Nau Mprơ Ueh 7 - Nau Brah Ndu Ngơi 2023

¹ Hơi kon bu ur hađăch, Mâm ƀư jâng ay nsoh hăn ma jep ueh ngăn! Tơm blu ay nâm bu rvang ndơ nkrơ̆, Jêng kan ti du huê njêh.

² Klŏ ay nâm bu ngan ndrănh mlâm Mâu dơi suăt ôh. Ndŭl ay jêng nâm bu du mbŭch ba ôrgơ, Geh kao si ueh văr jŭm.

³ Bar mlâm toh ay nâm bu bar jun kon jê̆ Nâm bu bar yơng deh kon bar.

⁴ Trô ko ay nâm bu vâl tŭm ma la. Măt ay jêng dak nglao Hêsbôn Dăch mpông ƀon Bat-Rabim; Trôm muh ay nâm bu vâl tŭm Liban, Uănh mpeh ƀon Damas.

⁵ Bôk ay n'gơr prêh nâm bu yôk Karmel, Sŏk ay mƀơk jong krăk nsrêk, Ƀư ăn ma hađăch ŭch uănh rŏng ngăn.

⁶ Ay ueh ngăn, ay dŭt ueh ngăn ngên, Hơi nơm gâp rŏng, ay ƀư ma gâp rŏng ngăn!

⁷ Lĭng săk ay nâm tơm play đung, Toh ay jêng rkŭm play dŭm.

⁸ Gâp mĭn êng, gâp mra hao tơm play đung aơ, Kuăn rđâng lĕ mpak geh rkŭm play dŭm; Ŭch ngăn ma toh ay nâm bu rkŭm play krăk ƀâu, N'hâm nsôr ay n'hôl ƀâu play mandragôr.

⁹ Jêh ri mbung ay ndrănh kah ngăn. Ŭch ma ndrănh hoch ueh lăp ma nơm ay rŏng, Bêng ler trôm mbung nơm gŭ bê̆ch.

¹⁰ Gâp jêng ndơ nơm gâp rŏng ngăn ngên, Nau păng ŭch prăp ma gâp.

¹¹ Hơi nơm gâp rŏng, tât hom, He mra hăn ta mir, jêh ri gŭ tâm ƀon jê̆; Jêh ri rlu măng ntŭk ƀon jê̆.

¹² He mra dâk ơm ôi hăn chop đang krăk ƀâu, Kay long uănh krăk ƀâu hŏ chăt nkŭr, Kao hŏ dang, Play pom gra nat hŏ luh kao mâu lah ê hŏ. Ta nây ay mra jao nau rŏng ăn ma gâp.

¹³ Play pom bri ntô̆ ƀâu n'hôl ƀâu kah, Ta mpông he rơm ndrăp ăp ntil play kah Lĕ rngôch mhe nđâp ma ơm, Gâp gay prăp ăn ma may, nơm gâp rŏng!