Nau Mprơ Ueh 2 - Nau Brah Ndu Ngơi 2023

¹ Gâp jêng kao rôs tâm lôk mir Sarôn, Jêng n'gĭng kao si ueh tâm rlŭng jru.

² Nơm gâp rŏng ta nklang phung bu ur druh, Nâm bu n'gĭng kao si ueh ta nklang pôm lok.

³ Nơm ay rŏng ta nklang phung bu klâu ndăm, Nâm bu tơm si mandragôr ta nklang tơm si tâm krŏng. Gâp hâk răm dơi gŭ tâm dâng gui may, Jêh ri play may njŭng ngăn tâm mbung gâp.

⁴ May njŭn gâp lăp tâm jrô nhêt sa maak, N'ha kơ nau rŏng rpuh klơ gâp.

⁵ Ăn ƀư n'hâm suan ma gâp đah ƀănh play krăk ƀâu kro, Ƀư mpay gâp đah play mandragôr; Yorlah gâp hŏ kop yor nau gâp rŏng.

⁶ Ti pa chiau păng rkơl ăn gâp dâm bôk, Bi ti pa ma păng ut gâp.

⁷ Hơi phung bu ur druh Yêrusalem, gâp vơl dăn khân ay, Tâm amoh phung yơng jêh ri phung jun tâm ndrêch, Lơi ƀư mpât, lơi ta rlay nau rŏng gâp Kŏ tât dôl nau rŏng ŭch mpay.

⁸ Bâr nơm gâp rŏng bơh ntŭk! Ri, păng tât, Nsăt rlau lĕ yôk, Găn rlau lĕ dor.

⁹ Nơm gâp rŏng jêng nâm bu yơng, Nâm bu jun ndăm. Ri, păng dâk pakơi mpir ngih hên, N'gơr uănh rgăn trôm mpông bloh, Rgăn lĕ trôm nđa bôk mpông.

¹⁰ Nơm gâp rŏng kuăl nteh: “Nơm gâp rŏng, Hơi nơm ueh gâp, Gơnh hom tât kêng gâp!

¹¹ Yorlah yan puh hŏ rlau jêh, Mih mâu hôm tŭp đŏng;

¹² Âk kao dang ta klơ neh; Yan mprơ maak hŏ tât jêh, Jêh ri nteh sĭm plŭk ndrau huy Lam lĕ trong tâm ƀon tơm he.

¹³ Tơm rvi dôl luh play bôk yan, Tơm krăk ƀâu dôl kao n'hôl ƀâu kah. Hơi nơm gâp rŏng, Hơi nơm ueh reh gâp, Ăn gơnh hom tât kêng gâp!

¹⁴ Hơi plŭk gâp! Ay krap ay nơm tâm nđa lŭ, kêng mpir yôk rdâk, Ăn gâp dơi uănh muh măt ay, Jêh ri tăng bâr ay ngơi; Yorlah bâr ay njŭng rah rơch, Muh măt ay ueh reh.

¹⁵ Dăn kơl nhŭp phung mpik ăn ma hên, Lĕ mpik jê̆ Ƀư rai đang krăk ƀâu; Yorlah đang krăk ƀâu hên dôl dang kao.”

¹⁶ Nơm gâp rŏng jêng ndơ gâp, jêh ri gâp jêng ndơ păng; Păng ăn biăp sa gơ̆ tâm nklang kao si ueh.

¹⁷ Kŏ tât sial ơm ôi khôm lhêt, Jêh ri nau ngo du roh. Hơi nơm gâp rŏng! Plơ̆ sĭt hom, Nâm bu du mlâm yơng Mâu lah jun kon jê̆ ta klơ yôk Bêthet.