Nau Mprơ Ueh 1 - Nau Brah Ndu Ngơi 2023

¹ Nau mprơ ueh, nau mprơ ueh uĭn ngăn ma Y-Salômôn.

² Ndă lah păng chŭm gâp đah nau chŭm bơh trôm mbung păng! Yorlah nau păng rŏng ueh lơn ma ndrănh.

³ Dak ngi may n'hôl ƀâu kah ngăn, Nau lư amoh may jêng nâm bu dak ƀâu kah n'hôl bu troch; Yor nây yơh bu druh tang tat rŏng ma may.

⁴ Dăn têk gâp tĭng may, ăn he gơnh chuat ndrel, — Hađăch hŏ njŭn gâp sĭt tâm ngih hađăch — Phung he nsum răm maak rhơn răm ndrel may, Nsum tâm rnê nau may rŏng, âk lơn ma ndrănh. Lĕ bu druh mâm ƀư mâu dơi rŏng ma may!

⁵ Hơi bu ur druh ƀon Yêrusalem, Gâp krăk ƀiălah ueh ray, Krăk nâm bu lĕ ngih bok Kêdar, Ueh ray nâm bu lĕ bok nching Y-Salômôn.

⁶ Lơi ntrâng uănh ma gâp yorlah gâp krăk, Nar hŏ ƀư nđat ntâu gâp; Phung kon bu klâu mê̆ gâp ji nuih ma gâp, Hŏ jao ma gâp mât mray lĕ mir krăk ƀâu; Bi mir krăk ƀâu êng gâp nơm, gâp mâu mât mray!

⁷ Hơi nơm gâp rŏng ma nuih n'hâm gâp, Dăn ăn gâp gĭt ta ntŭk may chiăp biăp, Ta ntŭk may ăn khân păng rlu nar nklang bôk; Moh yor gâp jêng nâm bu du huê bu ur nkŭm măt Kêng phung biăp phung băl may?

⁸ Aơ bunuyh ueh ray lơn tâm lĕ rngôch bu ur, Tơlah ay mâu gĭt, Pôri hăn tĭng têl phung biăp, Leo phung be kon hăn sa Ta meng vâl bok phung chiăp.

⁹ Hơi nơm gâp rŏng, Gâp tâm rđĭl ay nâm bu du mlâm seh me uih ndeh seh Pharaôn.

¹⁰ Bar bom ay ueh reh ndrel lĕ rvang drăp nkrơ̆; Trô ko ay ueh đŏng yor văn lŭ khlay.

¹¹ Hên mra ƀư ăn ay Rvang ndơ nkrơ̆ mah lĭr găr prăk.

¹² Tâm dôl hađăch gŭ ta tâm trôm ngih hađăch, Dak kôlônh gâp n'hôl ƀâu kah ngăn.

¹³ Ndrel gâp, nơm gâp rŏng nâm bu nchăp kao dak si tăng Bê̆ch ta klơ ntang tơh gâp.

¹⁴ Ndrel gâp, nơm gâp rŏng jêng nchăp kao hêna Tâm đang krăk ƀâu Êngêdi.

¹⁵ Nơm rŏng ueh reh gâp ơi, Ay ueh reh jêh ri mâm ƀư rom nkrơ̆! Măt ay nâm bu măt plŭk.

¹⁶ Nơm gâp rŏng ơi, may bu klâu ueh, May di rŏng ngăn! Sưng he jêng lôk mir nđĭr rngêt.

¹⁷ Lĕ njon chor ngih he ƀư ma tơm si sêdar da dê, Kađar mpet mpir ƀư ma tơm n'ho.