Nau Ngluh Êjipt 12 - Nau Brah Ndu Ngơi 2023

Njêng rƀŭn Nau Găn

¹ Ta Êjipt, Brah Yêhôva lah ma Y-Môis jêh ri Y-Arôn pô aơ:

² “Khay aơ mra jêng khay tal nguay ăn ma khân may, nây jêng khay nguay tâm năm.

³ Ngơi hom ma lĕ rngôch phung Israel tâm rƀŭn pô aơ tâm nar tal jât khay aơ, ăp kôranh ngih vâl nhŭp du mlâm biăp kon, ăp ngih du mlâm biăp.

⁴ Tơlah ngih nây ƀhôi bunuyh, mâu dơi sa lĕ du mlâm biăp, yor ri tĭng nâm rnoh bunuyh nsum ndrel ma phung chiau meng dăch lơn; jêh ri tĭng nâm dơi sa ăp bunuyh gay kơp rnoh biăp kon.

⁵ Nhŭp hom tâm mpôl phung biăp mâu lah tâm mpôl phung be khân may, du mlâm biăp kon nkuăng mâu lah be kon nkuăng tâm du năm, mâu geh têl khap ôh;

⁶ djôt prăp păng tât ta nar jât mpuăn khay aơ; nây jêng nar ma lĕ phung Israel tâm rƀŭn mra nkhĭt mpa kêng măng.

⁷ Khân păng mra sŏk mham mhĭng ta bar đah mbong rdâk jêh ri mbong rkăng ta mpông luh lăp mbu ngih geh sa puăch biăp kon nây.

⁸ Tâm măng nây khân păng mra sa puăch nđông ta ŭnh nđâp piăng let mâu geh ndrui jêh ri trao tăng.

⁹ Lơi ta khân may sa puăch mâu hŏ sĭn mâu lah puăch gâm ƀiălah ăn khân may nđông ta ŭnh nđâp ma bôk păng, jâng păng jêh ri ndơ tâm trôm ndŭl.

¹⁰ Lơi ta khân may ăn ndơ rmeh tât ôi taơ; tơlah moh ndơ hôm e, su lơi ma ŭnh.

¹¹ Ăn khân may sa nôk nây tĭng kơt aơ: Rêt rse bŭt, jâng nsoh ntâu jot, ti djôt mâng jra, sông sa ndal. Nây jêng rƀŭn Nau Găn ma Brah Yêhôva.

¹² Tâm măng nây, Gâp mra hăn lam n'gor Êjipt, ƀư nđêh nji lĕ rngôch kon bôk rah tâm n'gor Êjipt, nđâp bunuyh jêh ri mpô mpa. Gâp mra phat dôih lĕ rngôch brah n'gor Êjipt yorlah Gâp jêng Brah Yêhôva.

¹³ Mhĭng mham ta klơ ngih khân may dôl gŭ, mra jêng nau tâm mbên ăn ma khân may. Nôk Gâp ƀư nau nđêh nji tâm n'gor Êjipt, saơ mham nây Gâp mra hăn rgăn jêh ri mâu mra geh ôh nau mhĭk tât gay ƀư rai khân may.

¹⁴ Nau aơ mra jêng du nau ndray ma khân may. Tâm lĕ rngôch rô̆ ăn khân may mât păng tâm ban du nar rƀŭn ma Brah Yêhôva, jêng nau ntăm djôt prăp n'ho ro.

¹⁵ Tâm pơh nar ăn khân may sa piăng let mâu geh ndrui. Ta nar tal nguay, ăn khân may sŏk mƀăr lơi ndrui bơh ngih khân may, yorlah tơlah mbu sa piăng let geh ndrui ntơm bơh nar tal nguay tât ta nar tal pơh, mra ngluh lơi nơm nây bơh phung Israel.

¹⁶ Nar tal nguay, khân may mra geh nau tâm rƀŭn kloh ueh; tât nar tal pơh khân may ăt mra geh nau tâm rƀŭn kloh ueh tâm ban lĕ. Tâm lĕ nar nây, khân may mâu dơi ôh ƀư du ntil kan, knŏng ndrăp ndơ sông sa ma ăp nơm ri dơm.

¹⁷ Pôri ăn khân may kah gĭt nau rƀŭn Piăng Let Mâu Geh Ndrui yorlah di tâm nar aơ Gâp hŏ djôt phung tahan khân may luh bơh n'gor Êjipt. Yor ri, tâm lĕ rngôch rô̆ ăn khân may kah gĭt prăp nar aơ nâm bu du nau ntăm n'ho ro.

