Nau Ngluh Êjipt 24 - Nau Brah Ndu Ngơi 2023

Y-Môis hăn hao ta yôk Sinai

¹ Brah Ndu lah ma Y-Môis: “May jêh ri Y-Arôn, Y-Nadap jêh ri Y-Abihu nđâp pơh jât kôranh bu ranh phung Israel hao hom ndrel ma Brah Yêhôva, jêh ri gŭ bơh ngai dĭng yơk mbah.

² Knŏng êng may jêng Y-Môis dơm dơi văch dăch Brah Yêhôva; lĕ phung êng mâu dơi ôh văch dăch. Phung ƀon lan mâu dơi tĭng may hao klơ yôk.”

³ Nôk Y-Môis tât jêh ri nkoch tay ma phung ƀon lan lĕ rngôch nau ngơi jêh ri lĕ nau vay Brah Yêhôva, phung ƀon lan ndrel du bâr plơ̆ lah: “Hên mra ƀư lĕ nau Brah Yêhôva lah jêh.”

⁴ Y-Môis nchih tay lĕ nau ngơi Brah Yêhôva. Păng dâk ơm ôi, ndâk du mlâm nơng ƀư brah ta jâng yôk jêh ri ndâk jât ma bar n'gâng lŭ tâm ban ma jât ma bar ndŭl mpôl phung Israel.

⁵ Păng đă phung bu klâu ndăm Israel nhhơr ma Brah Yêhôva ndơ ƀư brah gŭch jêh ri mpa ƀư brah ma ndrôk kon, jêng ndơ ƀư brah ma nau đăp mpăn.

⁶ Y-Môis sŏk du n'gul mham tâm ăp ngan grưng, bi ma mham hôm e n'gul nây păng djrah ta klơ nơng ƀư brah.

⁷ Păng djôt ndrom samƀŭt nau tâm rnglăp jêh ri răk ăn ma phung ƀon lan tăng. Khân păng lah: “Hên mra tĭng ƀư jêh ri djôt prăp lĕ nau Brah Yêhôva hŏ ntăm jêh.”

⁸ Y-Môis sŏk mham djrah ta klơ phung ƀon lan jêh ri lah: “Aơ jêng mham nau tâm rnglăp Brah Yêhôva hŏ ƀư jêh đah khân may tĭng nâm lĕ nau ngơi aơ.”

⁹ Jêh nây, Y-Môis jêh ri Y-Arôn, Y-Nadap jêh ri Y-Abihu nđâp pơh jât kôranh bu ranh Israel hao ta klơ yôk;

¹⁰ khân păng saơ Brah Ndu Israel. Tâm dâng jâng Păng geh du ntil ndơ tâm ban ma du ndơl lŭ saphir rsang nâm bu trôk nđôch.

¹¹ Păng mâu ôh yơr ti ƀư nau mhĭk ma phung kôranh ƀon lan Israel; khân păng hŏ treng uănh jêh Brah Ndu jêh nây khân păng nhêt sa.

¹² Brah Yêhôva lah ma Y-Môis: “Hao hom ta yôk, tât ta Gâp jêh ri gŭ kâp Gâp ta nây. Gâp mra ăn ma may ndap lŭ ta nây Gâp hŏ nchih jêh nau vay jêh ri nau vay ntăm gay nti phung ƀon lan.”

¹³ Y-Môis ndrel ma Y-Yôsuê, bunuyh kơl pah kan ma păng, dâk jêh ri Y-Môis hăn hao ta klơ yôk Brah Ndu.

¹⁴ Păng lah ma kôranh phung bu ranh: “Gŭ kâp hên ta aơ kŏ tât hên plơ̆ tay. Aơ, Y-Arôn ndrel Y-Hur mra gŭ ndrel ma khân may; mbu moh geh nau dơi văch mâp đah khân păng.”

¹⁵ Y-Môis hao klơ yôk, jêh ri ndâr tŭk nkŭm yôk.

¹⁶ Nau chrêk ma lơp Brah Yêhôva gŭ klơ yôk Sinai. Tâm prao nar, tŭk nkŭm yôk; tât nar tal pơh Brah Yêhôva kuăl Y-Môis tă bơh nklang ndâr tŭk.

¹⁷ Nau chrêk ma lơp Brah Yêhôva nchrat nâm bu ŭnh hit ta klơ n'gơn yôk tanăp măt phung ƀon lan Israel.

¹⁸ Y-Môis lăp ta nklang ndâr tŭk jêh ri hăn hao klơ yôk. Y-Môis gŭ ta klơ yôk puăn jât nar puăn jât măng.