Nau Ngluh Êjipt 19 - Nau Brah Ndu Ngơi 2023

Tât ta bri rdah Sinai

¹ Tâm khay tal pe kơp ntơm nôk khân păng luh bơh n'gor Êjipt, ta nar nây yơh phung ƀon lan Israel tât ta bri rdah Sinai.

² Hăn ntơm bơh Rêphidim, khân păng tât ta bri rdah Sinai, jêh ri khân păng ndâk ngih bok tâm bri rdah. Ta nây, phung Israel ndâk ngih bok tra năp yôk.

Kôranh Brah ntĭnh ntăm Y-Môis ta klơ yôk Sinai

³ Y-Môis hăn mâp Brah Ndu. Bơh ta klơ yôk, Brah Yêhôva kuăl păng jêh ri lah: “Ăn may ngơi ma ngih Y-Yakôb, jêh ri lah ma phung ƀon lan Israel pô aơ:

⁴ ‘Khân may hŏ saơ jêh nau Gâp ƀư ma phung Êjipt, Gâp hŏ rdeng khân may ma năr klang ƀŭng, jêh ri mâm nau Gâp njŭn leo jêh khân may ma Gâp nơm.

⁵ Pôri aƀaơ, tơlah khân may tông bâr Gâp jêh ri djôt prăp nau tâm rnglăp Gâp, khân may mra jêng drăp ndơ êng ma Gâp nơm ta nklang lĕ rngôch ƀon lan; nđâp lah lĕ neh ntu jêng ndơ Gâp.

⁶ Khân may mra dơi jêng du ƀon bri hađăch phung kôranh ƀư brah jêh ri du phung mpôl kloh ueh ma Gâp.’ Nĕ jêng lĕ nau may mra ngơi ma phung ƀon lan Israel.”

⁷ Pôri Y-Môis văch jêh ri kuăl phung bu ranh tâm phung ƀon lan, nkoch ăn lĕ nau ngơi Brah Yêhôva hŏ ntăm jêh ma păng.

⁸ Lĕ rngôch phung ƀon lan nsĭt lah n'grŭp. “Hên mra ƀư lĕ nau Brah Yêhôva hŏ ntĭnh ntăm jêh.” Y-Môis mbơh tay ma Brah Yêhôva nau phung ƀon lan ngơi.

⁹ Brah Yêhôva lah: “Aơ, Gâp mra hăn ma may tâm ndâr tŭk mbâl, gay tơlah Gâp ntăm ma may, phung ƀon lan tăng jêh ri rnơm ma may du njăr rêh.” Nôk Y-Môis djôt nau ƀon lan mbơh tay ma Brah Yêhôva,

¹⁰ Brah Yêhôva lah ma Y-Môis: “Hăn hom ma phung ƀon lan, prăp êng khân păng ăn kloh ueh ta nar aơ jêh ri ôi taơ. Đă khân păng pih lơi kho ao khân păng;

¹¹ tât nar tal pe; ăn khân may ndrăp yorlah ta nar nây Brah Yêhôva mra jŭr văch tanăp măt lĕ rngôch phung ƀon lan tâm yôk Sinai.

¹² Ăn may treh n'har ma phung ƀon lan gŭ jŭm yôk, jêh ri ntĭnh khân păng: ‘Njrăng hom, lơi hao ôh ta klơ yôk, mâu lah n'har yôk. Mbu nơm pah n'har yôk mra khĭt.

¹³ Nơm nây bu mra klŭp ma lŭ mâu lah pănh ma hăr, lơi pah ti ta nơm nây ôh. Nđâp lah bunuyh mâu lah mpô mpa mâu dơi ăn rêh ôh.’ Tơlah tăng bâr nŭng, rĭ mơ ăn khân păng dơi hao ta yôk.”

¹⁴ Y-Môis jŭr tă bơh yôk, hăn ta phung ƀon lan jêh ri prăp êng phung ƀon lan ăn kloh ueh. Đă khân păng pih kho ao khân păng.

¹⁵ Păng ntăm ma phung ƀon lan: “Ăn khân may ndrăp kŏ tât nar tal pe. Lơi ta khân may bê̆ch ndrel ma du huê bu ur ôh.”

Brah Ndu tâm mpơl ta klơ yôk Sinai

¹⁶ Kêng ôi tâm nar tal pe, geh nglaih jêh ri ndâr tŭk mbâl ta klơ yôk n'ho ma bâr nŭng huy ngăn. Lĕ rngôch phung ƀon lan gŭ tâm ngih bok râm sâr da dê.

¹⁷ Y-Môis njŭn leo phung ƀon lan du luh bơh ngih bok hăn tâm mâp đah Brah Ndu; phung ƀon lan dơi nsrŭng ta jâng yôk.

¹⁸ Lĕ yôk Sinai bêng ma nhhŭk ŭnh, yor Brah Yêhôva gŭ tâm nklang ŭnh jêh ri jŭr ta nây. Nhhŭk ŭnh hao leo klơ nâm bu nhhŭk ŭnh bơh ŭnh năk toyh, jêh ri lĕ yôk nây n'gơ dăng ngăn.

¹⁹ Bâr nŭng lơ hô nteh huy ngăn. Y-Môis ngơi jêh ri Brah Ndu plơ̆ lah ma bâr nglaih.

²⁰ Brah Yêhôva jŭr ta klơ n'gơn yôk Sinai. Brah Yêhôva kuăl Y-Môis ăn hao ta n'gơn yôk jêh ri Y-Môis hăn hao.

²¹ Brah Yêhôva lah ma Y-Môis: “Hăn jŭr hom jêh ri buay ma phung ƀon lan lơi ăn khân păng sŏl rlau ntŭk hŏ treh gay uănh Brah Yêhôva; tơlah mâu iăt âk tâm phung khân păng mra khĭt.

²² Nđâp lah phung kôranh ƀư brah kđôi lĕ, dôl văch dăch Brah Yêhôva, ăt ŭm rao ăn kloh khân păng nơm mơ; lah mâu iăt Brah Yêhôva mra rmal ma khân păng.”

²³ Y-Môis lah ma Brah Yêhôva: “Phung ƀon lan mâu dơi hao ôh ta klơ yôk Sinai, yorlah May nơm nkah jêh ma hên pô aơ: ‘Treh n'har jŭm yôk, jêh ri prăp êng yôk nây ăn kloh ueh,’”

²⁴ Brah Yêhôva lah ma păng: “Hăn jŭr hom jêh ri leo Y-Arôn hao n'hanh may. Ƀiălah lơi ăn phung kôranh ƀư brah jêh ri phung ƀon lan sŏl rlau ntŭk hŏ treh gay văch dăch Brah Yêhôva, lah mâu iăt Brah Yêhôva mra rmal ma khân păng.”

²⁵ Pôri Y-Môis hăn trŭnh ta phung ƀon lan jêh ri ntĭnh ntăm ma khân păng.