Nau Mprơ Ueh 3 - Nau Brah Ndu Ngơi 2023

¹ Măng sĭt, ta klơ sưng bê̆ch Gâp joi nơm nuih n'hâm gâp rŏng, Gâp joi păng ƀiălah mâu mâp ôh.

² Gâp mra dâk jêh ri hăn nsong jŭm ƀon toyh, Lam lĕ trong sâng jêh ri nkual toyh; Gâp joi nơm nuih n'hâm gâp rŏng kơnh. Gâp joi păng ƀiălah mâu mâp ôh.

³ Phung tahan gak mâp gâp Dôl khân păng hăn nsong jŭm ƀon. Gâp ôp: “Khân may saơ lĕ nơm nuih n'hâm gâp rŏng?”

⁴ Ƀah plăch ndŭr kơi bơh khân păng, Gâp hŏ mâp nơm nuih n'hâm gâp rŏng. Gâp ut ra-u păng, mâu ŭch mƀơk ôh Kŏ tât njŭn păng sĭt ma ngih mê̆ gâp, Lăp jrô nơm hŏ bă ntreo jêh gâp.

⁵ Hơi phung kon bu ur druh Yêrusalem, gâp vơl dăn ma khân ay, Tâm amoh phung yơng jêh ri phung jun tâm ndrêch, Lơi ƀư mpât, lơi ta rlay nau rŏng gâp Kŏ tât nau rŏng ŭch mpay.

⁶ Mbu nơm nây văch tă bơh bri rdah, Nâm bu n'gâng nhhŭk ŭnh, Ƀâu n'hôl âk ntăk si ƀâu kah dak si tăng, Thŭl rvêt lĕ ntil rnih ƀâu kah rvăt tă bơh phung tăch drăp?

⁷ Uănh ri, rpê̆ tung hađăch Salômôn! Geh prao jât tahan janh ktang hăn nchueng, Phung tahan janh ktang Israel.

⁸ Lĕ rngôch djôt đao da dê Bêng ma mbên nau tâm lơh, Ăp nơm djôt đao kêng păng nơm Njrăng rlăng nau ndơl dôl măng ngo.

⁹ Hađăch Salômôn ƀư du mlâm rlê̆ ma păng nơm Ma tơm si bri Liban.

¹⁰ Hađăch ƀư rnung rlê̆ ma prăk, Ndŭr kơi rlê̆ ma mah, rnơl gŭ rlê̆ nkŭm ma bok sut chăng, Tâm trôm cheh ueh ngăn Tă bơh phung bu ur druh Yêrusalem.

¹¹ Hơi, phung bu ur druh Siôn, Gơnh oi uănh hađăch Salômôn. Păng ndô đon hađăch me păng hŏ n'gân ta klơ bôk hađăch. Tâm nar tâm nkol ur sai hađăch, Nar nuih n'hâm hađăch hâk răm.