Nau Ngluh Êjipt 23 - Nau Brah Ndu Ngơi 2023

Nau vay yơk ma nau di

¹ “Lơi may nkoch bri nklă. May mâu dơi tâm rnglăp đah bunuyh mhĭk gay mbơh mƀruh.

² Lơi ta may tĭng ôh phung âk gay ƀư nau djơh mhĭk. Lah ƀư nơm mbơh nau tâm phong bu, lơi may gŭ ôh mpeh phung âk gay ma nsak lơi nau di.

³ May mâu dơi gŭ nding mpeh ma bunuyh o ach tâm nau phong.

⁴ Tơlah may mâp ndrôk, mâu lah seh bri nơm rlăng đah may hăn nhhơt ăn may têk njŭn sĭt ma nơm tơm păng.

⁵ Lah may saơ seh bri nơm rmot may cha lôt yor rdeng ndơ jâk ir, mâu dơi uănh dơm ôh ƀiălah ăn he kơl nơm nây sâm rdâk an seh bri.

⁶ Lơi may nsak nau di tâm lĕ nau dôih bơh bunuyh o ach.

⁷ Ăn kon der ngai đah lĕ nau ngơi nklă jêh ri lơi ta nkhĭt ôh bunuyh mâu geh nau tih mâu lah nơm sŏng srăng, yorlah Gâp mâu mra kơp ôh nau sŏng srăng ma nơm djơh mhĭk.

⁸ Lơi may dơn ôh drăp bu blŏl, yorlah drăp bu blŏl mra ƀư chieh măt nơm gĭt blau jêh ri nsak nau ngơi bơh phung nơm sŏng srăng.

⁹ Lơi may tŭn jot ôh phung bu năch, khân may nơm hŏ gĭt rbăng jêh nuih n'hâm phung bu năch mâm jêng, yorlah khân may hŏ tă jêng bu năch jêh tâm n'gor Êjipt.”

Nau vay ma năm saƀat

¹⁰ “Tâm prao năm ăn may srih tăm jêh ri rgum play tâm neh he nơm.

¹¹ Ƀiălah tât năm tal pơh ăn neh rlu, mâu tuch tăm ôh gay ma phung o ach tâm phung ƀon lan may dơi joi ndơ sông sa tă bơh nây; moh ndơ hôm e klen ăn mpô mpa mra sa tâm mir. May ƀư kơt nây đŏng ndơ tâm đang krăk ƀâu jêh ri đang ôlive khân may nơm.

¹² Ăn may ƀư nau kan may nơm tâm prao nar, tât nar tal pơh ăn kon rlu gay ăn ndrôk jêh ri seh bri may dơi rlu, kon bu klâu bơh bu ur dĭk jêh ri phung bu năch dơi sĭt tay n'hâm suan.

¹³ Ăn may blau njrăng lĕ nau Gâp lah jêh ma may. Mâu dơi nkah tay ôh tât amoh phung brah êng, mâu đŏng ăn bu tăng nau nây tă bơh trôm mbung may lah amoh phung brah nây.”

Nau vay lĕ nau rƀŭn toyh tâm năm

¹⁴ “Ăp năm pe tơ̆ ăn may djôt prăp rƀŭn yơk ma Gâp.

¹⁵ Ăn may djôt prăp nau rƀŭn Piăng Let Mâu Geh Ndrui. Tâm pơh nar, ăn sa piăng let mâu geh ndrui tâm nar lĕ nal jêh tâm khay Abip, nâm Gâp hŏ ntăm ntĭnh jêh kon, yor tâm khay nây kon hŏ luh jêh bơh n'gor Êjipt. Mâu geh ăn du huê hăn ti dơm văch tanăp măt Gâp.

¹⁶ Ăn kon djôt prăp nau rƀŭn Yan Rek jêng rƀŭn nhhơr play kao dak bôk yor tă bơh nau kan kon hŏ nsrih ta mir. Kon djôt prăp đŏng nau rƀŭn, Rgum ta lôch năm, lah kon rgum lĕ jêh play bơh n'hâm suan kan nsĭt bơh mir.

