Nau Ngluh Êjipt 18 - Nau Brah Ndu Ngơi 2023

Y-Jêtrô khâl Y-Môis

¹ Y-Jêtrô, kôranh ƀư brah Madian jêh ri jêng po Y-Môis, tăng lĕ rngôch nau Brah Ndu hŏ ƀư an jêh ma Y-Môis jêh ri ma phung Israel Păng tâm ban đŏng Păng ngluh jêh phung Israel luh bơh n'gor Êjipt.

² Kăl e, dôl Y-Môis njuăl ur păng amoh H'Sêpôra sĭt ma ngih Y-Jêtrô jêng po Y-Môis; Y-Jêtrô hŏ dơn jêh H'Sêpôra

³ n'hanh ma bar hê kon bu klâu păng, amoh du huê Y-Gersôm, yorlah Y-Môis lah pô aơ: “Gâp gŭ njưh ƀât lât tâm n'gor bu năch”;

⁴ jêh ri amoh du huê Y-Êliêser, yorlah păng lah: “Brah Ndu chô yau gâp jêng nau kơl gâp, hŏ rklaih jêh gâp bơh đao Pharaôn.”

⁵ Aƀaơ Y-Jêtrô, po Y-Môis, djôt bar hê kon bu klâu jêh ri ur Y-Môis hăn chop khâl Y-Môis ta bri rdah, tâm ntŭk păng ndâk ngih bok êp ta yôk Brah Ndu.

⁶ Y-Jêtrô đă bu mbơh ma Y-Môis: “Gâp jêng Y-Jêtrô, po may, gâp ndrel ma ur may jêh ri bar hê kon bu klâu may tât khâl may.”

⁷ Y-Môis hăn vơt po păng, păn ta neh jêh ri chŭm po păng. Khân păng lup jô̆ khâl, jêh ri lăp tâm ngih bok.

⁸ Y-Môis nkoch tay ma po păng lĕ rngôch nau Brah Yêhôva hŏ ƀư jêh ma Pharaôn jêh ri ma phung Êjipt yor phung Israel, lĕ rngôch nau hŏt rgănh tât ta ma khân păng rŏ trong, jêh ri mâm nau Brah Yêhôva tâm rklaih khân păng.

⁹ Y-Jêtrô răm rhơn yor lĕ nau ueh Brah Yêhôva hŏ ƀư ma phung Israel nôk rklaih khân păng bơh ti phung Êjipt.

¹⁰ Y-Jêtrô lah: “Khư tâm rnê Brah Yêhôva, jêng Nơm hŏ tâm rklaih jêh khân may bơh ti phung Êjipt jêh ri ti Pharaôn, jêh ri rklaih đŏng phung ƀon lan bơh nau dơi phung Êjipt.

¹¹ Aƀaơ gâp gĭt jêh Brah Yêhôva toyh lơn ma lĕ rngôch brah, yorlah dôl phung Êjipt ƀư mhĭk ma phung ƀon lan Păng ma nau dŭt sưr yor ri Păng dơi lơh khân păng.”

¹² Y-Jêtrô, po Y-Môis, nhhơr ndơ ƀư brah gŭch jêh ri mpa ƀư brah ma Brah Ndu. Y-Arôn jêh ri lĕ kôranh bu ranh Israel văch sông sa ndrel ma po Y-Môis, tanăp Brah Ndu.

Ndâk phung kôranh phat dôih

¹³ Rgăn nar ôi taơ, Y-Môis gŭ phat dôih phung ƀon lan. Khân păng dâk jŭm păng ntơm bơh ơm ôi tât kêng mhaơ.

¹⁴ Dôl po păng saơ lĕ nau Y-Môis ƀư ma phung ƀon lan, păng ôp ma Y-Môis: “Moh nau may dôl ƀư ma phung ƀon lan nĕ? Mâm ƀư knŏng êng du huê may gŭ, bi lĕ rngôch phung ƀon lan dâk jŭm may ntơm bơh ơm ôi tât kêng măng?”

¹⁵ Y-Môis lah: “Phung ƀon lan văch ta gâp gay joi nau Brah Ndu ŭch.

¹⁶ Ăp tơ̆ khân păng geh nau, khân păng văch ta gâp jêh ri gâp phat dôih nơm aơ đah nơm ri, jêh ri ăn khân păng gĭt nau vay dăp jêh ri nau vay Brah Ndu.”

¹⁷ Po Y-Môis lah: “Nau may ƀư nây mâu ueh ôh.

¹⁸ May jêh ri phung ƀon lan hăn văch ma may mra huăr ngăn yorlah kan nây jâk ngăn ma may, êng du huê may mâu dơi ƀư ôh.

¹⁹ Aƀaơ, gâp geh nau nkah ma may, iăt hom nau gâp. Dăn Brah Ndu gŭ ndrel ma may! Ăn may jêng nơm tâm tang ma phung ƀon lan tanăp Brah Ndu, jêh ri mbơh lĕ nau khân păng ma Brah Ndu.

²⁰ Ăn may nti hom ma khân păng nau vay dăp jêh ri nau vay, jêh ri ntĭm ăn khân păng gĭt trong khân păng mra tĭng ndô̆, jêh ri nau kan khân păng mra ƀư.

²¹ Rlau lơn ma nĕ, săch hom tâm phung ƀon lan phung bunuyh geh nau blau mĭn, nau klach yơk ma Brah Ndu, nanê̆ ngăn, rmot ma nau sa blŏl drăp, jêh ri ndâk ăn khân păng jêng kôranh mât uănh ma rbăn nuyh, ma rhiăng nuyh, ma prăm jât nuyh, mâu lah ma jât nuyh.

²² Ăn khân păng gŭ phat dôih phung ƀon lan mro, jêh ri mra njŭn tanăp may lĕ nau toyh, bi lĕ nau kan jê̆, ăn phung kôranh nây mra phat dôih êng. Pôri kan may n'gơch lơn, jêh ri khân păng mra kơl kan jâk ndrel ma may.

²³ Tơlah may ƀư kan nây, jêh ri tơlah Brah Ndu ntăm ăn ma may kơt nây lĕ, may mra dơi ƀư jêh lĕ kan, jêh ri phung ƀon lan aơ mra tât ma ntŭk nau đăp mpăn.”

²⁴ Y-Môis iăt tĭng nau po păng jêh ri ƀư tĭng lĕ nau păng đă.

²⁵ Bơh tâm phung Israel, Y-Môis săch lĕ phung blau mĭn, ndâk khân păng jêng kôranh gay mât uănh ma rbăn nuyh, rhiăng nuyh, prăm jât nuyh, mâu lah ma jât nuyh.

²⁶ Khân păng phat dôih phung ƀon lan ƀaƀơ jêh ri khân păng njŭn tanăp Y-Môis nau dôih jâk jêr, bi ma khân păng nơm phat dôih lĕ nau jê̆ jê̆.

²⁷ Jêh nây, Y-Môis njŭn po păng hăn trong plơ̆ sĭt ta n'gor păng nơm.