Nau Ngluh Êjipt 2 - Nau Brah Ndu Ngơi 2023

Nau deh Y-Môis jêh ri kon bu ur Pharaôn chông tă bơh dak

¹ Rnôk nây geh du huê bunuyh noi deh bơh phung Lêvi nđăp đah du huê bu ur phung Lêvi jêng ur păng.

² Bu ur nây ntreo jêh ri deh ma du huê kon bu klâu. Saơ kon se jêng ueh, mê̆ păng djôt pôn păng tâm pe khay.

³ Tơlah mâu hôm dơi pôn jŏ ôh, păng sŏk du mlâm bĭ ƀư ma tơm sut, mhĭng ma dak ƀlĭt ƀitumen jêh ri ma dak ƀlĭt n'ho ăn kon se nây tâm bĭ jêh ri nđuh dơm bĭ nây tâm nklang tơm sut ta meng kơh dak krong.

⁴ Ruh kon se nây gŭ ngai ngai gay ma n'gơr uănh oh păng.

⁵ Kon bu ur Pharaôn jŭr ŭm ta dak krong, bi ma phung bu ur kơl kan păng, hăn brô̆ nsong n'gŏ kơh dak krong. Kon bu ur Pharaôn saơ du mlâm bĭ ƀư ma tơm treng tâm nklang tơm sut, đă ro phung bu ur kơl kan chông an.

⁶ Lah păng pơk bĭ, păng saơ kon se; du huê kon se bu klâu jê̆ dôl nhĭm. Yô̆ ma kon se jê̆ nây jêh ri păng lah: “Ngăn ro kon se aơ jêng du huê phung kon Hêbrơ.”

⁷ Ruh kon se jê̆ nây ngơi đah kon bu ur Pharaôn: “klăp lah gâp dơi sâm joi du huê bunuyh sâm mpu tâm phung bu ur me Hêbrơ, gay mât kon se ma ay dơi đŏng bơh?”

⁸ Kon bu ur Pharaôn ơh: “Hăn hom,” pôri bu ur druh nây hăn kuăl me kon se jê̆ nây.

⁹ Kon bu ur Pharaôn lah ma păng: “Djôt hom kon se jê̆ aơ sĭt rong păng ma gâp, jêh nây gâp mra ăn prăk nkhôm ma ay.” Bu ur nây ut ra-u kon se nây sĭt gay rong păng.

¹⁰ Kon se nây hŏ toyh jêh ri blau mĭn, mê̆ păng njŭn kon se nây ma kon bu ur Pharaôn. Păng dơn jêng kon jêh ri moh săk Y-Môis, yorlah păng lah: “Gâp hŏ chông jêh păng tă bơh dak.”

Y-Môis Du Ta N'gor Madian

¹¹ Du nar, lah Y-Môis hŏ toyh jêh, păng hăn luh padih, joi phung ƀon lan păng jêh ri saơ nau kan hŏt rgănh. Păng saơ đŏng du huê bunuyh Êjipt dong du huê bunuyh Hêbrơ jêng oh nâu păng.

¹² Păng uănh jŭm mâu saơ ôh du huê bunuyh, Y-Môis nkhĭt ro nơm Êjipt nây, jêh nây brôi pôn săk jăn nơm nây tâm choih.

¹³ Nar ôi taơ, Y-Môis luh đŏng padih jêh ri saơ bar hê bunuyh Hêbrơ tâm lơh ndrăng nơm, Păng lah ma nơm tih: “Mâm ƀư may dong oh nâu nơm?”

¹⁴ Bunuyh nây plơ̆ lah: “Mbu hŏ dăp jêh may jêng kôranh chiă uănh jêh ri kôranh phat dôih ma hên? Klăp lah may ŭch nkhĭt gâp đŏng tâm ban ma may hŏ nkhĭt jêh du huê bunuyh Êjipt ri bơh?” Y-Môis klach jêh ri mĭn: “Nanê̆ bu hŏ gĭt jêh nau nây.”

¹⁵ Lah Pharaôn tăng nau nây, păng joi nkhĭt Y-Môis. Ƀiălah Y-Môis du bơh Pharaôn. Păng du ndĕ tâm n'gor Madian jêh ri gŭ êp ta du mlâm ntu dak.

¹⁶ Kôranh ƀư brah Madian geh pơh nuyh kon bu ur. Phung bu ur nây hăn tât ntu dak gay bâk dak jêh ri troch bêng bong dơ dak ma mpô mpa rong mbơ̆ khân păng nhêt.

¹⁷ Geh du huê tâm phung rmăk biăp tât jêh ri mprơh phung bu ur nây, ƀiălah Y-Môis dâk gay koh dŏng khân păng jêh ri ăn mpôl mpô mpa rong nây nhêt dak.

¹⁸ Lah phung bu ur plơ̆ sĭt ta ngih mbơ̆ khân păng jêng Y-Rêuel, jêh ri mbơ̆ khân păng ôp: “Mâm ƀư khân ay sĭt ơm nar aơ?”

¹⁹ Khân păng plơ̆ lah: “Geh du huê bunuyh Êjipt hŏ sâm rklaih hên bơh ti phung rmăk biăp, jêh ri sâm bâk dak ăn phung biăp hên nhêt đŏng.”

²⁰ Mbơ̆ khân păng ôp tay: “Aƀaơ bunuyh nây mbah ntŭk? Mâm ƀư khân ay chalơi păng? Ăn khân ay jă bunuyh nây sĭt ta aơ jêh ri ăn sông sa.”

²¹ Y-Môis ŭch đŏng gŭ ndrel ma Y-Rêuel, jêh ri păng nđăp H'Sêpôra, kon bu ur păng, ƀư ur Y-Môis.

²² H'Sêpôra deh du huê kon bu klâu jêh ri Y-Môis tâm amoh Y-Gersôm, yorlah păng lah: “Gâp gŭ njưh tâm n'gor bu năch.”

²³ Jŏ jêh nây, hađăch Êjipt khĭt. Phung ƀon lan Israel vơh vơl, kuăl nter yor nau ƀư dĭk bu, nau khân păng lŭng nter tăng tât ma Brah Ndu.

²⁴ Brah Ndu tăng nau khân păng lung nter jêh ri kah gĭt tay nau tâm rnglăp hŏ ƀư đah Y-Abraham, Y-Isăk, jêh ri Y-Yakôb.

²⁵ Brah Ndu treng uănh phung ƀon lan Israel jêh ri gĭt nanê̆ ngăn nau tât ma khân păng.