Nau Mprơ Ueh 4 - Nau Brah Ndu Ngơi 2023

¹ Hơi nơm gâp rŏng, ay ueh reh ngăn, Ay dŭt ueh reh ngăn! Măt ay nâm bu kôp sĭm plŭk Nde pakơi bok nkŭm măt; Sŏk ay nâm bu phung be Nsăt ta lô̆ ta jŭr sop Gilêat.

² Sêk ay nâm bu phung biăp bơi ma kreh rsau, Mhe ŭm nđik hăn hao, Lĕ rngôch tĭng bar bar, Mâu du mlâm gŭ êng.

³ Ndôi ay nâm bu rse brai dŭm, Mbung ay ueh reh; Bar trô bom ay nâm bu play pom gra nat plah bar, Bok dŭm pakơi bok nkŭm muh măt.

⁴ Trô ko ay nâm bu vâl tŭm Y-Đavit, Ndâk jêh gay prăp ndơ tâm lơh. Geh âk khêl yông ta nây, Lĕ rngôch jêng khêl phung tahan janh ktang.

⁵ Bar mlâm toh ay nâm bu bar jun kon jê̆, Nâm bu bar yơng deh kon bar, Dôl sa gơ̆ ta nklang kao si ueh.

⁶ Kŏ tât sial ang ôi khôm, Jêh ri nau ngo du roh, Gâp mra hăn hao yôk dak si tăng, Tât gôl ntăk si ƀâu kah.

⁷ Hơi nơm gâp rŏng, ay ueh reh ngăn, Mâu khap mâu têl khap jât kô̆ nŭm jât.

⁸ Hơi ƀăn gâp, hăn hom ndrel gâp du bơh yôk Liban, Hăn hom ndrel gâp chalơi yôk Liban, Du hom n'gơn yôk Amana, N'gơn Sênir jêh ri Hermôn, Du bơh trôm yau mŭr, Du bơh yôk yau brăch.

⁹ Hơi oh gâp, ur gâp, Ay hŏ ntŭng jêh play nuih gâp Ma đah ntơ̆ măt; Knŏng đah rse văn lŭ khlay ta trô ko Ay hŏ ntŭng jêh play nuih gâp.

¹⁰ Hơi oh gâp, ur gâp, Nau ay rŏng kah njŭng ngăn! Nau ay rŏng kah lơn ma ndrănh, Dak ƀâu kah ay mâu geh dak ƀâu kah êng ban!

¹¹ Hơi ƀăn gâp, trôm mbung ay ăn truh dak sŭk, Tâm dâng mpiăt ay pôn dak sŭt jêh dak toh; Ao ay n'hôl nâm bu ƀâu bri Liban.

¹² Hơi oh gâp, ƀăn gâp Jêng du đang ntĭl ndâp; Jêng tu dak nsêt jêh, Jêng dak n'hor tâp pŏng.

¹³ Jêng du đang play pom gra nat ndrel lĕ nkeh nse, Ndrel ăp ntil play tơm si săch, Kao hêna jêh ri tơm si dak kôlônh;

¹⁴ Dak kôlônh jêh ri rmĭt kring, Calamôs jêh ri sinamôn, Jêh ri ăp ntil tơm si geh n'hôl ƀâu kah, Dak si tăng, alôê Ndrel ma lĕ dak si ƀâu kah ngăn.

¹⁵ Ay jêng tu dak tâm đang, Jêng tu dak rêh hoch, Jêng n'hor dak luh bơh Liban!

¹⁶ Hơi sial pa lơ, khôm hom, Hơi sial pa dâng, ăn văch hom! Khôm hom ta đang gâp, Gay ƀâu n'hôl dak ƀâu kah lam ntŭk! Ndă lah nơm gâp rŏng lăp tâm đang păng, Jêh ri chiăm âk kao ƀâu play kah!