Nau Ngluh Êjipt 17 - Nau Brah Ndu Ngơi 2023

Phung ƀon lan Israel nduyh ta Rêphidim

¹ Bơh bri rdah Sin, tĭng nâm nau Brah Yêhôva ntăm, lĕ rngôch phung Israel tâm rƀŭn luh dâk hăn trơn tĭng nau ntĭnh, jêh ri ndâk ngih bok ta Rêphidim. Ta nây mâu geh ôh dak nhêt ma phung ƀon lan.

² Phung ƀon lan tâm rlăch đah Y-Môis jêh nây lah: “Ăn hom dak ma hên nhêt.” Y-Môis ơh ma khân păng: “Mâm ƀư khân may joi nau đah gâp? Mâm ƀư khân may janh rlong uănh Brah Yêhôva?”

³ Ƀiălah ta nây phung ƀon lan ji hir dak jêh ri khân păng nduyh ma Y-Môis: “Mâm ƀư may ngluh hên bơh n'gor Êjipt jêh ri gay ăn ma hên, phung kon hên jêh ri mpôl mpô mpa hên rong khĭt ma nau ji hir dak?”

⁴ Y-Môis kuăl dăn ma Brah Yêhôva: “Mâm gâp mra ƀư ma phung ƀon lan aơ? Mâu tŏng ndơ khân păng klŭp gâp ma lŭ!”

Dak brul luh bơh lŭ Hôrep

⁵ Brah Yêhôva lah ma Y-Môis: “Hăn hom panăp phung ƀon lan, leo ndrel ma may phung bu ranh tâm phung Israel jêh ri ti may djôt mâng jra hŏ dong jêh ta dak krong, jêh ri hăn hom.

⁶ Aơ, Gâp mra gŭ tanăp may, ta klơ lŭ tâm yôk Hôrep ri. Ăn may dong lŭ jêh ri dak mra hoch luh bơh lŭ nây, gay ma ăn phung ƀon lan nhêt.” Y-Môis ƀư kơt nây tanăp măt phung bu ranh Israel.

⁷ Y-Môis rnha ntŭk nây jêng Masa jêh ri Mêriba, yorlah phung ƀon lan Israel hŏ joi nau đah păng jêh ri janh rlong uănh Brah Yêhôva dôl khân păng lah: “Brah Yêhôva geh gŭ ta nklang phung hên mâu lah mâu?”

Dơi tâm lơh đah phung Amalek

⁸ Aƀaơ phung tahan Amalek văch ŭch tâm lơh đah phung Israel ta Rêphidim.

⁹ Y-Môis lah ma Y-Yôsuê: “Săch hom ma he phung tahan hăn tâm lơh đah phung Amalek. Ôi taơ gâp mra gŭ dâk ta klơ n'gơn yôk djôt mâng jra Brah Ndu ta ti gâp.”

¹⁰ Y-Yôsuê hŏ tâm lơh đah phung tahan Amalek tĭng nâm nau Y-Môis ntăm; bi ma Y-Môis, Y-Arôn jêh ri Y-Hur hăn hao ta n'gơn yôk.

¹¹ Ăp tơ̆ Y-Môis yơr ti, phung tahan Israel dơi; ƀiălah dôl păng mƀơk ti păng phung tahan Amalek dơi.

¹² Dôl ti Y-Môis hŏ rgănh jêh, khân păng sŏk du mlâm lŭ, dơm tâm dâng ăn Y-Môis gŭ ta klơ lŭ nây; jêh nây Y-Arôn jêh ri Y-Hur dâk kuăn rdâng ti păng, du huê pa chiau, du huê pa ma, rĭ mơ ti păng gŭ nâp tât ta nhâp nar.

¹³ Y-Yôsuê sŏk đao dơi lơh hađăch Amalek jêh ri phung ƀon lan păng.

¹⁴ Brah Yêhôva lah ma Y-Môis: “Nchih hom nau aơ tâm ndrom samƀŭt gay ma ndray jêh ri nkoch ăn ma Y-Yôsuê gĭt nau aơ Gâp mra jut lĕ nau ndray ma phung Amalek tâm neh ntu aơ.”

¹⁵ Y-Môis ndâk du nơng ƀư brah jêh ri rnha nơng nây “Brah Yêhôva jêng n'ha kơ Gâp.”

¹⁶ Y-Môis lah: “Yor du mpang ti Amalek hŏ yơr tâm rdâng đah Brah Yêhôva, rĭ dĭng Brah Yêhôva mra tâm lơh đah phung Amalek tă bơh rô̆ aơ tât rô̆ êng.”