Nau Mprơ Ueh 6 - Nau Brah Ndu Ngơi 2023

¹ Hơi nơm ueh reh lơn tâm phung bu ur? Nơm ay rŏng ntŭk hăn? Nơm ay rŏng ntŭk mpeh plơ̆ sĭt Gay ma phung hên joi ndrel ma ay?

² Nơm gâp rŏng hăn jŭr đang păng, Ntŭk tăm mbor ndơ ƀâu kah, Gay ăn biăp sa gơ̆ tâm đang, Jêh ri pĕ lĕ n'gĭng kao si ueh.

³ Gâp jêng ndơ nơm gâp rŏng jêh ri nơm gâp rŏng jêng ndơ gâp; Păng ăn biăp sa gơ̆ tâm nklang kao si ueh.

⁴ Hơi nơm gâp rŏng, ay ueh nâm bu ƀon Tirsa Rom nkrơ̆ nâm bu ƀon Yêrusalem, Rnam nâm bu tahan yơr kơ rduh tâm lơh.

⁵ Lơi hôm uănh gâp đŏng, Yorlah bar măt ay ƀư gâp rung răng! Sŏk ay nâm bu phung be Nsăt nchuăt prăl ngăn ta jŭr sop Gilêat.

⁶ Sêk ay nâm bu phung biăp me, Mhe ŭm nđik hăn hao, Lĕ rngôch tĭng bar bar, Mâu du mlâm gŭ êng.

⁷ Bar trô bom ay nâm bu play pom gra nat plah bar, Bok dŭm pakơi bok nkŭm măt.

⁸ Geh prao jât hađăch bu ur, pham jât ur yông, Jêh ri geh bu ur druh.

⁹ Ƀiălah sĭm plŭk, hơi nơm ueh ngăn ngên, ay jêng mrô nguay! Jêng kon bu ur knŏng nguay ma mê̆ păng, Du huê kon nơm rŏng lơn ma nơm hŏ deh păng. Lĕ bu ur druh saơ păng rnê păng geh nau ueh uĭn da dê. Lĕ hađăch bu ur jêh ri ur yông tâm rnê păng da dê.

¹⁰ Bu ur ri mbu nơm jêng dĭng mpơl nâm bu ƀhit rvi ang, Ueh nâm bu khay, chrêk lơp nâm bu nar, Rnam nâm bu tahan yơr kơ rduh tâm lơh?

¹¹ Gâp hăn jŭr ta đang play nhhăr, Gay uănh nkeh nse tâm rlŭng, Uănh đang krăk ƀâu hŏ chăt nkŭr, Pom gra nat hŏ luh kao mâu lah ê hŏ.

¹² Ay ê hŏ prot gĭt ôh, Di nôk aơ ay dơi njŭn hao klơ ndeh kon bu klâu hađăch.

¹³ Hơi Sulammit, plơ̆ sĭt hom, plơ̆ sĭt hom! Plơ̆ sĭt hom, plơ̆ sĭt, gay hên dơi ntrŏng uănh ay. Mâm khân may ŭch ntrŏng uănh ma Sulammit, Nâm bu uănh ta lô̆ Mahanaim?