Nau Ngluh Êjipt 10 - Nau Brah Ndu Ngơi 2023

Nau mhĭk tal pham: Krah

¹ Brah Yêhôva lah ma Y-Môis: “Hăn mâp hom Pharaôn, yorlah Gâp hŏ ƀư dăng jêh nuih n'hâm hađăch nây jêh ri phung oh mon păng, gay ma Gâp dơi tâm mpơl nau mbên khlay aơ ta nklang khân păng,

² jêh ri gay may dơi nkoch tay ma kon sau khân may lĕ nau kan Gâp hŏ ƀư jêh ma phung Êjipt, tâm ban đŏng lĕ nau mbên khlay Gâp hŏ ƀư mpơl jêh ta nklang khân păng, tă bơh nây khân may dơi gĭt Gâp jêng Brah Yêhôva.”

³ Y-Môis jêh ri Y-Arôn hăn tât ta Pharaôn jêh ri lah: “Brah Yêhôva jêng Brah Ndu phung Hêbrơ lah: ‘Ndah nâm jŏ may mâu ŭch ntrŭnh may nơm tanăp măt Gâp? Ăn phung ƀon lan Gâp hăn, gay ma khân păng dơi pah kan ma Gâp.

⁴ Tơlah may mâu ăn ôh phung ƀon lan Gâp hăn, aơ, ôi taơ Gâp mra ăn phung krah văch tâm lam n'gor bri may.

⁵ Krah nây mra nkŭm ndâp klơ neh, kŏ tât bu mâu hôm ôh dơi saơ neh. Khân păng mra sa grăch lĕ rngôch moh ndơ hôm e, lĕ ndơ bơh mih tŭp pler ê hŏ ƀư rai. Khân păng sa grăch đŏng lĕ rngôch tơm si tâm mir may,

⁶ mŭt bêng ngih may, lĕ rngôch ngih phung oh mon may, jêh ri lĕ rngôch ngih phung Êjipt. Aơ jêng nau phung mbơ̆ may jêh ri lĕ rngôch phung chô yau may mâu mâp saơ ôh, ntơm bơh nar khân păng geh măt klơ neh ntu aơ kŏ tât ta nar aơ.’” Jêh ngơi, Y-Môis dâk sĭt jêh ri luh bơh ngih Pharaôn.

⁷ Phung oh mon Pharaôn lah ma păng: “Ndah nâm jŏ bunuyh aơ jêng dăk sân ma he? Ăn phung ƀon lan nây hăn hom gay ma khân păng dơi pah kan ma Yêhôva Brah Ndu khân păng! Hađăch ê hŏ gĭt ƀơh n'gor Êjipt dôl geh nau roh rai?”

⁸ Y-Môis jêh ri Y-Arôn bu kuăl tay gay hăn mâp Pharaôn. Păng lah ma khân păng: “Hăn pah kan hom ma Yêhôva Brah Ndu khân may. Ƀiălah mbu phung mra hăn?”

⁹ Y-Môis ơh: “Hên mra hăn ndrel ma phung kon se phung bu ranh jêh ri ndrel ma biăp jêh ri ndrôk hên, yorlah hên mra nkra nau yơk mbah ma Brah Yêhôva.”

¹⁰ Pharaôn lah: “Pôri ăn Brah Yêhôva gŭ ndrel ma khân may gay gĭt lah gâp geh ăn khân may jêh ri phung kon sau khân may hăn ndrel mâu lah mâu! Rah vah ngăn khân may geh nau mĭn djơh mhĭk!

¹¹ Mâu dơi ôh, knŏng phung bu klâu khân may dơm dơi hăn jêh ri pah kan ma Brah Yêhôva, yorlah nây jêng nau khân may dăn.” Jêh nây khân păng mprơh Y-Môis jêh ri Y-Arôn du bơh Pharaôn.

¹² Brah Yêhôva lah ma Y-Môis: “Yơr hom ti may leo ta n'gor Êjipt gay ƀư ăn krah lam n'gor nây, sa grăch tơm si jêh ri lĕ ndơ klơ neh, tă mih tŭp pler hôm e rong.”

