Nau Ngluh Êjipt 21 - Nau Brah Ndu Ngơi 2023

Nau vay ma dĭk bu

¹ Aơ jêng lĕ nau vay ăn may mbơh nkoch ma phung ƀon lan:

² Lah khân may rvăt du huê dĭk Hêbrơ, nơm nây mra pah kan prao năm; tât năm tal pơh nơm nây mra du luh dơi jêng kon me jêh ri mâu mplơ̆ prăk ôh.

³ Tơlah păng lăp êng du huê păng mra du luh êng du huê; tơlah păng geh ur păng mra hăn du luh ndrel ma ur păng.

⁴ Tơlah kôranh văng ur ma păng, jêh ri ur păng deh kon bu klâu mâu lah bu ur, păng mra du luh êng păng; ur jêh ri phung kon păng mra jêng ndơ kôranh păng.

⁵ Tơlah nơm dĭk lah: “Gâp rŏng ma kôranh gâp, ur gâp jêh ri phung kon gâp, gâp mâu ŭch ôh du luh jêng kon me,”

⁶ pôri kôranh păng mra njŭn leo păng tanăp Brah Ndu, djôt leo păng hăn ta mpông mâu lah ta n'gâng mpông, jêh nây kôranh nây chuh tôr păng ma mâng mplanh; bunuyh dĭk nây mra pah kan ma kôranh păng lôch nau rêh păng.

⁷ Tơlah mbu tăch kon bu ur păng jêng bu ur kơl kan, bu ur nây mâu mra dơi du luh nâm bu phung dĭk bu klâu.

⁸ Tơlah bu ur nây mâu blau ƀư maak ma kôranh păng jêng nơm sŏk păng ƀư ur yông, kôranh păng ăn ma bu chuai păng luh ƀiălah mâu geh ôh dơi tăch păng ma bu năch.

⁹ Tơlah kôranh păng ŭch prăp bu ur nây ma kon bu klâu păng, ăn păng gŭ ngao ma bu ur nây nâm bu kon bu ur păng.

¹⁰ Tơlah păng sŏk du huê bu ur êng, păng mâu dơi n'hŭch ôh kô̆ ndơ sông sa, kho ao jêh ri nau rŏng ur sai ma bu ur lor.

¹¹ Tơlah kôranh mâu ƀư ôh pe ntil nau aơ, bu ur nây du luh jêng kon me mâu mplơ̆ tay prăk.

Nau vay ma nau tih ƀư djơh

¹² Mbu dong du huê bunuyh kŏ tât khĭt, bu mra nkhĭt păng.

¹³ Ƀiălah, tơlah păng mâu ndra nkhĭt ôh ƀiălah Brah Ndu hŏ jao bunuyh bu mra nkhĭt tâm ti nơm nây, pôri Gâp mra nchŏng du ntŭk ma may gay păng dơi du krap.

¹⁴ Tơlah du huê ndra ŭch rduh lơh jêh ri ndra ŭch tâm nkhĭt bunuyh chiau meng păng, ăn khân may têk păng luh bơh nơng ƀư brah Gâp jêh ri nkhĭt păng.

¹⁵ Mbu dong mbơ̆ mâu lah me păng, bu mra nkhĭt lơi păng.

¹⁶ Mbu nơm nhŭp ntŭng bunuyh, mâu lah hŏ tăch jêh, mâu lah dôl hôm e mât tâm ti păng, bu mra nkhĭt lơi păng.

¹⁷ Mbu nơm rtăp rak mbơ̆ mâu lah me păng nơm, mra nkhĭt lơi păng.

Nau vay tâm djrel jêh ri ƀư sôt rmanh

¹⁸ Lah bar hê bunuyh tâm djrel, jêh ri bunuyh nây dong bunuyh ri ma lŭ mâu lah thŭk ma ti, bunuyh ri mâu ir tât khĭt ôh, ƀiălah bê̆ch tâm sưng bê̆ch mâu dơi dâk;

¹⁹ tơlah jêh nây păng dâk ndăl ma mâng jra dơi hăn luh padih, pôri nơm dong păng nây mra dơi yô̆ an, knŏng ntrok rnoh nau mhĭk tâm du bông rlu kan, jêh ri ăn mât păng kŏ tât păng dơi bah.

²⁰ Tơlah kôranh dong khĭt du huê dĭk bu klâu păng mâu lah dĭk bu ur păng ma mâng, ăn bu tâm rmal păng.

