Nau Mprơ Ơm 99 - Nau Brah Ndu Ngơi 2023

Mprơ tâm rnê nau răp jăp Brah Yêhôva ma phung ƀon lan Păng

¹ Brah Yêhôva chiă uănh! Lĕ mpôl băl bunuyh râm sâr hom; Păng gŭ klơ phung Chêrubim; neh ntu geh nau mpât n'gơ.

² Brah Yêhôva dŭt toyh ta Siôn! Bu dơi yơk Păng prêh klơ ma lĕ rngôch băl mpôl bunuyh.

³ Ăn khân păng mprơ tâm rnê ma amoh dŭt toyh jêh ri khư ma nau klach May. May jêng kloh ueh!

⁴ May jêng Hađăch nau brah; May rŏng nau sŏng srăng; Păng rdâk nau di, Ƀư nau phat dôih jêh ri nau di tâm ngih Yakôb.

⁵ Mbah yơk hom ma Yêhôva Brah Ndu he Jêh ri yơk mbah tâm dâng rnơl chrong jâng Păng. Păng jêng kloh ueh!

⁶ Tâm phung kôranh ƀư brah Păng geh Y-Môis jêh ri Y-Arôn, Tâm phung kuăl mbơh sơm ma amoh Păng geh Y-Samuel. Khân păng kuăl mbơh sơm ma Brah Yêhôva jêh ri Păng mplơ̆ lah ma khân păng.

⁷ Brah Yêhôva lah ma khân păng bơh ndâr tŭk mbâl; Khân păng djôt prăp nau Brah Yêhôva tâm rnglăp Jêh ri nau ntĭnh bơh Păng ăn.

⁸ Ơ Yêhôva Brah Ndu hên, May plơ̆ sǐt lah jêh ma khân păng; May jêng Brah Ndu vay yô̆ an, Ƀiălah May har plơng lĕ nau khân păng ƀư mhĭk.

⁹ Yơk hom ma Yêhôva Brah Ndu he Jêh ri yơk mbah ta klơ yôk kloh ueh Păng; Yorlah Yêhôva Brah Ndu he jêng kloh ueh!