Nau Ngluh Êjipt 1 - Nau Brah Ndu Ngơi 2023

Phung ƀon lan Israel dơi rklaih bơh nau ƀư dĭk ta Bri Êjipt ( 1:1 – 15:21 ) Nau hao âk rnoh ƀon lan Israel tâm bri Êjipt

¹ Aơ jêng amoh lĕ phung kon bu klâu Y-Israel hŏ tĭng Y-Yakôb tât ta n'gor Êjipt nđâp ma rnăk vâl păng:

² Y-Ruben, Y-Simêôn, Y-Lêvi, Y-Yuđa;

³ Y-Isakar, Y-Sabulôn, Y-Benjamin;

⁴ Y-Dan, Y-Naptali, Y-Gat jêh ri Y-Aser.

⁵ Lĕ rngôch kon sau Y-Yakôb jêng pơh jât nuyh, bi ma Y-Yôsep hŏ gŭ jêh tâm n'gor Êjipt.

⁶ Jêh nây Y-Yôsep khĭt, nđâp phung oh nâu păng jêh ri lĕ rngôch bunuyh ndrel ma rô̆ păng khĭt tâm ban lĕ.

⁷ Kon sau Y-Israel deh kon âk râk ngăch ngăn; rnoh bunuyh hao âk bĭk rơ̆, bêng ăp n'gor jêh ri mra jêng dŭt dăng ngăn ngên.

Ƀon lan Israel ƀư dĭk jâk jêr ngăn

⁸ Nôk nây geh du huê hađăch mhe hao klơ sưng hađăch chiă uănh n'gor Êjipt, mâu gĭt năl Y-Yôsep ôh.

⁹ Hađăch ngơi đah phung ƀon lan păng: “Aơ, phung ƀon lan Israel âk jêh ri dăng rlau lơn ma he.

¹⁰ Kay lŏng! Ăn he ƀư ma nau blau mĭn đah khân păng; lah mâu kơt nây, rnoh ƀon lan khân păng hao âk bĭk rơ̆ jêh ri lah geh nau tâm lơh tât, khân păng mra tâm rnglăp đah phung rlăng tâm lơh đah he, jêh ri du luh bơh n'gor.”

¹¹ Yor ri, phung Êjipt dơm phung kôranh uănh kan gay ƀư rêh ni phung Israel ma nau kan jâk jêr, nchâp đă khân păng ƀư ƀon toyh Pithôm jêh ri ƀon Ramsê gay ma ƀư ntŭk prăp drăp khlay ăn ma Pharaôn.

¹² Ƀiălah phung Êjipt lơ hô ƀư rêh ni khân păng, rnoh ƀon lan Israel lơ hô bĭk rơ̆ jêh ri lam ăp ntŭk, yor ri phung Êjipt klach ma phung ƀon lan Israel

¹³ yor ri nchâp khân păng pah kan dŭt jâk,

¹⁴ ƀư ma nau rêh khân păng ntop nđêh nji đah âk kan jâk jêr nâm bu plên neh, ƀư ƀrĭk, jêh ri ăp ntil kan tâm mir. Ăp ntil kan phung Êjipt nchâp phung Israel kan tâm nau hŏt rgănh ngăn.

Pharaôn ŭch ƀư rai phung ƀon lan Israel

¹⁵ Hađăch phung Êjipt ntrŭnh ăn ma lĕ rngôch phung mât deh bunuyh Hêbrơ, amoh du huê H'Sipra jêh ri amoh nơm êng H'Puah,

¹⁶ păng lah: “Dôl khân ay mât deh bu ur Hêbrơ, jêh ri lah khân ay saơ klơ sưng deh jêng kon bu klâu ăn nkhĭt lơi păng, lah bu ur rong ăn păng rêh.”

¹⁷ Ƀiălah phung bu ur mât deh klach yơk ma Brah Ndu, mâu ƀư ôh tĭng nâm nau hađăch Êjipt ntăm, hôm om phung kon bu klâu ăn rêh.

¹⁸ Hađăch Êjipt kuăl phung bu ur mât deh jêh ri ôp: “Mâm khân ay ƀư pônây? Mâm ƀư om phung kon bu klâu hôm rêh?”

¹⁹ Phung bu ur mât deh plơ̆ lah ma Pharaôn: “Yorlah phung bu ur Hêbrơ mâu jêng tâm ban phung bu ur Êjipt ôh. Khân păng dăng ngăn, hŏ deh lor jêh dôl bu ur mât deh ê tât.”

²⁰ Brah Ndu ăn nau ueh uĭn ma phung bu ur mât deh; rnoh phung ƀon lan Israel bĭk rơ̆ jêh ri khăn păng jêng dăng ngăn ngên.

²¹ Yorlah phung bu ur mât deh geh nuih n'hâm klach yơk ma Brah Ndu, yor ri Brah Ndu ăn ma rnăk vâl khân păng dơi jêng.

²² Pharaôn ntăm ma lĕ rngôch phung ƀon lan păng: “Ăn khân nơm klŭp lĕ rngôch kon bu klâu mhe deh phung Hêbrơ tâm dak krong, ƀiălah bu ur rong ăn păng rêh.”