Nau Ngluh Êjipt 13 - Nau Brah Ndu Ngơi 2023

Ndray nar luh du bơh Êjipt

¹ Brah Yêhôva lah ma Y-Môis:

² “Ăn may nhhơr hom ma Gâp lĕ rngôch kon bôk rah bu deh jêh tâm phung Israel, nđâp bunuyh nđâp mpô mpa, yorlah lĕ rngôch kon dak bôk jêng ndơ Gâp da dê.”

³ Y-Môis lah ma phung ƀon lan: “Ăn khân may ndray nar aơ, yorlah aơ jêng nar Brah Yêhôva dŏng mpang ti nau brah gay djôt khân may luh bơh n'gor Êjipt, jêng luh bơh ngih dĭk bu, lơi sa ôh piăng let geh ndrui.

⁴ Nar aơ, khân may hăn du luh di tâm khay Abip.

⁵ Pôri, nôk Brah Yêhôva njŭn khân may lăp tâm n'gor phung Kanaan, phung Hitit, phung Amôrit, phung Hivit, jêh ri phung Jêbusit, jêng n'gor bêng ma dak toh jêh ri dak sŭt, Păng hŏ ton ma chô yau khân may mra ăn ma khân may, pôri lah tât khay aơ khân may kah gĭt prăp nau vay rƀŭn nây.

⁶ Tâm pơh nar, khân may mra sa piăng let mâu geh ndrui; tât nar tal pơh, ăn nkra nar rƀŭn ma Brah Yêhôva.

⁷ Ăn khân may sa piăng let mâu geh ndrui tâm pơh nar; piăng let geh ndrui mâu lah ndrui mâu mra dơi mpơl ôh tâm ăp ntŭk lam n'gor khân may.

⁸ Tâm nar nây, ăn khân may rblang ma kon bu klâu khân may: ‘Gâp ƀư kơt nây yor lĕ nau Brah Yêhôva ƀư ueh jêh ma gâp nôk gâp du luh bơh n'gor Êjipt.’

⁹ Jêh ri mpeh ma khân may, nây mra jêng nâm bu du nau mbên ta ti khân may, du nau ndray ta vah vang bar ding măt khân may gay ma nau vay bơh Brah Yêhôva gŭ tâm trôm mbung khân may; yorlah Brah Yêhôva hŏ dŏng ti nau brah gay leo khân may du luh bơh n'gor Êjipt.

¹⁰ Pôri tâm ăp năm, ăn khân may djôt prăp nau rƀŭn aơ di nôk yan hŏ nal jêh.”

Nau nhhơr kon bôk rah

¹¹ “Lah Brah Yêhôva hŏ njŭn jêh khân may lăp ta n'gor Kanaan, tâm ban Păng hŏ ton jêh ma khân may jêh ri chô yau khân may, jêh ri lah Păng hŏ ăn jêh n'gor nây ma khân may,

¹² ăn khân may nhhơr hom ma Brah Yêhôva kon bu klâu bôk rah nđâp lĕ kon nkuăng dak bôk tâm phung mpô mpa rong khân may, yorlah khân păng jêng ndơ Brah Yêhôva.

¹³ Ƀiălah ma kon seh bri dak bôk, ăn khân may chuai đah du mlâm biăp kon mâu lah be kon; tơlah mâu, ăn khân may juet lơi trô ko păng. Ăn khân may chuai đŏng ăp nơm kon bu klâu bôk rah tâm phung kon bu klâu khân may.

¹⁴ Tâm nar kăndơ̆ taơ lah kon bu klâu khân may ôp: ‘Nau aơ mâm jêng?’ ăn khân may plơ̆ lah: ‘Yorlah Brah Yêhôva hŏ dŏng ti nau brah Păng gay ngluh he du luh bơh n'gor Êjipt, rklaih bơh ngih dĭk bu.

¹⁵ Nôk Pharaôn dăng nuih n'hâm mâu ăn ôh hên hăn du luh, Brah Yêhôva hŏ nkhĭt lĕ rngôch kon dak bôk tâm n'gor Êjipt, ntơm bơh kon bu klâu bôk rah bunuyh kŏ tât kon dak bôk mpô mpa rong. Yor nây dĭng gâp nhhơr ma Brah Yêhôva dĭng lĕ rngôch kon nkuăng dak bôk jêng ndơ ƀư brah, jêh ri tâm chuai kon bu klâu bôk rah tâm phung kon bu klâu gâp.’

¹⁶ Nây mra jêng du nau mbên ta ti jêh ri ndơ kât klơ ndăr kleng ta nklang bar ding măt khân may, gay ma nkah pô aơ Brah Yêhôva hŏ dŏng ti nau brah Păng djôt hên du luh bơh n'gor Êjipt.”

Phung Israel hăn mŭt tâm bri rdah

¹⁷ Nôk Pharaôn ăn phung ƀon lan Israel hăn du luh, Brah Ndu mâu njŭn leo ôh khân păng hăn rŏ trong găn n'gor Philistin, nđâp lah trong nây dăch lơn, yorlah Brah Ndu lah: “Klach lah phung ƀon lan saơ nau tâm lơh, khân păng mra rgâl nau mĭn jêh ri plơ̆ sĭt tay ta n'gor Êjipt.”

¹⁸ Rĭ dĭng Brah Ndu njŭn leo phung ƀon lan hăn ndăch tĭng trong tâm bri rdah, sĭt let Dak Mƀŭt Chăng. Nôk luh bơh n'gor Êjipt, phung ƀon lan Israel geh ndrăp jêh ndơ gay tâm lơh.

¹⁹ Y-Môis djôt leo nđâp nting Y-Yôsep, yorlah alor Y-Yôsep hŏ đă phung ƀon lan Israel ton ngăn dôl păng ngơi: “Nanê̆ Brah Ndu mra khâl khân may; djôt hom nting gâp ndrel ma khân may du luh bơh ntŭk aơ.”

N'gâng tŭk jêh ri n'gâng ŭnh

²⁰ Lah du jêh bơh Sukôt, khân păng ndâk ngih bok ta Êtam, ta n'har bri rdah.

²¹ Brah Yêhôva hăn lor panăp khân păng; nôk nar khân păng gŭ tâm du n'gâng tŭk gay leo trong hăn, nôk măng khân păng gŭ tâm du n'gâng ŭnh gay sol ang; tă bơh nây khân păng dơi hăn nôk nar nđâp măng.

²² N'gâng tŭk nôk nar, n'gâng ŭnh nôk măng mâu geh du ngai ôh bơh phung ƀon lan.