Nau Ngluh Êjipt 15 - Nau Brah Ndu Ngơi 2023

Nau Y-Môis mprơ dơi tâm lơh

¹ Aƀaơ, Y-Môis jêh ri phung ƀon lan Israel mprơ nau mprơ aơ ma Brah Yêhôva: “Gâp mprơ tâm rnê Brah Yêhôva, Yorlah Păng dŭt prêh ma nau rnam ngăn. Păng hŏ mƀăr jêh tâm dak mƀŭt, Seh jêh ri phung tahan ncho seh.

² Brah Yêhôva jêng nau dăng jêh ri jêng nau gâp mprơ: Păng jêng Nơm tâm rklaih gâp. Păng jêng Brah Ndu gâp, gâp tâm rnê ma Păng; Jêng Brah Ndu chô yau gâp, gâp yơk mbah ma Păng.

³ Brah Yêhôva jêng du huê tahan; Amoh Păng jêng Brah Yêhôva.

⁴ Păng hŏ mƀăr jêh ndeh seh jêh ri lĕ phung tahan Pharaôn tâm dak mƀŭt; Phung kôranh tahan toyh păng săch hŏ ngâm jêh tâm Dak Mƀŭt Chăng,

⁵ Ntŭk jru hŏ brôi jêh khân păng; Khân păng ngâm jêh tâm dâng dak mƀŭt nâm bu du mlâm lŭ.

⁶ Ơ Brah Yêhôva! Ti ma May chrat ang nau rnam. Ơ Brah Yêhôva! Ti ma May ƀư rai jêh phung rlăng.

⁷ Ma nau rnam dŭt prêh ngăn, May dơi lơh phung rlăng. May mpơl nau ji nuih, Su khân păng nâm bu ŭnh sa rhe.

⁸ N'hâm nsôr tă bơh trôm muh May ƀư rgum dak, Dĭng lĕ n'hong dak rŭn n'hao ndâk nâm bu pêr; Dak jru jêng dăng tâm dâng dak mƀŭt.

⁹ Phung rlăng lah: ‘Gâp hăn tĭng, gâp mra ban; Gâp mra tâm pă ndơ pit sŏk. Nau gâp kơnh mra dơi mpay. Gâp tŏk đao; ti gâp mra ƀư rai khân păng.’

¹⁰ May hŏ nsôr jêh n'hâm, dak mƀŭt rdŭl bŭk khân păng; Khân păng ngâm nâm bu rchuăl ndrak tâm n'hong dak ktang.

¹¹ Ơ Brah Yêhôva! Tâm phung brah, mbu moh jêng tâm ban ma May? Mbu dơi jêng nâm bu May, chrêk rmah tâm nau kloh ueh, Khư ma nau klach yơk jêh ri tâm rnê, Ƀư lĕ nau kan khlay ir?

¹² May nto jêh ti ma may, Neh hŏ rvăn jêh khân păng.

¹³ Ma nau May rŏng may têk ndrêng phung ƀon lan may hŏ chuai jêh; May hŏ njŭn khân păng ma nau brah May tât ma ntŭk kloh ueh May gŭ.

¹⁴ Lĕ phung ƀon lan tăng jêh nau nây klach râm sâr da dê, Nau klach krit lăp tâm phung Philistin.

¹⁵ Phung kôranh n'gor Êđôm geh nau rŭng răng; Phung nanh janh n'gor Môap râm sâr; Lĕ rngôch phung Kanaan krit kir da dê.

¹⁶ Nau klach jêh ri nau krit tât ma khân păng; Ơ Brah Yêhôva! Yor ti nau brah May, Khân păng jêng mlo nâm bu lŭ, kŏ tât phung ƀon lan May rgăn jêh; Kŏ tât phung ƀon lan May sâm chuai rgăn lăn jêh.

¹⁷ Brah Yêhôva ơi! May leo phung ƀon lan nây lăp, jêh ri ăn khân păng gŭ klơ yôk drăp ndơn May, Jêng ntŭk May hŏ nkra jêh gay ƀư ntŭk May gŭ, Ơ Kôranh Brah! Nây jêng ntŭk kloh Ueh bơh ti May hŏ ndâk njêng jêh.

¹⁸ Brah Yêhôva mra chiă uănh n'ho ro, mro mrăng.”

¹⁹ Lah seh, ndeh seh, jêh ri phung tahan ncho seh Pharaôn hŏ trŭnh jêh tâm dak mƀŭt, Brah Yêhôva mplơ̆ dak mƀŭt bŭk bôr klơ khân păng. Ƀiălah phung ƀon lan Israel hăn ta neh sơh tâm nklang dak mƀŭt.

Nau mprơ bơh H'Miriam

²⁰ Aƀaơ, bu ur H'Miriam nơm mbơh lor, ruh Y-Arôn, ta ti djôt du mlâm gâr jê̆, jêh ri lĕ rngôch phung bu ur tĭng ndô̆ păng djôt gâr jê̆ da dê jêh ri pâl ntalơ̆.

²¹ H'Miriam mprơ pô aơ: “Mprơ hom ma Brah Yêhôva Yorlah Păng dŭt prêh geh nau rnam. Păng hŏ mƀăr jêh tâm dak mƀŭt Seh jêh ri rmăk seh.”

Phung Israel hăn tâm bri rdah ( 15:22 – 40:38 ) Dak tăng ta Mara

²² Jêh nây, Y-Môis njŭn leo phung Israel du luh bơh Dak mƀŭt Chăng, hăn lăp tâm bri rdah Sur. Khân păng hăn pe nar tâm bri rdah ƀiălah mâu saơ ôh dak.

²³ Lah khân păng tât jêh ta Mara, yorlah dak ta Mara nây tăng khân păng mâu dơi nhêt; yor nây bu rnha ntŭk nây Mara.

²⁴ Phung ƀon lan ngơi njang bâr ma Y-Môis: “Moh ndơ he mra sŏk gay ma nhêt?”

²⁵ Y-Môis kuăl dăn ma Brah Yêhôva. Brah Yêhôva ntĭm ma păng du n'gâng tơm si, păng nklăch tơm si nây tâm dak jêh ri dak jêng ueh. Ta aơ Brah Yêhôva ăn jêh nau vay dăp jêh ri nau vay dăp ma phung ƀon lan, jêh ri ta aơ đŏng Brah Yêhôva rlong uănh nuih n'hâm khân păng.

²⁶ Brah Ndu lah: “Tơlah khân may gŭ iăt nanê̆ bâr Yêhôva Brah Ndu khân may, ƀư nau di tanăp măt Gâp, rkêng tôr iăt lĕ nau vay ntăm jêh ri djôt prăp dĭng lĕ nau vay dăp bơh Gâp, pôri Gâp mâu mra ăn tât ôh ma khân may du ntil nau ji tâm lĕ ntil nau ji Gâp hŏ ƀư jêh ma phung Êjipt. Gâp jêng Brah Yêhôva, Nơm ƀư bah nau ji khân may.”

²⁷ Jêh nây, phung ƀon lan tât ta Êlim ta nây geh jât ma bar tu dak jêh ri pơh jât n'gâng tơm đung. Phung ƀon lan ndâk ngih bok ta meng n'hor dak.