¹³ Pôri Y-Môis yơr mâng jra leo ta n'gor Êjipt. Brah Yêhôva njŭn leo sial tă pa lơ khôm ta n'gor nây tâm du nar măng; tât ôi taơ, sial tă pa lơ leo krah văch.

¹⁴ Krah bêng lam n'gor Êjipt jêh ri trŭnh lam n'gor nây. Krah âk ngăn ngên, kăl e mâu mâp geh ôh krah jêh ri nar kăndơ̆ kŏ mâu geh đŏng kơt nây.

¹⁵ Khân păng nkŭm lam klơ neh kŏ tât lam n'gor jêng krăk kher, sa grăch lĕ rngôch tơm si tâm mir jêh ri lĕ ntil play tơm si tă mih tŭp pler hôm e om. Lam n'gor Êjipt mâu hôm geh du ntil tơm si mâu lah n'ha biăp ndrêh tâm mir.

¹⁶ Pharaôn kuăl ndal Y-Môis n'hanh Y-Arôn văch jêh ri lah: “Gâp hŏ ƀư tih jêh đah Yêhôva Brah Ndu khân may jêh ri đah khân may đŏng.

¹⁷ Aƀaơ ri, sâm yô̆ an nau tih gâp, knŏng du tơ̆ aơ dơm! Kuăl mbơh sơm hom ma Yêhôva Brah Ndu khân may; gay ma Păng sâm sŏk an bơh gâp lĕ nau rêh ni khĭt bunuyh aơ.”

¹⁸ Y-Môis du luh bơh Pharaôn jêh ri mbơh sơm ma Brah Yêhôva.

¹⁹ Brah Yêhôva leo sial tă pa dâng dăng ngăn khôm lơi krah jêh ri ăn khân păng tŭp tâm Dak Mƀŭt Chăng. Lam n'gor Êjipt mâu hôm geh ôh du mlâm krah.

²⁰ Ƀiălah Brah Yêhôva ƀư dăng nuih Pharaôn; hađăch nây mâu ăn phung ƀon lan Israel hăn ôh.

Nau mhĭk tal sĭn: Nau ngo klĕng

²¹ Brah Yêhôva lah ma Y-Môis: “Yơr hom ti may leo klơ trôk gay nau ngo nkŭm lam bri Êjipt, geh ntil nau ngo nâm bu dơi pah bi.”

²² Y-Môis yơr ti păng leo klơ trôk, nau ngo klĕng nkŭm lam bri Êjipt tâm pe nar.

²³ Tâm pe nar nây, bu mâu dơi ôh tâm saơ ndrăng nơm, mâu geh nơm dơi dâk tă bơh ntŭk păng gŭ. Ƀiălah ta ntŭk phung ƀon lan Israel gŭ ta nây geh nau ang.

²⁴ Pharaôn kuăl Y-Môis văch jêh ri lah: “Hăn hom pah kan ma Brah Yêhôva. Phung kon khân may hăn ndrel khân may, knŏng ăn biăp jêh ri ndrôk dơm gŭ ta aơ.”

²⁵ Ƀiălah Y-Môis ơh: “May ăn đŏng ma hên geh ndơ ƀư brah jêh ri ndơ nhhơr ƀư mpa ƀư brah gŭch ma Yêhôva Brah Ndu hên.

²⁶ Lĕ mpôl mpô mpa rong ăn groi hên, mâu om ôh du mlâm pŏk nchop ôh. Hên mra dŏng khân păng gay pah kan ma Yêhôva Brah Ndu hên; lah tât ta ntŭk nây, rĭ mơ hên gĭt dŏng moh ndơ gay pah kan ma Brah Yêhôva.”

²⁷ Ƀiălah Brah Yêhôva ƀư dăng nuih n'hâm Pharaôn, păng mâu ăn ôh phung Israel dâk hăn.

²⁸ Pharaôn lah: “Du hom, lơi hôm ăn măt gâp saơ may! Njrăng hom, lơi hôm ôh uănh măt gâp, yorlah ta nar may saơ măt gâp may mra khĭt!”

²⁹ Y-Môis lah: “Di nâm nau may lah, gâp mâu mra hôm saơ ôh măt may.”