¹⁸ Ntơm bơh mhaơ nar jât ma puăn khay nguay ăn khân may mra sa piăng let mâu geh ndrui kŏ tât mhaơ ta nar bar jât ma nguay khay nĕ.

¹⁹ Tâm pơh nar, lơi ăn geh ndrui ôh tâm ngih khân may; nđâp lah bu năch mâu lah bunuyh tơm bri, tơlah mbu sa piăng let geh ndrui mra ngluh lơi bơh phung Israel tâm rƀŭn.

²⁰ Lơi sa ôh ndơ sông sa geh ndrui. Nđâp lah mbah ntŭk khân may gŭ tâm ban lĕ ăn sa piăng let mâu geh ndrui.”

²¹ Y-Môis jă lĕ rngôch kôranh bu ranh Israel tât jêh ri lah: “Hăn sŏk hom du mlâm biăp kon tĭng nâm rnăk vâl khân may jêh ri nkhĭt biăp nây ƀư rƀŭn Nau Găn.

²² Jêh nây sŏk du nchăp hisôp mbŭk lăp mham tâm ngan grưng, mhĭng mham ta mbong rkăng jêh ri ta mbong rdâk mpông luh lăp. Ntơm bơh nây tât ang ôi, mâu geh ôh du huê tâm oh nâu khân may dơi luh du bơh bôk mpông ngih păng.

²³ Brah Yêhôva mra hăn rgăn gay ƀư nđêh nji phung Êjipt; dôl saơ mham ta mbong mpông luh lăp, Păng mra hăn rgăn ro jêh ri mâu ăn ôh tông mpăr ƀư rai lăp tâm ngih khân may gay ƀư nau nđêh nji.

²⁴ Djôt prăp hom nau rƀŭn aơ jêng nau ntăm n'ho ro ăn ma khân may jêh ri ma phung kon sau khân may.

²⁵ Lah khân may lăp jêh tâm neh Brah Yêhôva mra ăn ma khân may tĭng nâm Păng hŏ ton jêh, ăn khân may djôt prăp nau rƀŭn aơ.

²⁶ Lah phung kon sau khân may ôp: ‘Nau rƀŭn aơ mâm jêng?’

²⁷ Ăn khân may ơh: ‘Kan aơ jêng nhhơr mpa ƀư brah ma Nau Găn tanăp Brah Yêhôva. Yorlah nôk ƀư nau nđêh nji phung Êjipt, Păng hŏ găn lĕ ngih phung Israel jêh ri rklaih ngih phung he.’”

²⁸ Jêh iăt, phung ƀon lan Israel kŭnh bôk yơk mbah, jêh nây khân păng hăn jêh ri ƀư tĭng nâm Brah Yêhôva hŏ ntăm jêh ma Y-Môis jêh ri Y-Arôn.

Nau mhĭk tal jât: Nkhĭt phung kon bôk rah

²⁹ Ta klong măng, Brah Yêhôva ƀư nau nđêh nji lĕ rngôch phung kon bôk rah tâm n'gor Êjipt, ntơm bơh kon bôk rah Pharaôn nơm dôl chiă uănh kŏ tât kon bôk rah lĕ rngôch phung bu nă dôl krŭng tâm ndrung, nđâp ma lĕ rngôch kon dak bôk mpô mpa rong.

³⁰ Dôl măng, Pharaôn jêh ri phung oh mon păng nđâp ma lĕ rngôch phung Êjipt dâk bê̆ch da dê. Geh nau nhĭm lŭng nter tâm n'gor Êjipt yorlah ăp ngih geh bunuyh khĭt da dê.

³¹ Tâm măng nây lĕ, Pharaôn kuăl Y-Môis jêh ri Y-Arôn văch jêh ri lah: “dâk hom bar hê khân may jêh ri phung Israel, du hom tă bơh phung ƀon lan gâp jêh ri hăn pah kan hom ma Brah Yêhôva tĭng nâm khân may hŏ lah jêh.

³² Djôt leo nđâp phung biăp jêh ri phung mpa rong khân may hăn luh tĭng nâm khân may hŏ lah jêh, jêh ri ăn nau ueh uĭn ma gâp đŏng.”

