Nau Ngluh Êjipt 16 - Nau Brah Ndu Ngơi 2023

Phung Israel nduyh Kôranh Brah tâm bri rdah Sin

¹ Ta nar jât mprăm, khay tal bar luh bơh n'gor Êjipt lôch jêh, lĕ phung Israel tâm rƀŭn du bơh Êlim gay hăn lăp tâm bri rdah Sin, vah vang Êlim jêh ri Sinai.

² Tâm bri rdah, lĕ phung Israel tâm rƀŭn nduyh ma Y-Môis jêh ri Y-Arôn.

³ Phung ƀon lan Israel lah ma bar hê khân păng: “Ueh lơn hên khĭt ma ti Brah Yêhôva tâm n'gor Êjipt, nôk hôm gŭ dăch glah puăch jêh ri sa ƀănh kŏ hơm! Ƀiălah khân may njŭn tay hên lăp tâm bri rdah aơ gay ăn lĕ rngôch phung ƀon lan aơ khĭt nau ji ngot.”

⁴ Brah Yêhôva lah ma Y-Môis: “Aơ, gay rlong uănh khân păng hăn tĭng nau trŭnh Gâp mâu lah mâu. Gâp mra ăn piăng let bơh trôk nâm bu tŭp dak mih ma khân may jêh ri ăp nar, ăn phung ƀon lan mra hăn dônh piăng let tŏng ma nar nây.

⁵ Ta nar prao, khân păng mra dônh âk lơn đah nar aƀă gay nkrem ma nar ôi taơ.”

⁶ Pôri Y-Môis jêh ri Y-Arôn lah ma lĕ rngôch phung ƀon lan Israel: “Mhaơ aơ, khân may mra gĭt năl Brah Yêhôva hŏ njŭn leo khân may luh bơh n'gor Êjipt;

⁷ jêh ri ôi taơ, khân may mra saơ nau chrêk ma lơp Brah Yêhôva, yorlah Păng hŏ tăng jêh nau khân may nduyh Păng. Bi hên mbu nơm jêng, dĭng khân may nduyh ma hên?”

⁸ Y-Môis lah: “Mhaơ aơ Brah Yêhôva mra ăn puăch ma khân may sa, jêh ri kêng ôi ăn piăng let mra rmeh ler yorlah Brah Yêhôva hŏ tăng jêh nau khân may nduyh Păng. Bi ma hên mbu jêng? Mâu di ma hên ôh khân may nduyh, ƀiălah nduyh ma Brah Yêhôva ya.”

⁹ Y-Môis lah ma Y-Arôn: “Lah hom ma lĕ phung Israel tâm rƀŭn pô aơ: ‘Ăn khân may văch tanăp măt Brah Yêhôva, yorlah Păng hŏ tăng jêh nau khân may nduyh.’ ”

¹⁰ Dôl Y-Arôn hôm ngơi ma lĕ rngôch phung Israel tâm rƀŭn, khân păng uănh mpeh let bri rdah jêh ri saơ ro nau chrêk ma lơp Brah Yêhôva tâm mpơl tâm ndâr tŭk.

¹¹ Brah Yêhôva ngơi ma Y-Môis:

¹² “Gâp hŏ tăng jêh nau phung ƀon lan Israel nduyh. Yor ri, ăn may lah ma khân păng pô aơ: ‘Kêng mhaơ khân may mra sa puăch, kêng ôi khân may mra sa piăng let kŏ tât hơm; jêh ri khân may mra gĭt Gâp jêng Yêhôva Brah Ndu khân may.’”

Sĭm gôi jêh ri mana

¹³ Kêng mhaơ nar nây, sĭm gôi mpăr tât jêh ri nkŭm klơ ngih bok khân păng; bi kêng ôi geh dak ngom nkŭm jŭm ngih bok khân păng.

¹⁴ Lah dak ngom nây sơh roh jêh, klơ neh tâm bri rdah geh moh ndơ jê̆ jê̆, mlâm rbăn nâm bu găr nglang kŏt klơ neh.

¹⁵ Saơ kơt nây, phung ƀon lan Israel tâm ôp ndrăng nơm: “Moh ndơ nây?” Yorlah khân păng mâu gĭt ôh moh ndơ nây jêng. Y-Môis lah ma phung ƀon lan: “Ndơ nây jêng piăng let Brah Yêhôva ăn ma khân may gay ƀư ndơ sa.”

Nau ntĭnh dŏng piăng let mana

¹⁶ “Aơ jêng nau Brah Yêhôva hŏ ntĭnh jêh: ‘Ăn ăp nơm khân may dônh piăng let nây tĭng nâm păng dơi sa, ăp nơm geh du mlâm ô-me, tĭng nâm rnoh bunuyh tâm ngih bok păng.’”

