Nau Mprơ Ueh 5 - Nau Brah Ndu Ngơi 2023

¹ Hơi oh gâp, ƀăn gâp, Gâp hŏ lăp tâm đang gâp jêh! Gâp hŏ pĕ si tăng jêh ri ndơ ƀâu kah, Sa mpơng sŭt nđâp dak sŭt gâp, Nhêt ndrănh đah dak toh. Hơi mĭt jiăng, sa hom! Hơi băl mpôl, nhŭl hom ndrui nau rŏng!

² Gâp bê̆ch ƀiălah nuih n'hâm gâp rngeh. Ri! Nơm gâp rŏng goh mpông: “Pơk mpông ăn ma gâp, oh bu ur gâp, nơm gâp rŏng, Sĭm plŭk gâp nơm, nơm ueh ngăn ngên ma gâp! Yorlah bôk gâp bĕ hâu ngăn, Sŏk gâp bĕ dak ngom dôl bri măng.”

³ Gâp hŏ tơh jêh ao padih, Mâm ƀư nsoh tay? Gâp hŏ rao jâng jêh, Mâm gay ƀư ƀơ̆ tay?

⁴ Nơm gâp rŏng nsro ti găn ta trôm mpông, Nuih n'hâm gâp mpât rđŭk yor păng.

⁵ Gâp dâk ro pơk mpông ăn ma nơm gâp rŏng, Kôp ti gâp truh dak si tăng, Jêh ri nglau ti gâp bêng ma dak si tăng Jŭr hoch lĕ ma rnăng nđăng mpông.

⁶ Gâp pơk mpông ăn ma nơm gâp rŏng, Ƀiălah nơm gâp rŏng hŏ du roh jêh. Păng hŏ du roh jêh, nuih n'hâm gâp khĭt klêm. Gâp joi păng, ƀiălah mâu mâp ôh; Gâp kuăl păng ƀiălah păng mâu plơ̆ lah.

⁷ Phung tahan gak hăn nsong tâm ƀon hŏ mâp gâp, Khân păng lơh gâp, ƀư ăn gâp sôt; Phung gak njrăng mpêr ƀon Doh nđâp ao jâr gâp.

⁸ Hơi phung bu ur druh ƀon Yêrusalem, gâp vơl dăn ma khân ay, Tơlah mâp nơm gâp rŏng, Dăn mbơh ma păng pô aơ Gâp dôl kop yor nau rŏng.

⁹ Hơi bu ur ueh rlau lơn tâm lĕ phung bu ur, Nơm ay rŏng geh ndơ rlau nơm êng đŏng? Nơm ay rŏng geh ndơ rlau nơm êng Dĭng ay vơl dăn ma hên nâm bu pônây?

¹⁰ Nơm gâp rŏng nglang ngăn bok dŭm, Dŭt ueh tâm lĕ rngôch bunuyh.

¹¹ Bôk păng jêng mah khlay; Sŏk păng nâm bu rbuh dak Krăk nsrêk nâm bu rsau nđak.

¹² Măt păng nâm bu bar sĭm plŭk Dâk kêng n'hor dak, Ŭm nđik ma dak toh, Di ngăn đah muh măt păng.

¹³ Bar trô bom păng nâm bu mbor kao ƀâu kah, Thŭl rvêt n'hôl ƀâu kah; Ndôi păng nâm bu kao si ueh, Bĕ dak si tăng hoch njŏ.

¹⁴ Ti păng nâm bu lĕ dĭng ma mah Lĭr ndop lŭ khlay. Săk jăn păng nâm bu glo ma la pler rlip, Lĭr ndop lŭ saphir.

¹⁵ Kôp jâng păng nâm bu kôp meh n'gâng lŭ marbrơ nglang N'gân ta klơ ndơl mah; Nau rom păng jêng nâm bu yôk Liban, Ndrêh ueh nâm bu tơm si sêdar.

¹⁶ Mbung păng dŭt njŭng ngăn, Lĕ săk păng di ma rŏng ngăn. Hơi phung bu ur Yêrusalem. Nơm gâp rŏng jêng pônây, băl gâp rŏng nâm bu pônây yơh!