Nau Ngluh Êjipt 14 - Nau Brah Ndu Ngơi 2023

Pharaôn hăn tĭng phung ƀon lan Israel

¹ Brah Yêhôva lah ma Y-Môis:

² “Ntĭnh hom ma phung ƀon lan Israel plơ̆ sĭt tay ndâk ngih bok tanăp Pi-hahirôt, vah vang Mikdôl jêh ri dak mƀŭt, tâm tham đah Baal-Sêphôn. Ăn khân may ndâk ngih bok ta ntŭk nây, dăch kơh dak mƀŭt.

³ Yorlah Pharaôn mra lah ma phung Israel pô aơ: ‘Phung ƀon lan nây dôl nsong mblêng tâm n'gor; bri rdah hŏ nchueng jêh jŭm khân păng.’

⁴ Gâp mra ƀư dăng nuih n'hâm Pharaôn, jêh ri păng mra hăn tĭng phung ƀon lan nây. Ƀiălah Gâp mra dơi geh nau tâm rnê yor Pharaôn jêh ri lĕ rngôch phung tahan păng; phung Êjipt mra gĭt Gâp jêng Brah Yêhôva.” Phung ƀon lan Israel hŏ ƀư di kơt nây.

⁵ Lah bu mbơh ma hađăch Êjipt phung ƀon lan Hêbrơ du jêh, nuih n'hâm Pharaôn jêh ri phung oh mon păng đah phung ƀon lan nây tâm rgâl ro, khân păng lah: “Moh nau he hŏ ƀư kơt nây, mƀơk phung Israel hăn du, gay ma mâu hôm ăn khân păng pah kan ma he đŏng ƀơh?”

⁶ Pharaôn ndrăp ndeh seh jêh ri leo phung tahan hăn.

⁷ Păng djôt prao rhiăng ndeh seh dŭt ueh jêh ri lĕ rngôch ndeh seh êng tâm n'gor Êjipt; ăp ndeh seh geh phung kôranh tahan chiă uănh ncho da dê.

⁸ Brah Yêhôva ƀư dăng nuih Pharaôn, hađăch Êjipt jêh ri păng hăn tĭng phung ƀon lan Israel, tâm nôk phung ƀon lan Israel hăn du luh ma nau janh.

⁹ Phung Êjipt hăn tĭng khân păng ma seh, ndeh seh, phung tahan ncho seh, nđâp phung tahan Pharaôn hăn tĭng jêh ri ban phung Israel, dôl khân păng ndâk ngih bok ta kơh dak mƀŭt, dăch Pi-hahirôt, tâm tra đah Baal-Sêphôn.

¹⁰ Lah Pharaôn tât dăch, phung ƀon lan Israel n'gơr uănh saơ phung Êjipt dôl hăn tĭng. Khân păng klach hâu ngăn, nter lŭng ma Brah Yêhôva.

¹¹ Khân păng lah ma Y-Môis: “Ơm mâu tŏng ntu môch tâm n'gor Êjipt dĭng may njŭn leo hên khĭt tâm bri rdah aơ? May leo phung hên luh bơh n'gor Êjipt mâm ndơ ƀư ŭch hơh?

¹² Mâu di hên hŏ lah jêh ma may ta n'gor Êjipt pô aơ: ‘Kđôi phung hên, ăn hên pah kan ma phung Êjipt’ di bơh? Yorlah hên ƀư dĭk ta nây jêng ueh lơn hên khĭt tâm bri rdah!”

¹³ Y-Môis lah ma phung ƀon lan: “Lơi klach ôh, iăt ma gŭ nâp jêh ri mra saơ nau tâm rklaih bơh Brah Yêhôva mra ƀư ăn ma khân may nar aơ. Lĕ phung Êjipt khân may saơ nar aơ mâu hôm ôh mra saơ.

¹⁴ Brah Yêhôva mra tâm lơh an ma khân may, bi khân may ăn gŭ rklăk.”

¹⁵ Brah Yêhôva lah ma Y-Môis: “Mâm ƀư may nter ma Gâp? Đă hom phung ƀon lan Israel ăn hăn panăp.

¹⁶ Bi may, djôt leo hom mâng jra, nto ti may ta klơ n'ha dak mƀŭt jêh ri tâm nkhah dak bar ding gay ma phung ƀon lan Israel hăn ta neh sơh rgăn dak mƀŭt.

