Nau Ngluh Êjipt 20 - Nau Brah Ndu Ngơi 2023

Jât Ntil Nau Vay

¹ Nôk nây, Brah Ndu lah lĕ rngôch nau aơ:

² “Gâp jêng Yêhôva Brah Ndu khân may, Nơm hŏ ngluh jêh khân may tă bơh n'gor Êjipt, tă bơh ngih dĭk bu.

³ Tanăp măt Gâp may lơi ta geh brah êng ôh.

⁴ Kon mâu dơi ƀư ma may nơm du mlâm rup brah tĭng nâm rup lĕ mpa tâm trôk ta klơ, mâu lah ta neh ntu, mâu lah tâm dak tâm dâng neh ntu.

⁵ May mâu dơi chon mon ta rup nây mâu lah yơk mbah khân păng; yorlah Gâp jêng Yêhôva Brah Ndu may, jêng Brah Ndu blau ntôn. Đah phung bunuyh tâm rmot Gâp, yor nau tih chô yau Gâp mra tâm rmal ma kon sau khân păng tât rô̆ tal pe, tal puăn.

⁶ Ƀiălah Gâp mra ăn nau yô̆ tât rbăn rô̆ ma lĕ phung rŏng ma Gâp jêh ri djôt prăp lĕ nau vay ntăm bơh Gâp.

⁷ May mâu dơi dŏng blă blơ amoh Yêhôva Brah Ndu, yorlah Brah Yêhôva mâu mra yô̆ an mbu dŏng blă blơ amoh Păng.

⁸ Kah gĭt hom nar rlu gay ƀư nar kloh ueh.

⁹ Ăn kon ƀư lĕ rngôch kan may tâm prao nar,

¹⁰ ƀiălah nar tal pơh jêng nar rlu prăp ma Yêhôva Brah Ndu may. Tâm nar nây, may, kon bu klâu, kon bu ur, oh mon bu klâu, oh mon bu ur, mpô mpa may rong, jêh ri bu năch gŭ tâm ngih may, mâu dơi lĕ ƀư du ntil kan.

¹¹ Yorlah tâm prao nar Brah Yêhôva hŏ rhăk njêng trôk, neh ntu, dak mƀŭt, jêh ri lĕ rngôch mpa gŭ tâm nây, ƀiălah Păng rlu tâm nar pơh. Yor ri, Brah Yêhôva ăn nau ueh uĭn ma nar rlu jêh ri ƀư kloh ueh nar nây.

¹² Yơk hom ma mê̆ mbơ̆ may, gay ma may dơi gŭ rêh jŏ klơ neh Yêhôva Brah Ndu ăn ma may.

¹³ May mâu dơi nkhĭt bu.

¹⁴ May mâu dơi ƀư tih văng tĭr.

¹⁵ May mâu dơi ntŭng.

¹⁶ May mâu dơi ngơi nchơt ƀư mhĭk ma phung chiau meng may nơm.

¹⁷ May mâu dơi kơnh ngih phung chiau meng may, mâu dơi kơnh ŭch ur, mâu lah oh mon bu klâu, oh mon bu ur, ndrôk, seh bri mâu lah ăp moh ndơ jêng ndơ phung chiau meng may.”

Nau klach krit tâm phung ƀon lan

¹⁸ Nôk lĕ rngôch phung ƀon lan saơ nglaih lơp jêh ri tăng bâr nŭng jêh ri yôk luh nhhŭk ŭnh, phung ƀon lan râm sâr jêh ri dâk gŭ ngai.

¹⁹ Khân păng lah ma Y-Môis: “Dăn may nơm ngơi đah hên, jêh ri hên mra iăt; ƀiălah dăn Brah Ndu lơi ngơi ôh đah hên, klach lah hên mra khĭt.”

²⁰ Y-Môis lah ma phung ƀon lan: “Lơi klach ôh, yorlah Brah Ndu jŭr gay rlong uănh nuih n'hâm khân may, gay ma khân may klach yơk ma Păng ƀaƀơ, pônây khân may mâu ƀư tih ôh.”

²¹ Phung ƀon lan gŭ dâk ngai, bi Y-Môis hăn dăch ndâr tŭk mbâl, ta ntŭk Brah Ndu dôl gŭ.

Nơng nhhơr ndơ ƀư brah

²² Brah Yêhôva lah ma Y-Môis: “Ăn may ngơi hom ma phung ƀon lan Israel: ‘Khân may nơm hŏ saơ jêh Gâp ngơi tă bơh trôk.

²³ Yor ri khân may mâu dơi ƀư du ntil rup brah ta pĭt Gâp; mâu dơi ƀư ôh ma khân may nơm lĕ rup brah ma prăk mâu lah ma mah.’

²⁴ Ăn may ndâk ma Gâp nơng ƀư brah ma neh jêh ri ta klơ nây nhhơr ndơ ƀư brah gŭch, ndơ ƀư brah ma nau đăp mpăn, mâu lah biăp mâu lah ndrôk khân may. Ta ăp ntŭk Gâp mpơl amoh Gâp gay kah gĭt, Gâp mra văch jêh ri ăn nau ueh uĭn ma may.

²⁵ Tơlah may ndâk ma Gâp du nơng ƀư brah đah lŭ, lơi ƀư păng ma lŭ trah ôh, yorlah tơlah may dŏng ndơ gay ma trah yor ri may hŏ ƀư ƀơ̆ jêh lŭ nây.

²⁶ May lơi ta hao ôh nơng ƀư brah Gâp ma lĕ ntung gung, gay ma săk jăn lơi mpơl ôh nau rhôk tanăp nơng ƀư brah.”