Nau Ngluh Êjipt 11 - Nau Brah Ndu Ngơi 2023

Y-Môis mbơh lor nau mhĭk tal jât

¹ Brah Yêhôva lah ma Y-Môis: “Gâp mra ƀư ăn ma Pharaôn jêh ri n'gor Êjipt du nau mhĭk đŏng. Jêh nĕ, hađăch nây mra ăn khân may hăn. Mâu knŏng hađăch nây ăn khân may hăn du luh ƀiălah păng mra nsot lĕ khân may hăn luh bơh aơ đŏng.

² Yor ri ngơi hom ma phung ƀon lan gay ma ăp nơm, nđâp ma bu klâu jêh ri bu ur, dăn hom ma phung chiau meng păng ndơ khlay prăk jêh ri mah.”

³ Brah Yêhôva ăn phung ƀon lan geh nau yô̆ tanăp măt phung Êjipt. Khlay ngăn, tanăp măt phung oh mon Pharaôn tâm ban đŏng tanăp măt phung Êjipt, Y-Môis jêng nơm geh nau lư n'găr tâm n'gor Êjipt.

⁴ Y-Môis ngơi: “Brah Yêhôva lah: ‘Klăp lah klong măng Gâp mra hăn rgăn lam n'gor Êjipt.

⁵ Lĕ rngôch kon bu klâu bôk rah tâm n'gor Êjipt mra khĭt; ntơm bơh kon dak bôk Pharaôn, nơm dôl chiă uănh bri dak kŏ tât đŏng ma kon bôk rah oh mon bu ur kơl kan dôl kĭn ba, jêh ri nđâp ma kon bôk rah mpô mpa rong khân păng đŏng.

⁶ Lam n'gor Êjipt mra geh nau nhĭm lŭng nter ngăn yorlah mâu vay mâp geh kơt aơ jêh ri kŏ mâu hôm đŏng geh kơt nây.

⁷ Ƀiălah, tâm phung ƀon lan Israel, nđâp ma so mâu mra groh ma bunuyh mâu lah mpô mpa, gay ma khân may gĭt Brah Yêhôva tâm nkhah phung Êjipt êng đah phung Israel.’

⁸ Aƀaơ, phung oh mon hađăch mra trŭnh văch ta gâp, păn mbah tanăp gâp jêh ri lah: ‘May jêh ri lĕ rngôch phung ƀon lan tĭng may hăn hom!’ Jêh nây gâp mra hăn.” Lôch ngơi, Y-Môis luh bơh Pharaôn ma nau ji nuih.

⁹ Brah Yêhôva lah ma Y-Môis: “Pharaôn mâu iăt ôh nau may, gay ma Gâp n'hao âk nau mbên khlay tâm n'gor Êjipt.”

¹⁰ Y-Môis jêh ri Y-Arôn ƀư lĕ rngôch nau mbên khlay aơ tanăp Pharaôn; ƀiălah Brah Yêhôva ƀư dăng nuih n'hâm Pharaôn, yor ri Pharaôn mâu ăn ôh phung ƀon lan Israel du luh tă bơh n'gor păng.