Nau Ngluh Êjipt 22 - Nau Brah Ndu Ngơi 2023

Nau vay ma nau tih ntŭng

¹ Tơlah mbu nơm nhŭp ntŭng du mlâm ndrôk mâu lah du mlâm biăp jêh nây nkhĭt mâu lah tăch lơi, ntrok hom prăm mlâm ndrôk tâm du mlâm ndrôk, jêh ri puăn mlâm biăp tâm du mlâm biăp.

² Tơlah nơm ntŭng geh bu nhŭp dôl păng pơk mpông gay ntŭng kêng măng jêh ri dong păng tât khĭt, bunuyh nĕ mâu geh khan nau tih ƀư nau nkhŭt mham;

³ ƀiălah tơlah geh nau tât lĕ jêh luh nar nơm nkhĭt bu mra khan tih ƀư nkhŭt mham. Ăn bunuyh ntŭng mra ntrok ndơ bu; tơlah păng mâu geh ndơ gay ntrok, bu mra tăch păng yor nau tih păng ntŭng.

⁴ Tơlah saơ ta ti nơm ntŭng ndơ păng hŏ ntŭng jêh, mâu lah ndrôk, seh bri, mâu lah biăp hôm rêh, nơm ntŭng nĕ păng mra ntrok bar tơ̆.

Nau vay ma nau ƀư mhĭk

⁵ Tơlah du huê bunuyh ƀư mhĭk ndơ tâm mir mâu lah đang krăk ƀâu, mâu lah ăn mpa rong păng sa ndơ tâm mir bunuyh êng ăn nơm nây sŏk ndơ dŭt ueh tâm mir păng mâu lah tâm đang krăk ƀâu păng gay ntrok ndơ bu.

⁶ Tơlah geh ŭnh luh jêh ri ŭch sa rêng tât ta pŭm lok jêh nây su rai lĕ nchăp ba, ba bu ê hŏ rek, mâu lah ba hôm tâm lŏ sre, nơm su ŭnh nây mra ntrok lĕ rngôch ndơ bu hŏ ŭnh sa jêh.

Nau vay ma nau tih ndơm

⁷ Lah geh bu bunuyh jao ma nơm chiau meng păng sâm mât prăk mâu lah ndô ndơ păng nơm, ƀiălah bu ntŭng lơi bơh tâm ngih bunuyh nây, tơlah ban bu nhŭp nơm ntŭng ri ăn păng ntrok bar tơ̆.

⁸ Tơlah bu mâu geh nhŭp ôh bunuyh ntŭng, bu mra djôt leo nơm tơm ngih nây tât tanăp măt Brah Ndu gay ma mpơl gĭt lah păng sŏk drăp ndơ phung chiau meng păng.

⁹ Tâm lĕ rngôch nau tâm rlăch tât ma drăp ndơ, ndrôk, seh bri, biăp, bok ao, mâu lah ndơ êng roh, ƀiălah bu mra lah: “aơ jêng ndơ gâp” pôri lĕ bar đah nây hăn tât tanăp măt Brah Ndu. Nơm Brah Ndu tâm rmal mra ntrok bar tơ̆ ma nơm chiau meng păng.

¹⁰ Tơlah du huê bunuyh ăn ma nơm chiau meng păng chiăp seh bri, ndrôk, biăp, mâu lah mpô mpa rong êng păng sâm mât, jêh ri mpô mpa nây khĭt, deh jâng mâu lah bu nhŭp roh mâu geh ôh nơm saơ

¹¹ ăn bar đah sŏk hom amoh Brah Yêhôva gay ton jêh ri mpơl gĭt lah nơm chiăp mpô mpa mâu sŏk ôh drăp ndơ nơm chiau meng păng. Ăn nơm tơm mpô mpa dơn nau ton nây, jêh ri nơm chiăp mâu ntrok ôh.

¹² Ƀiălah tơlah nơm nây ntŭng mpa nây ăn păng ntrok ma kôranh păng.