³³ Phung Êjipt ntrŭt ndal phung ƀon lan Israel gay gơnh hăn luh bơh n'gor khân păng jêh ri lah: “He mra khĭt lĕ rngôch!”

³⁴ Pôri phung ƀon lan djôt rnih ê hŏ pot ndrui jêh ri nklâm lĕ thŭng piăch rnih tâm bok ao khân păng jêh ri tuy ta săng nglik.

³⁵ Phung ƀon lan Israel hŏ ƀư jêh tĭng nâm nau Y-Môis ntĭnh, khân păng dăn ma phung Êjipt ăp ntil ndơ khlay ma prăk, ma mah, jêh ri kho ao.

³⁶ Brah Yêhôva ƀư ma phung ƀon lan geh nau yô̆ tanăp măt phung Êjipt, yor ri khân păng ăn tĭng nâm ndơ phung Israel dăn. Kơt nây, phung Israel pit sŏk drăp ndơ phung Êjipt.

³⁷ Phung ƀon lan Israel hăn ntơm bơh Ramsê tât ta Sukôt; klăp lah prao rsen bu klâu brô̆ jâng, mâu kơp ôh phung bu ur jêh ri phung kon se.

³⁸ Geh âk đŏng phung bu năch hăn ndrel, djôt leo âk ngăn phung biăp jêh ri mpô mpa rong.

³⁹ Khân păng gŭch piăng let mâu geh ndrui ƀư ma rnih hŏ djôt leo bơh n'gor Êjipt. Rnih nây mâu geh ndrui yorlah bu nsot khân păng ndal ir bơh n'gor Êjipt, yor ri mâu năn ndrăp lor ndơ sông sa.

⁴⁰ Nau jŏ phung ƀon lan Israel gŭ tâm n'gor Êjipt geh puăn rhiăng pe jât năm.

⁴¹ Di tâm nar nglĕ dŭt puăn rhiăng pe jât năm, lĕ rngôch phung tahan Brah Yêhôva du luh bơh n'gor Êjipt.

⁴² Măng nây jêng măng Brah Yêhôva kâp njrăng, yorlah tâm măng nây Păng hŏ djôt phung Israel luh bơh n'gor Êjipt. Yor nây, tâm lĕ rngôch rô̆, phung ƀon lan Israel kah gĭt prăp măng nây gây yơk mbah ma Brah Yêhôva.

⁴³ Brah Yêhôva lah ma Y-Môis jêh ri ma Y-Arôn: “Aơ jêng nau vay ma nau rƀŭn Nau Găn: Phung bu năch mâu dơi ôh nhêt sa tâm nau rƀŭn nây.

⁴⁴ Bi ma phung dĭk bu hŏ rvăt jêh ma prăk knŏng lah jêh bu koh ntâu, rĭ mơ khân păng dơi sa.

⁴⁵ Bu năch gŭ njưh ƀât lât jêh ri bunuyh kan nkhôm kŏ mâu dơi sa đŏng.

⁴⁶ Nau rƀŭn nây knŏng dơi sa tâm ngih dơm; lơi djôt ôh puăch luh padih jêh ri mâu lĕ dơi ƀư deh du mlâm nting.

⁴⁷ Ăn lĕ rngôch phung Israel tâm rƀŭn kah gĭt prăp ƀŭn Nau Găn.

⁴⁸ Lah geh bu năch gŭ njưh tâm ngih khân may ŭch kah gĭt prăp rƀŭn Nau Găn tanăp Brah Yêhôva, ăn lĕ rngôch bu klâu khân păng dơn nau koh ntâu, pôri mơ păng dơi văch dăch jêh ri kah gĭt prăp nau rƀŭn aơ; bunuyh aơ dơi uănh tâm ban ma bunuyh tơm bri. Ƀiălah mbu mâu koh ntâu mâu mra dơi sa.

⁴⁹ Nây jêng du nau vay nsum ăn ma bunuyh tơm bri nđâp ma bu năch gŭ njưh ta klang khân may.”

⁵⁰ Lĕ rngôch phung ƀon lan Israel ƀư tĭng nâm nau Brah Yêhôva hŏ ntĭnh jêh ma Y-Môis jêh ri Y-Arôn.

⁵¹ Nar nây ro, Brah Yêhôva leo phung ƀon lan Israel du luh bơh n'gor Êjipt tĭng nâm ndŭl mpôl.