¹⁷ Gâp mra ƀư dăng nuih n'hâm phung Êjipt gay ma khân păng tĭng phung Israel trŭnh tâm dak mƀŭt; Gâp mra geh nau tâm rnê yor Pharaôn, yor lĕ rngôch phung tahan, ndeh seh, jêh ri lĕ rngôch phung tahan ncho seh păng.

¹⁸ Lah Gâp geh nau tâm rnê yor Pharaôn, ndeh seh păng, jêh ri phung tahan ncho seh păng, ri mơ phung Êjipt mra gĭt ma Gâp jêng Brah Yêhôva.”

¹⁹ Tông mpăr Brah Ndu ơm vay hăn lor panăp rmlak tahan phung Israel, hŏ trơn jêh jêh ri hăn pakơi khân păng; bi n'gâng tŭk hŏ trơn jêh bơh panăp khân păng hăn mpeh pakơi,

²⁰ gŭ ta vah vang rmlak tahan phung Êjipt jêh ri rmlak tahan phung Israel. Ndâr tŭk ƀư mpeh đah aơ geh nau ngo ƀiălah mpeh đah ri dơi sol ang rĭ dĭng tâm du măng nây bar đah ding phung nây mâu dơi tâm văch dăch ôh.

Rgăn Dak Mƀŭt Chăng

²¹ Y-Môis yơr ti ta klơ dak mƀŭt; tâm măng nây, Brah Yêhôva ƀư ăn sial tă bơh lơ khôm dăng ngăn gay ma nsŭn dak mƀŭt. Brah Ndu ƀư ma dak tâm nkhah bar ding, dak mƀŭt jêng neh sơh.

²² Phung ƀon lan Israel hăn klơ neh sơh gay rgăn dak mƀŭt; bi dak jêng nâm bu pêr pa ma jêh ri pa chiau khân păng.

²³ Phung Êjipt hăn tĭng khân păng. Lĕ rngôch seh, ndeh seh jêh ri phung tahan ncho seh Pharaôn tĭng khân păng trŭnh tâm dak mƀŭt da dê.

²⁴ Kêng ơm ôi, Brah Yêhôva bơh n'gâng tŭk jêh ri n'gâng ŭnh gŭ uănh ma phung tahan Êjipt jêh ri ƀư ma khân păng uh ah.

²⁵ Brah Ndu doh jâng ndeh seh khân păng, ƀư ăn khân păng ƀĭt ndeh seh hŏt rgănh. Phung Êjipt tâm lah ndrăng khân păng nơm. “Ăn he nchuăt bơh phung Israel, yorlah Brah Yêhôva tâm tang an ma ƀon lan nây tâm lơh đah phung Êjipt.”

²⁶ Brah Yêhôva lah ma Y-Môis: “Yơr hom ti may klơ dak mƀŭt gay ma dak plơ̆ tay nkŭm bŭk phung Êjipt, nđâp ndeh seh jêh ri phung tahan ncho seh khân păng.”

²⁷ Ƀhit ang, Y-Môis yơr ti păng ta klơ dak mƀŭt jêh ri dak mƀŭt plơ̆ tay nâm bu ơm. Phung Êjipt nchuăt du ƀiălah Brah Yêhôva nklơ̆ khân păng trŭnh tâm dak mƀŭt.

²⁸ Dak plơ̆ tay nkŭm bŭk ndeh seh, phung tahan ncho seh, nđâp lĕ rngôch phung tahan Pharaôn jêh ri nđâp ma phung hŏ tĭng phung Israel tâm dak mƀŭt mâu geh ôh du huê bunuyh hôm klen.

²⁹ Bi phung ƀon lan Israel rgăn dak mƀŭt nâm bu hăn ta neh sơh, dak jêng pêr pa ma jêh ri pa chiau khân păng.

³⁰ Tâm nar nây, Brah Yêhôva rklaih phung Israel bơh ti phung Êjipt, khăn păng saơ phung Êjipt ih săk jăn khĭt ta kơh dak mƀŭt.

³¹ Phung Israel saơ jêh nau kan krit ngăn Brah Yêhôva hŏ ƀư ma phung Êjipt yor ri khân păng klach yơk ma Păng, nsing rnơm ma Păng jêh ri rnơm ma Y-Môis, oh mon Păng.