Nau Mprơ Ueh 8 - Nau Brah Ndu Ngơi 2023

¹ Ndă lah may nâm bu nâu ma gâp, Ndrel pu nsum ta toh mê̆! Gay dôl mâp may ta rŏ trong, Gâp mra dơi chŭm may, Mâu geh ôh nơm tâm mưch rmot.

² Gâp mra njŭn leo may sĭt ma ngih mê̆ gâp, Ta nây may mra nti gâp. Gâp mra jă may nhêt ndrănh ƀâu kah, Jêh ri nhêt dak play pom gra nat.

³ Ti pa chiau păng rkơl ăn gâp dâm bôk, Bi ti pa ma păng ut gâp.

⁴ Hơi phung kon bu ur Yêrusalem, gâp vơl dăn ma khân ay, Lơi ta mpât, lơi ta rlay nau rŏng gâp Kŏ tât dôl nau rŏng ŭch mpay.

⁵ Mbu dôl bơh bri rdah hăn hao, Mbin nsing ma nơm păng rŏng? Tâm dâng tơm si mandragôr gâp hŏ rlay may, Ta ntŭk aơ yơh mê̆ may hŏ hŏt rgănh yor may, Ta ntŭk aơ yơh mê̆ may ma nau ji deh may.

⁶ Dăn n'gân gâp nâm bu ndơ tâp pŏng tâm play nuih may, Nâm bu ndơ tâp pŏng ta klơ tur ti may; Yorlah nau rŏng ŭch ngăn ktang nâm bu nau khĭt, Nuih n'hâm ntôn ktang ngăn nâm bu ƀon phung khĭt. Ŭnh nau rŏng hit n'gă ang, Nâm bu mpiăt ŭnh Brah Yêhôva.

⁷ Dak rdŭl mâu dơi ƀư nhhât nau rŏng, Lĕ dak krong mâu dơi ƀư ngâm păng ôh. Tơlah geh du huê nơm djôt lĕ drăp ndơ păng Gay dơi geh nau rŏng, Bu mra mưch dŭt n'hâm.

⁸ Hên geh du huê oh bu ur jê̆, Ê hŏ geh toh. Mâm hên mra ƀư ăn ma oh bu ur Tâm nar bu dăn gŭ ma păng?

⁹ Tơlah păng jêng mpêr ƀon, Hên mra ndâk ta klơ păng du mlâm vâl tŭm ma prăk; Tơlah păng jêng du mlâm mpông, Hên mra nchăng lơi ma kađar tơm si sêdar.

¹⁰ Gâp jêng mpêr ƀon, Toh gâp nâm bu vâl tŭm; Yor nây, tâm dâng măt păng Gâp jêng tu nau đăp mpăn.

¹¹ Y-Salômôn geh du đang krăk ƀâu ta Baal-Hamôn: Hađăch jao đang nây ăn ma phung kan nkhôm; Nôk rgum kao play ăp nơm mra njŭn ăn ma hađăch du rbăn glo prăk.

¹² Hơi hađăch Y-Salômôn, du rbăn glo prăk jêng ndơ hađăch, Bar rhiăng jêng ndơ phung kan nkhôm. Bi đang krăk ƀâu gâp jêng ndơ gâp yơh.

¹³ Hơi nơm dôl gŭ tâm đang krăk ƀâu, Mĭt jiăng kâp iăt bâr ay ngơi! Ăn ma gâp iăt bâr ay!

¹⁴ Gơnh hom, hơi nơm gâp rŏng, Ăn nâm bu du mlâm yơng Nâm bu mlâm jun nkuăng ndăm Ta klơ yôk n'hôl ƀâu kah!