¹⁷ Ăp năm pe tơ̆, lĕ rngôch phung bu klâu ăn hăn tanăp măt Kôranh Brah, jêng Brah Yêhôva.

¹⁸ Kon lơi nhhơr ôh ma Gâp mham mpa ƀư brah nđâp ma piăng let geh ndrui, kŏ mâu đŏng prăp ngi mpa ƀư brah nhhơr tâm nar rƀŭn yơk ma Gâp kŏ tât ang ôi taơ.

¹⁹ Ăn djôt leo dĭng lĕ play dak bôk dŭt ueh bơh neh may lăp tâm ngih Brah Yêhôva Brah Ndu. May mâu dơi gâm ôh be tâm dak toh me păng.”

Nau ton prăp ăn phung Israel

²⁰ “Aơ, Gâp njuăl du huê tông mpăr hăn panăp kon gay mât mơh kon tâm trong hăn jêh ri leo kon lăp ta ntŭk Gâp hŏ nkra jêh.

²¹ Tanăp tông mpăr, ăn blau njrăng jêh ri tông bâr păng. Lơi ƀư ôh nau tâm rdâng đah păng, yorlah păng mâu mra yô̆ an ôh nau khân nơm tâm rdâng, yorlah amoh Gâp gŭ tâm păng.

²² Ƀiălah tơlah may iăt nau tông bâr păng jêh ri ƀư tĭng lĕ nau Gâp ntĭnh ntăm, pôri Gâp mra jêng phung rlăng đah phung rlăng kon, jêh ri nơm rdâng đah phung tâm rdâng đah kon.

²³ Yorlah tông mpăr Gâp mra hăn panăp kon, njŭn kon mŭt tâm n'gor phung Amôrit, Hitit, Pêrisit, Kanaan, Hivit jêh ri Jêbusit; jêh ri Gâp mra ƀư rai lơi khân păng.

²⁴ Lơi chon mbah jêh ri pah kan ma phung brah khân păng; lơi kơt nau kan khân păng ƀư. Ăn kon ƀư rai lĕ ƀhiau phung brah jêh ri mbang hăch ăn lĕ n'gâng khân păng mbah.

²⁵ Yơk mbah hom ma Yêhôva Brah Ndu khân may; Păng mra ăn nau ueh uĭn tâm piăng let may sa, tâm dak khân may nhêt, jêh ri sŏk lơi nau ji kuet der ngai bơh khân may.

²⁶ Mâu mra geh ôh bu ur me rlêh kon mâu lah mâu bă kon tâm n'gor may. Gâp mra ăn may dơi rêh jŏ năm.

²⁷ Gâp mra ăn nau klach krit jêh ri ƀư uh ah ma mbu phung ƀon lan ntŭk may bơi tât. Gâp mra ăn phung rlăng may nchuăt du bơh tra năp măt may.

²⁸ Gâp mra đă ong bôk kla hăn lor panăp may, khân păng mra lơh mprơh phung Hivit, phung Kanaan, jêh ri phung Hitit tanăp măt may.

²⁹ Gâp mâu ôh mprơh lĕ khân păng tâm du năm, klach lah n'gor mra jêng rngol, jêh ri mpô mpa bri mra bĭk rơ̆ âk, ƀư djơh ma may.

³⁰ Ƀiălah Gâp mra mprơh khân păng mbrơi mbrơi luh bơh kon, kŏ tât nôk kon dơi jêng bĭk rơ̆ jêh ri mra dơi ndơn neh aơ.

³¹ Gâp mra ƀư n'har bri kon ntơm bơh Dak Mƀŭt Chăng tât ta dak mƀŭt Philistin, ntơm bơh bri rdah tât ta dak krong toyh; yorlah Gâp mra jao lĕ phung bunuyh ta n'gor nây tâm ti kon, jêh ri kon mra mprơh khân păng mâu hôm saơ ta măt kon.

³² Kon lơi ƀư nau tâm rnglăp ôh đah khân păng mâu lah đah phung brah khân păng.

³³ Khân păng mâu mra gŭ ôh tâm n'gor kon, klach lah khân păng nsŭk kon ƀư tih đah Gâp yor pah kan ma phung brah khân păng; nau nây n'hêl nê̆ mra jêng dăk sân ma kon.”