¹⁷ Phung ƀon lan Israel ƀư kơt nây; nơm aƀă dônh âk, geh nơm dônh djê̆.

¹⁸ Ƀiălah dôl khân păng nhueh tĭng tâm bar lit, mbu nơm dônh âk mâu geh ôh lơ ir, jêh ri mbu nơm dônh djê̆ mâu đŏng pưt. Ăp nơm dônh ăn tâm di tŏng ma păng nơm sa.

¹⁹ Y-Môis lah ma khân păng: “Lơi ăn bu huê prăp ndơ nây tât ôi taơ.”

²⁰ Ƀiălah phung ƀon lan mâu iăt ôh nau Y-Môis; bar hê pe bunuyh hŏ prăp tât ôi taơ jêh ri piăng let jêng rhai jêh ri n'hôl ƀâu ôm. Y-Môis ji nuih ma phung nây.

²¹ Pônây, ăp ôi khân păng hăn dônh piăng let, ăp nơm dônh tŏng ma păng nơm sa. Lah nar duh jêh ndơ nây lêk ro.

²² Ta nar prao, khân păng dônh piăng let âk lơn ma nar aƀă, puăn lit ma ăp nơm. Lĕ rngôch phung kôranh chiă uănh phung tâm rƀŭn hăn mbơh rah vah ma Y-Môis.

²³ Y-Môis lah: “Aơ jêng nau Brah Yêhôva hŏ ntĭnh jêh: ‘Ôi taơ jêng nar rlu, jêng nar saƀat kloh ueh ma Brah Yêhôva, gŭch hom moh ndơ khân may ŭch gŭch, gâm hom moh ndơ khân may ŭch gâm, jêh ri moh ndơ hôm rmeh, ăn prăp tât ta ôi taơ.’”

²⁴ Pôri khân păng prăp ndơ nây tât ôi taơ, tĭng nâm Y-Môis hŏ ntĭm nti jêh, ndơ nây mâu geh ôh ƀâu ôm jêh ri mâu lĕ geh rhai.

²⁵ Y-Môis lah: “Nar aơ, sa hom ndơ sông sa nây yorlah jêng nar saƀat ma Brah Yêhôva. Nar aơ, khân may mâu mra saơ ôh ndơ sông sa nây tâm mir.

²⁶ Khân may dônh tâm prao nar, ƀiălah nar tal pơh jêng nar saƀat, mâu mra geh ôh ndơ.”

²⁷ Nđâp lah kơt nĕ, tâm nar tal pơh geh đŏng bar pe bunuyh tâm phung ƀon lan hăn luh gay dônh piăng let jêh ri khân păng mâu dơi saơ ôh du ntil ndơ.

²⁸ Brah Yêhôva lah ma Y-Môis: “Khân may mâu djôt prăp ôh nau vay ntăm jêh ri nau Gâp ntĭm tât ndah nâm jŏ?

²⁹ Ăn khân may kah gĭt hom Brah Yêhôva ăn jêh ma khân may nar saƀat, yor nây tâm nar prao Păng ăn ma khân may piăng let tŏng ma bar nar. Tâm nar pơh, ăn ăp nơm gŭ ta ntŭk păng nơm, lơi ăn bunuyh du luh ôh tă bơh ngih khân păng.”

³⁰ Tâm ban pônây, tâm nar pơh phung ƀon lan rlu.

³¹ Ngih vâl Israel rnha ndơ sa nây jêng mana. Păng jêng nâm bu găr kôriander, nglang, sa kah nâm bu ƀănh lai ma dak sŭt.

³² Y-Môis lah: “Aơ jêng nau Brah Yêhôva hŏ ntĭnh jêh: ‘Nhueh hom bêng bar lit mana, jêh ri prăp tâm ăp rô̆ nuyh, gay ma khân păng saơ piăng let Gâp siăm khân may tâm bri rdah nôk Gâp ngluh khân may luh bơh n'gor Êjipt.’”

³³ Y-Môis lah ma Y-Arôn: “Sŏk hom du mlâm glah jêh ri dâng bêng bar lit mana tâm yăng nây, jêh ri n'gân yăng nây tanăp Brah Yêhôva gay prăp păng tâm ăp rô̆ khân may.”

³⁴ Y-Arôn n'gân glah nây panăp Rlat Nau Tâm Rnglăp gay prăp păng tĭng nâm nau Brah Yêhôva hŏ ntĭnh ma Y-Môis.

³⁵ Phung ƀon lan Israel sa mana tâm puăn jât năm, kŏ tât lăp tâm n'gor khân păng gŭ. Khân păng hŏ sa mana kŏ tât lăp n'har bri n'gor Kanaan.

³⁶ Du ômer jêng du kô̆ tâm jât êpha.