gay lĭr nkrêp ta êphôt jêh ri ndơ văn ta ntang ntơh.

⁸ Khân păng mra ƀư ma Gâp du Ngih Brah Kloh Ueh gay Gâp gŭ tâm nklang khân păng.

⁹ Ăn khân may ƀư ngih nây di nâm rup Ngih Bok jêh ri lĕ ndơ dŏng nkrơ̆ ƀư ueh Gâp mra ntĭm ma may.”

Hip Nau Tâm Rnglăp

¹⁰ “Pôri, đă hom khân păng ƀư du mlâm hip ma si akasi, jong du rhiăng jât centimet, dĭ prao jât centimet, jêh ri prêh prao jât prao centimet.

¹¹ Ăn kon mblum hip nây ma mah kloh, mblum tâm trôm nđâp ma padih jêh ri ƀư năp jŭm ma mah văr jŭm hip.

¹² Ăn may lôk puăn mlâm rval ma mah lĭr nkrêp ta puăn njônh hip, bar rval đah aơ jêh ri bar rval đah ri;

¹³ jêh ri ƀư mâng tung ma si akasi ndop ma mah;

¹⁴ nsro mâng tâm trôm rval bar đah ding gay tung hip.

¹⁵ Mâng nây gŭ mro tâm trôm rval, mâu dơi tŏk ôh.

¹⁶ Ăn may dơm tâm trôm hip Nau Tâm Rnglăp Gâp mra ăn ma may.”

Ndrŭp nau yô̆

¹⁷ “May ƀư hom du mlâm ndrŭp nau yô̆ ma mah chrêk, jong du rhiăng jât centimet, dĭ prao jât prao centimet.

¹⁸ Jêh nây ƀư bar chêrubim ma mah chiăr n'hơ, dơm tâm bar bôl ndrŭp nau yô̆.

¹⁹ Ƀư hom du mlâm chêrub ta bôk aơ, du mlâm chêrub ta bôk ri jêh ri lĭr nkrêp ro đah bar bôk ndrŭp.

²⁰ Bar chêrubim mra lĭ bar đah nting năr nkŭm ndrŭp nau yô̆. Phung chêrubim tâm thâng muh măt, uănh ndrel mpeh ta ndrŭp nau yô̆ an.

²¹ Ăn may dơm ndrŭp nau yô̆ ta klơ hip jêh ri dơm tâm trôm nây Rlat Nau Tâm Rnglăp Gâp mra ăn ma may.

²² Gâp mra mâp may ta nây; ntơm bơh klơ ndrŭp nau yô̆, ta nklang bar chêrubim gŭ ta klơ Hip Nau Tâm Rnglăp, Gâp mra ntĭnh ma may dĭng lĕ nau ntăm ƀư ma phung ƀon lan Israel.”

Sưng dơm piăng let nhhơr

²³ “Ăn may ƀư đŏng du mlâm sưng ma si akasi, jong pham jât pham centimet, dĭ puăn jât puăn centimet jêh ri prêh prao jât prao centimet,

²⁴ mblum ma mah chrêk, jêh ri ƀư du năp văr jŭm ma mah.

²⁵ May ƀư đŏng rvang jŭm sưng, prêh klăp lah puăn nglau ti, jêh ri ƀư năp jŭm ma mah văr jŭm nây.

²⁶ Jêh nây lôk puăn rval ma mah nkrêp ta puăn njônh, ta ntŭk geh puăn jâng sưng.

²⁷ Rval mra ntăm dăch ta pĭt năp gay nsro mâng tung sưng.

²⁸ May ƀư hom mâng tung ma si akasi, mblum ma mah gay tung sưng nây.

²⁹ Ăn may sŏk đŏng mah chrêk gay ƀư ngan pala, ngan jam gay nhhơr ndơ ƀâu kah, jêh ri yăng, khăl gay ƀư ndơ nhhơr nhêt.

³⁰ Ta klơ mpan nây ăn may dơm piăng let nhhơr tanăp măt Gâp ƀaƀơ.”

Jâng kađen

³¹ “Ăn May ƀư đŏng jâng kađen ma mah chrêk; mbŭm jêh ri tơm jâng kađen ma mah chiăr n'hơ, mbôm kađen, rmlom kađen jêh ri năr kao kađen nkrêp lăp ta jâng kađen da dê.

³² Geh prao n'gĭng rtah đang luh bar đah ding jâng kađen, pe n'gĭng đah aơ jêh ri pe n'gĭng đah ri.

³³ Tâm prao n'gĭng rtah luh bơh jâng kađen, klơ ăp n'gĭng geh pe mbôm kađen jêng rup kao play amandê đah rmlom kađen jêh ri năr kao kađen.

³⁴ Ta klơ jâng kađen geh đŏng puăn mlâm mbôm kađen rup kao play amandê đah rmlom kađen jêh ri năr kao kađen.

³⁵ Tâm prao n'gĭng rtah luh bơh jâng kađen, tâm dâng bar mlâm n'gĭng nkrêp du rmlom kađen da dê.

³⁶ Lĕ rmlom kađen jêh ri lĕ n'gĭng jâng kađen nkrêp đah jâng kađen; lĕ rngôch ndơ nây ƀư ma mah chrêk chiăr n'hơ.

³⁷ Ăn may ƀư hom pơh mlâm ŭnh kađen ma jâng kađen; dơm ăp ŭnh kađen nây ăn ueh gay ma lah bu mpoh ŭnh kađen nây ang nchrat mpeh panăp jâng kađen.

³⁸ Katrei nkăp brai ŭnh kađen jêh ri khăl dơm buh ƀư ma mah chrêk.

³⁹ Du talâng mah chrêk mra dơi dŏng ƀư jâng kađen jêh ri lĕ ndơ dŏng ƀaƀă.

⁴⁰ Pôri, may uănh n'hêl nê̆ jêh ri ƀư di tĭng rup hŏ ntĭm ăn may ta klơ yôk.”