¹³ Tơlah geh mpô mpa bri sa hêk mpa păng chiăp, ăn păng njŭn ndơ nây jêng nau mbơh; păng mâu mra ntrok ôh mpa bu sa hêk jêh.

¹⁴ Tơlah du huê bunuyh chan du mlâm mpô mpa rong nơm chiau meng păng, jêh nây păng deh jâng mâu lah khĭt tâm nôk nơm tơm mpa nây mâu geh năp măt, păng mra ntrok ndơ nây.

¹⁵ Ƀiălah, tơlah nơm tơm geh măt ta nây mâu mra ntrok ôh. Tơlah mpa nây lĕ ăn bu nkhôm, rnoh nkhôm ntrok ma prăk nkhôm.

Nau vay ơm di keh jêh ri nau chroh

¹⁶ Lah du huê bu klâu ndơm du huê bu ur druh ê hŏ geh ôh tâm mbloh, jêh ri păng bê̆ch đah bu ur nây, păng mra ăn ndơ ma păng jêh ri sŏk bu ur nây jêng ur păng.

¹⁷ Tơlah mbơ̆ bu ur nây dun mâu ôh ăn păng sŏk ƀư ur, păng mra ăn prăk ndah rnoh ndơ bu vay nđăp ma phung bu ur druh.

¹⁸ Mâu dơi om ôh nau rêh ma phung bu ur n'hŭm.

¹⁹ Mbu moh bê̆ch ndrel đah du mlâm mpô mpa, ăn bu nkhĭt lơi păng.

²⁰ Mbu nhhơr mpa ƀư brah ma lĕ rngôch brah êng mâu tăp ma Brah Yêhôva ôh ăn bu nkhĭt lơi păng.

²¹ May lơi ƀư mhĭk mâu lah tŭn jot ma phung bu năch, yorlah khân may hŏ tă jêng jêh phung bu năch tâm n'gor Êjipt.

²² Khân may lơi tŭn jot ôh du huê bu ur ndrô mâu lah ma du huê kon đơi.

²³ Tơlah khân may tŭn jot khân păng, jêh ri khân păng nter vơl ma Gâp, nanê̆ Gâp mra tăng nau khân păng nter;

²⁴ Nau ji nuih Gâp mra hit, jêh ri gâp mra nkhĭt khân may ma đao; ur khân may mra jêng bu ur ndrô jêh ri phung kon khân may mra jêng kon đơi.

²⁵ Tơlah khân may ăn phung o ach tâm phung ƀon lan Gâp manh prăk, lơi ƀư ôh ma khân păng nâm bu nơm tơm geh rnon, jêh ri khân may mâu đŏng dơi sa kao ma khân păng.

²⁶ Tơlah khân may sŏk du blah ao jong nơm chiau meng khân may jêng ndơ nchăm, nsĭt hom ao nây ma khân păng êlor ma nar nhâp;

²⁷ yorlah păng geh knŏng bok nây, jêng ao mbâl gay nkŭm săk jăn păng, moh ndơ păng nsoh dôl păng lâng săk? Tơlah păng kuăl nter ma Gâp, Gâp mra tăng nau păng, yorlah Gâp jêng Nơm geh nau ueh.

²⁸ May mâu dơi ôh sưr rlau ma Brah Ndu, mâu lĕ dơi rtăp rak ma kôranh chiă uănh phung ƀon lan khân may.

²⁹ May mâu dơi ôh mbrĕ mbrơi tâm nau nhhơr lĕ ndơ play dak bôk bơh mir may jêh ri ndrănh khân may. Ăn khân may nhhơr phung kon bu klâu bôk rah ma Gâp.

³⁰ Ăn khân may ƀư kơt nĕ đŏng ma biăp jêh ri ndrôk khân may. Ăn hom kon dak bôk gŭ ndrel me păng tâm pơh nar, tât ta nar tal pham khân may mra nhhơr păng ma Gâp.

³¹ Phung khân may jêng bunuyh kloh ueh ma Gâp, yor nây mâu dơi sa ôh puăch mpa tă mpô mpa bri sa hêk tâm mir, ăn may mƀăr păng ma so sa.