²¹ Ƀiălah tơlah bunuyh dĭk nây hôm e rêh bar pe nar kôranh bunuyh dĭk rklaih nau tih, yorlah bunuyh dĭk nây ơm jêng drăp ndơ kôranh păng.

²² Tơlah phung bunuyh tâm dong ndrăng khân păng jêh ri ƀư sôt ma du huê bu ur geh ntreo, jêh ri nây bu ur rlêh ƀiălah mâu ƀư nau mhĭk êng ôh, nơm ƀư sôt ma bu ur nây, ăn păng ntrok tĭng nâm nau dăn bơh sai bu ur nây jêh ri mplơ̆ prăk tanăp măt phung kôranh phat dôih.

²³ Ƀiălah tơlah geh nau mhĭk jêh ri ăn may sŏk nau rêh ntrok nau rêh,

²⁴ sŏk măt ntrok măt, sŏk sêk ntrok sêk, sŏk ti ntrok ti, sŏk jâng ntrok jâng,

²⁵ ntŭk ŭnh sa ntrok ntŭk ŭnh sa, ntŭk bŭr ntrok ntŭk bŭr, ntŭk sôt ntrok ntŭk sôt.

²⁶ Tơlah du huê kôranh dong ta măt dĭk bu klâu mâu lah dĭk bu ur păng jêh ri ƀư roh măt bunuyh dĭk nây, pôri kôranh bunuyh dĭk ăn ma bunuyh dĭk păng hăn du luh jêng kon me, gay ntrok tay măt nây.

²⁷ Tơlah kôranh păng dong pă sêk bu klâu dĭk mâu lah dĭk bu ur păng, ăn păng bunuyh dĭk păng hăn du luh jêng kon me, gay tâm tay sêk nây.

Nau vay nau ntrok

²⁸ Tơlah du mlâm ndrôk rduh tâm khĭt du huê bu klâu mâu lah bu ur, ăn bu klŭp ndrôk nây ma lŭ tât khĭt; bu mâu dơi ôh sa puăch păng; kôranh tơm ndrôk mra rklaih dôih.

²⁹ Ƀiălah tơlah ndrôk nây alor ri vay rduh tâm bu jêh ri bu buay jêh nau nây ma kôranh tơm ndrôk, ƀiălah păng mâu mât chiăp ôh, kŏ tât ndrôk păng tâm khĭt du huê bu klâu mâu lah du huê bu ur, ăn bu klŭp ndrôk nây ma lŭ jêh ri bu mra nkhĭt lơi kôranh tơm ndrôk.

³⁰ Ƀiălah, tơlah bu dăn rnoh khlay ma kôranh tơm ndrôk chuai nau rêh, ăn păng ăn prăk tĭng nâm rnoh hŏ lah jêh gay chuai nau rêh păng nơm.

³¹ Tơlah ndrôk rduh tâm du huê kon bu klâu mâu lah kon bu ur, bu mra phat kôranh tơm ndrôk tĭng nâm nau vay nây đŏng.

³² Tơlah ndrôk rduh tâm du huê bu klâu dĭk mâu lah du huê bu ur dĭk, nơm tơm ndrôk jan dôih ma kôranh dĭk pe rhiăng gram prăk; bu sŏk lŭ klŭp ndrôk nây tât khĭt.

³³ Tơlah du huê bunuyh pơk ndrŭp trôm ntu mâu lah kuyh ntu jêh ri mâu ôh kŭp tay, jêh ri du mlâm ndrôk mâu lah du mlâm seh bri tŭp tâm ntu nây

³⁴ nơm ntu nây mra ntrok prăk ma nơm mpa nây, ƀiălah mpa nây khĭt mra nsĭt ma nơm tơm ntu.

³⁵ Tơlah ndrôk bunuyh aơ rduh tâm tât khĭt ndrôk bunuyh ri, ăn bar hê khân păng tăch ndrôk hôm rêh jêh ri tâm pă bar rnoh prăk nđâp puăch ndrôk lĕ khĭt.

³⁶ Ƀiălah, tơlah nơm tơm ndrôk gĭt rah vah ndrôk păng nơm alor ri hŏ geh vay tâm ƀiălah mâu mât chiă ôh ndrôk păng ăn păng sŏk ndrôk ntrok ndrôk, ƀiălah ndrôk khĭt nây mra sŏk ma păng nơm.